൪. ചതുത്ഥവഗ്ഗോ

൩൧. ‘‘ഫുട്ഠോ ഡംസേഹി മകസേഹി, അരഞ്ഞസ്മിം ബ്രഹാവനേ;

നാഗോ സംഗാമസീസേവ, സതോ തത്രാധിവാസയേ’’തി.

… ഗഹ്വരതീരിയോ ഥേരോ….

൩൨. ‘‘അജരം ജീരമാനേന, തപ്പമാനേന നിബ്ബുതിം;

നിമിയം [നിമ്മിസ്സം (സീ.), നിരാമിസം (സ്യാ.), നിമിനേയ്യം (?)] പരമം സന്തിം, യോഗക്ഖേമം അനുത്തര’’ന്തി.

… സുപ്പിയോ ഥേരോ….

൩൩. ‘‘യഥാപി ഏകപുത്തസ്മിം, പിയസ്മിം കുസലീ സിയാ;

ഏവം സബ്ബേസു പാണേസു, സബ്ബത്ഥ കുസലോ സിയാ’’തി.

… സോപാകോ ഥേരോ….

൩൪. ‘‘അനാസന്നവരാ ഏതാ, നിച്ചമേവ വിജാനതാ;

ഗാമാ അരഞ്ഞമാഗമ്മ, തതോ ഗേഹം ഉപാവിസി [ഉപാവിസിം (സീ.)];

തതോ ഉട്ഠായ പക്കാമി, അനാമന്തേത്വാ [അനാമന്തിയ (സീ.)] പോസിയോ’’തി.

… പോസിയോ ഥേരോ….

൩൫. ‘‘സുഖം സുഖത്ഥോ ലഭതേ തദാചരം, കിത്തിഞ്ച പപ്പോതി യസസ്സ വഡ്ഢതി;

യോ അരിയമട്ഠങ്ഗികമഞ്ജസം ഉജും, ഭാവേതി മഗ്ഗം അമതസ്സ പത്തിയാ’’തി.

… സാമഞ്ഞകാനിത്ഥേരോ….

൩൬. ‘‘സാധു സുതം സാധു ചരിതകം, സാധു സദാ അനികേതവിഹാരോ;

അത്ഥപുച്ഛനം പദക്ഖിണകമ്മം, ഏതം സാമഞ്ഞമകിഞ്ചനസ്സാ’’തി.

… കുമാപുത്തോ ഥേരോ….

൩൭. ‘‘നാനാജനപദം യന്തി, വിചരന്താ അസഞ്ഞതാ;

സമാധിഞ്ച വിരാധേന്തി, കിംസു രട്ഠചരിയാ കരിസ്സതി;

തസ്മാ വിനേയ്യ സാരമ്ഭം, ഝായേയ്യ അപുരക്ഖതോ’’തി.

… കുമാപുത്തത്ഥേരസ്സ സഹായകോ ഥേരോ….

൩൮. ‘‘യോ ഇദ്ധിയാ സരഭും അട്ഠപേസി, സോ ഗവമ്പതി അസിതോ അനേജോ;

തം സബ്ബസങ്ഗാതിഗതം മഹാമുനിം, ദേവാ നമസ്സന്തി ഭവസ്സ പാരഗു’’ന്തി.

… ഗവമ്പതിത്ഥേരോ….

൩൯. [സം. നി. ൧.൨൧, ൯൭]‘‘സത്തിയാ വിയ ഓമട്ഠോ, ഡയ്ഹമാനോവ [ഡയ്ഹമാനേവ (സബ്ബത്ഥ)] മത്ഥകേ;

കാമരാഗപ്പഹാനായ, സതോ ഭിക്ഖു പരിബ്ബജേ’’തി.

… തിസ്സോ ഥേരോ….

൪൦. ‘‘സത്തിയാ വിയ ഓമട്ഠോ, ഡയ്ഹമാനോവ മത്ഥകേ;

ഭവരാഗപ്പഹാനായ, സതോ ഭിക്ഖു പരിബ്ബജേ’’തി.

… വഡ്ഢമാനോ ഥേരോ….

വഗ്ഗോ ചതുത്ഥോ നിട്ഠിതോ.

തസ്സുദ്ദാനം –

ഗഹ്വരതീരിയോ സുപ്പിയോ, സോപാകോ ചേവ പോസിയോ;

സാമഞ്ഞകാനി കുമാപുത്തോ, കുമാപുത്തസഹായകോ;

ഗവമ്പതി തിസ്സത്ഥേരോ, വഡ്ഢമാനോ മഹായസോതി.