൫. പഞ്ചമവഗ്ഗോ

൪൧. ‘‘വിവരമനുപതന്തി വിജ്ജുതാ, വേഭാരസ്സ ച പണ്ഡവസ്സ ച;

നഗവിവരഗതോ ച ഝായതി, പുത്തോ അപ്പടിമസ്സ താദിനോ’’തി.

… സിരിവഡ്ഢോ ഥേരോ….

൪൨. ‘‘ചാലേ ഉപചാലേ സീസൂപചാലേ ( ) [(ചാലാ ഉപചാലാ, സീസൂപചാലാ) (ക.)] പതിസ്സതാ [പടിസ്സതികാ (സ്യാ. ക.)] നു ഖോ വിഹരഥ;

ആഗതോ വോ വാലം വിയ വേധീ’’തി.

… ഖദിരവനിയോ ഥേരോ….

൪൩. ‘‘സുമുത്തികോ സുമുത്തികോ സാഹു, സുമുത്തികോമ്ഹി തീഹി ഖുജ്ജകേഹി;

അസിതാസു മയാ നങ്ഗലാസു, മയാ ഖുദ്ദകുദ്ദാലാസു മയാ.

യദിപി ഇധമേവ ഇധമേവ, അഥ വാപി അലമേവ അലമേവ;

ഝായ സുമങ്ഗല ഝായ സുമങ്ഗല, അപ്പമത്തോ വിഹര സുമങ്ഗലാ’’തി.

… സുമങ്ഗലോ ഥേരോ….

൪൪. [സം. നി. ൧.൨൩൯] ‘‘മതം വാ അമ്മ രോദന്തി, യോ വാ ജീവം ന ദിസ്സതി;

ജീവന്തം മം അമ്മ പസ്സന്തീ, കസ്മാ മം അമ്മ രോദസീ’’തി.

… സാനുത്ഥേരോ….

൪൫. ‘‘യഥാപി ഭദ്ദോ ആജഞ്ഞോ, ഖലിത്വാ പതിതിട്ഠതി;

ഏവം ദസ്സനസമ്പന്നം, സമ്മാസമ്ബുദ്ധസാവക’’ന്തി.

… രമണീയവിഹാരിത്ഥേരോ….

൪൬. ‘‘സദ്ധായാഹം പബ്ബജിതോ, അഗാരസ്മാനഗാരിയം;

സതി പഞ്ഞാ ച മേ വുഡ്ഢാ, ചിത്തഞ്ച സുസമാഹിതം;

കാമം കരസ്സു രൂപാനി, നേവ മം ബ്യാധയിസ്സസീ’’തി [ബാധയിസ്സസീതി (സീ.), ബ്യാഥയിസ്സസീതി (?)].

… സമിദ്ധിത്ഥേരോ….

൪൭. ‘‘നമോ തേ ബുദ്ധ വീരത്ഥു, വിപ്പമുത്തോസി സബ്ബധി;

തുയ്ഹാപദാനേ വിഹരം, വിഹരാമി അനാസവോ’’തി.

… ഉജ്ജയോ ഥേരോ….

൪൮. ‘‘യതോ അഹം പബ്ബജിതോ, അഗാരസ്മാനഗാരിയം;

നാഭിജാനാമി സങ്കപ്പം, അനരിയം ദോസസംഹിത’’ന്തി.

… സഞ്ജയോ ഥേരോ….

൪൯. ‘‘ചിഹചിഹാഭിനദിതേ [വിഹവിഹാഭിനദിതേ (സീ. സ്യാ.)], സിപ്പികാഭിരുതേഹി ച;

ന മേ തം ഫന്ദതി ചിത്തം, ഏകത്തനിരതം ഹി മേ’’തി.

… രാമണേയ്യകോ ഥേരോ….

൫൦. ‘‘ധരണീ ച സിഞ്ചതി വാതി, മാലുതോ വിജ്ജുതാ ചരതി നഭേ;

ഉപസമന്തി വിതക്കാ, ചിത്തം സുസമാഹിതം മമാ’’തി.

… വിമലോ ഥേരോ….

വഗ്ഗോ പഞ്ചമോ നിട്ഠിതോ.

തസ്സുദ്ദാനം –

സിരീവഡ്ഢോ രേവതോ ഥേരോ, സുമങ്ഗലോ സാനുസവ്ഹയോ;

രമണീയവിഹാരീ ച, സമിദ്ധിഉജ്ജയസഞ്ജയാ;

രാമണേയ്യോ ച സോ ഥേരോ, വിമലോ ച രണഞ്ജഹോതി.