൩. തതിയവഗ്ഗോ

൨൧. ‘‘നാഹം ഭയസ്സ ഭായാമി, സത്ഥാ നോ അമതസ്സ കോവിദോ;

യത്ഥ ഭയം നാവതിട്ഠതി, തേന മഗ്ഗേന വജന്തി ഭിക്ഖവോ’’തി.

… നിഗ്രോധോ ഥേരോ….

൨൨. ‘‘നീലാ സുഗീവാ സിഖിനോ, മോരാ കാരമ്ഭിയം [കാരംവിയം (സീ.), കാരവിയം (സ്യാ.)] അഭിനദന്തി;

തേ സീതവാതകീളിതാ [സീതവാതകദ്ദിതകലിതാ (സീ.), സീതവാതകലിതാ (സ്യാ.)], സുത്തം ഝായം [ഝാനം (സ്യാ.), ഝായിം (?)] നിബോധേന്തീ’’തി.

… ചിത്തകോ ഥേരോ….

൨൩. ‘‘അഹം ഖോ വേളുഗുമ്ബസ്മിം, ഭുത്വാന മധുപായസം;

പദക്ഖിണം സമ്മസന്തോ, ഖന്ധാനം ഉദയബ്ബയം;

സാനും പടിഗമിസ്സാമി, വിവേകമനുബ്രൂഹയ’’ന്തി.

… ഗോസാലോ ഥേരോ….

൨൪. ‘‘അനുവസ്സികോ പബ്ബജിതോ, പസ്സ ധമ്മസുധമ്മതം;

തിസ്സോ വിജ്ജാ അനുപ്പത്താ, കതം ബുദ്ധസ്സ സാസന’’ന്തി.

… സുഗന്ധോ ഥേരോ….

൨൫. ‘‘ഓഭാസജാതം ഫലഗം, ചിത്തം യസ്സ അഭിണ്ഹസോ;

താദിസം ഭിക്ഖുമാസജ്ജ, കണ്ഹ ദുക്ഖം നിഗച്ഛസീ’’തി.

… നന്ദിയോ ഥേരോ….

൨൬. ‘‘സുത്വാ സുഭാസിതം വാചം, ബുദ്ധസ്സാദിച്ചബന്ധുനോ;

പച്ചബ്യധിം ഹി നിപുണം, വാലഗ്ഗം ഉസുനാ യഥാ’’തി.

… അഭയോ ഥേരോ….

൨൭. ‘‘ദബ്ബം കുസം പോടകിലം, ഉസീരം മുഞ്ജപബ്ബജം;

ഉരസാ പനുദിസ്സാമി, വിവേകമനുബ്രൂഹയ’’ന്തി.

… ലോമസകങ്ഗിയോ ഥേരോ….

൨൮. ‘‘കച്ചി നോ വത്ഥപസുതോ, കച്ചി നോ ഭൂസനാരതോ;

കച്ചി സീലമയം ഗന്ധം, കിം ത്വം വായസി [കച്ചി സീലമയം ഗന്ധം, ത്വം വാസി (സ്യാ.)] നേതരാ പജാ’’തി.

… ജമ്ബുഗാമികപുത്തോ ഥേരോ….

൨൯. ‘‘സമുന്നമയമത്താനം, ഉസുകാരോവ തേജനം;

ചിത്തം ഉജും കരിത്വാന, അവിജ്ജം ഭിന്ദ ഹാരിതാ’’തി.

… ഹാരിതോ ഥേരോ….

൩൦. ‘‘ആബാധേ മേ സമുപ്പന്നേ, സതി മേ ഉദപജ്ജഥ;

ആബാധോ മേ സമുപ്പന്നോ, കാലോ മേ നപ്പമജ്ജിതു’’ന്തി.

… ഉത്തിയോ ഥേരോ….

വഗ്ഗോ തതിയോ നിട്ഠിതോ.

തസ്സുദ്ദാനം –

നിഗ്രോധോ ചിത്തകോ ഥേരോ, ഗോസാലഥേരോ സുഗന്ധോ;

നന്ദിയോ അഭയോ ഥേരോ, ഥേരോ ലോമസകങ്ഗിയോ;

ജമ്ബുഗാമികപുത്തോ ച, ഹാരിതോ ഉത്തിയോ ഇസീതി.