൮. അട്ഠമവഗ്ഗോ

൭൧. ‘‘സുസുഖുമനിപുണത്ഥദസ്സിനാ, മതികുസലേന നിവാതവുത്തിനാ;

സംസേവിതവുദ്ധസീലിനാ [സംസേവിതബുദ്ധസീലിനാ (ക.)], നിബ്ബാനം ന ഹി തേന ദുല്ലഭ’’ന്തി.

… വച്ഛപാലോ ഥേരോ….

൭൨. ‘‘യഥാ കളീരോ സുസു വഡ്ഢിതഗ്ഗോ, ദുന്നിക്ഖമോ ഹോതി പസാഖജാതോ;

ഏവം അഹം ഭരിയായാനിതായ, അനുമഞ്ഞം മം പബ്ബജിതോമ്ഹി ദാനീ’’തി.

… ആതുമോ ഥേരോ….

൭൩. ‘‘ജിണ്ണഞ്ച ദിസ്വാ ദുഖിതഞ്ച ബ്യാധിതം, മതഞ്ച ദിസ്വാ ഗതമായുസങ്ഖയം;

തതോ അഹം നിക്ഖമിതൂന പബ്ബജിം, പഹായ കാമാനി മനോരമാനീ’’തി.

… മാണവോ ഥേരോ….

൭൪. ‘‘കാമച്ഛന്ദോ ച ബ്യാപാദോ, ഥിനമിദ്ധഞ്ച [ഥീനമിദ്ധഞ്ച (സീ. സ്യാ.)] ഭിക്ഖുനോ;

ഉദ്ധച്ചം വിചികിച്ഛാ ച, സബ്ബസോവ ന വിജ്ജതീ’’തി.

… സുയാമനോ ഥേരോ….

൭൫. ‘‘സാധു സുവിഹിതാന ദസ്സനം, കങ്ഖാ ഛിജ്ജതി ബുദ്ധി വഡ്ഢതി;

ബാലമ്പി കരോന്തി പണ്ഡിതം, തസ്മാ സാധു സതം സമാഗമോ’’തി.

… സുസാരദോ ഥേരോ….

൭൬. ‘‘ഉപ്പതന്തേസു നിപതേ, നിപതന്തേസു ഉപ്പതേ;

വസേ അവസമാനേസു, രമമാനേസു നോ രമേ’’തി.

… പിയഞ്ജഹോ ഥേരോ….

൭൭. ‘‘ഇദം പുരേ ചിത്തമചാരി ചാരികം, യേനിച്ഛകം യത്ഥകാമം യഥാസുഖം;

തദജ്ജഹം നിഗ്ഗഹേസ്സാമി യോനിസോ, ഹത്ഥിപ്പഭിന്നം വിയ അങ്കുസഗ്ഗഹോ’’തി.

… ഹത്ഥാരോഹപുത്തോ ഥേരോ….

൭൮. ‘‘അനേകജാതിസംസാരം, സന്ധാവിസ്സം അനിബ്ബിസം;

തസ്സ മേ ദുക്ഖജാതസ്സ, ദുക്ഖക്ഖന്ധോ അപരദ്ധോ’’തി.

… മേണ്ഡസിരോ ഥേരോ….

൭൯. ‘‘സബ്ബോ രാഗോ പഹീനോ മേ, സബ്ബോ ദോസോ സമൂഹതോ;

സബ്ബോ മേ വിഗതോ മോഹോ, സീതിഭൂതോസ്മി നിബ്ബുതോ’’തി.

… രക്ഖിതോ ഥേരോ….

൮൦. ‘‘യം മയാ പകതം കമ്മം, അപ്പം വാ യദി വാ ബഹും;

സബ്ബമേതം പരിക്ഖീണം, നത്ഥി ദാനി പുനബ്ഭവോ’’തി.

… ഉഗ്ഗോ ഥേരോ….

വഗ്ഗോ അട്ഠമോ നിട്ഠിതോ.

തസ്സുദ്ദാനം –

വച്ഛപാലോ ച യോ ഥേരോ, ആതുമോ മാണവോ ഇസി;

സുയാമനോ സുസാരദോ, ഥേരോ യോ ച പിയഞ്ജഹോ;

ആരോഹപുത്തോ മേണ്ഡസിരോ, രക്ഖിതോ ഉഗ്ഗസവ്ഹയോതി.