൬. ഛട്ഠവഗ്ഗോ

൫൧. ‘‘വസ്സതി ദേവോ യഥാ സുഗീതം, ഛന്നാ മേ കുടികാ സുഖാ നിവാതാ;

ചിത്തം സുസമാഹിതഞ്ച മയ്ഹം, അഥ ചേ പത്ഥയസി പവസ്സ ദേവാ’’തി.

… ഗോധികോ ഥേരോ….

൫൨. ‘‘വസ്സതി ദേവോ യഥാ സുഗീതം, ഛന്നാ മേ കുടികാ സുഖാ നിവാതാ;

ചിത്തം സുസമാഹിതഞ്ച കായേ, അഥ ചേ പത്ഥയസി പവസ്സ ദേവാ’’തി.

… സുബാഹുത്ഥേരോ….

൫൩. ‘‘വസ്സതി ദേവോ യഥാ സുഗീതം, ഛന്നാ മേ കുടികാ സുഖാ നിവാതാ;

തസ്സം വിഹരാമി അപ്പമത്തോ, അഥ ചേ പത്ഥയസി പവസ്സ ദേവാ’’തി.

… വല്ലിയോ ഥേരോ….

൫൪. ‘‘വസ്സതി ദേവോ യഥാ സുഗീതം, ഛന്നാ മേ കുടികാ സുഖാ നിവാതാ;

തസ്സം വിഹരാമി അദുതിയോ, അഥ ചേ പത്ഥയസി പവസ്സ ദേവാ’’തി.

… ഉത്തിയോ ഥേരോ….

൫൫. ‘‘ആസന്ദിം കുടികം കത്വാ, ഓഗയ്ഹ അഞ്ജനം വനം;

തിസ്സോ വിജ്ജാ അനുപ്പത്താ, കതം ബുദ്ധസ്സ സാസന’’ന്തി.

… അഞ്ജനവനിയോ ഥേരോ….

൫൬. ‘‘കോ കുടികായം ഭിക്ഖു കുടികായം, വീതരാഗോ സുസമാഹിതചിത്തോ;

ഏവം ജാനാഹി ആവുസോ, അമോഘാ തേ കുടികാ കതാ’’തി.

… കുടിവിഹാരിത്ഥേരോ….

൫൭. ‘‘അയമാഹു പുരാണിയാ കുടി, അഞ്ഞം പത്ഥയസേ നവം കുടിം;

ആസം കുടിയാ വിരാജയ, ദുക്ഖാ ഭിക്ഖു പുന നവാ കുടീ’’തി.

… ദുതിയകുടിവിഹാരിത്ഥേരോ….

൫൮. ‘‘രമണീയാ മേ കുടികാ, സദ്ധാദേയ്യാ മനോരമാ;

ന മേ അത്ഥോ കുമാരീഹി, യേസം അത്ഥോ തഹിം ഗച്ഛഥ നാരിയോ’’തി.

… രമണീയകുടികോ ഥേരോ….

൫൯. ‘‘സദ്ധായാഹം പബ്ബജിതോ, അരഞ്ഞേ മേ കുടികാ കതാ;

അപ്പമത്തോ ച ആതാപീ, സമ്പജാനോ പതിസ്സതോ’’തി [പടിസ്സതോതി (ക.)].

… കോസലവിഹാരിത്ഥേരോ….

൬൦. ‘‘തേ മേ ഇജ്ഝിംസു സങ്കപ്പാ, യദത്ഥോ പാവിസിം കുടിം;

വിജ്ജാവിമുത്തിം പച്ചേസം, മാനാനുസയമുജ്ജഹ’’ന്തി.

… സീവലിത്ഥേരോ….

വഗ്ഗോ ഛട്ഠോ നിട്ഠിതോ.

തസ്സുദ്ദാനം –

ഗോധികോ ച സുബാഹു ച, വല്ലിയോ ഉത്തിയോ ഇസി;

അഞ്ജനവനിയോ ഥേരോ, ദുവേ കുടിവിഹാരിനോ;

രമണീയകുടികോ ച, കോസലവ്ഹയസീവലീതി.