൨. ദുതിയവഗ്ഗോ

൧൧. ‘‘പാമോജ്ജബഹുലോ ഭിക്ഖു, ധമ്മേ ബുദ്ധപ്പവേദിതേ;

അധിഗച്ഛേ പദം സന്തം, സങ്ഖാരൂപസമം സുഖ’’ന്തി.

… ചൂളവച്ഛോ [ചൂലഗവച്ഛോ (സീ.)] ഥേരോ….

൧൨. ‘‘പഞ്ഞാബലീ സീലവതൂപപന്നോ, സമാഹിതോ ഝാനരതോ സതീമാ;

യദത്ഥിയം ഭോജനം ഭുഞ്ജമാനോ, കങ്ഖേഥ കാലം ഇധ വീതരാഗോ’’തി.

… മഹാവച്ഛോ [മഹാഗവച്ഛോ (സീ.)] ഥേരോ….

൧൩. ‘‘നീലബ്ഭവണ്ണാ രുചിരാ, സീതവാരീ സുചിന്ധരാ;

ഇന്ദഗോപകസഞ്ഛന്നാ, തേ സേലാ രമയന്തി മ’’ന്തി.

… വനവച്ഛോ ഥേരോ….

൧൪. ‘‘ഉപജ്ഝായോ മം അവച, ഇതോ ഗച്ഛാമ സീവക;

ഗാമേ മേ വസതി കായോ, അരഞ്ഞം മേ ഗതോ മനോ;

സേമാനകോപി ഗച്ഛാമി, നത്ഥി സങ്ഗോ വിജാനത’’ന്തി.

… സിവകോ സാമണേരോ….

൧൫. ‘‘പഞ്ച ഛിന്ദേ പഞ്ച ജഹേ, പഞ്ച ചുത്തരി ഭാവയേ;

പഞ്ചസങ്ഗാതിഗോ ഭിക്ഖു, ഓഘതിണ്ണോതി വുച്ചതീ’’തി.

… കുണ്ഡധാനോ ഥേരോ….

൧൬. ‘‘യഥാപി ഭദ്ദോ ആജഞ്ഞോ, നങ്ഗലാവത്തനീ സിഖീ;

ഗച്ഛതി അപ്പകസിരേന, ഏവം രത്തിന്ദിവാ മമ;

ഗച്ഛന്തി അപ്പകസിരേന, സുഖേ ലദ്ധേ നിരാമിസേ’’തി.

… ബേലട്ഠസീസോ ഥേരോ….

൧൭. ‘‘മിദ്ധീ യദാ ഹോതി മഹഗ്ഘസോ ച, നിദ്ദായിതാ സമ്പരിവത്തസായീ;

മഹാവരാഹോവ നിവാപപുട്ഠോ, പുനപ്പുനം ഗബ്ഭമുപേതി മന്ദോ’’തി.

… ദാസകോ ഥേരോ….

൧൮. ‘‘അഹു ബുദ്ധസ്സ ദായാദോ, ഭിക്ഖു ഭേസകളാവനേ;

കേവലം അട്ഠിസഞ്ഞായ, അഫരീ പഥവിം [പഠവിം (സീ. സ്യാ.)] ഇമം;

മഞ്ഞേഹം കാമരാഗം സോ, ഖിപ്പമേവ പഹിസ്സതീ’’തി [പഹീയഭി (സബ്ബത്ഥ പാളിയം)].

… സിങ്ഗാലപിതാ [സീഗാലപിതാ (സീ.)] ഥേരോ….

൧൯. [ധ. പ. ൮൦, ൧൪൫ ധമ്മപദേപി] ‘‘ഉദകം ഹി നയന്തി നേത്തികാ, ഉസുകാരാ നമയന്തി [ദമയന്തി (ക.)] തേജനം;

ദാരും നമയന്തി തച്ഛകാ, അത്താനം ദമയന്തി സുബ്ബതാ’’തി.

… കുലോ [കുണ്ഡലോ (സീ.), കുളോ (സ്യാ. ക.)] ഥേരോ….

൨൦. ‘‘മരണേ മേ ഭയം നത്ഥി, നികന്തി നത്ഥി ജീവിതേ;

സന്ദേഹം നിക്ഖിപിസ്സാമി, സമ്പജാനോ പടിസ്സതോ’’തി [പതിസ്സതോതി (സീ. സ്യാ.)].

… അജിതോ ഥേരോ ….

വഗ്ഗോ ദുതിയോ നിട്ഠിതോ.

തസ്സുദ്ദാനം –

ചൂളവച്ഛോ മഹാവച്ഛോ, വനവച്ഛോ ച സീവകോ;

കുണ്ഡധാനോ ച ബേലട്ഠി, ദാസകോ ച തതോപരി;

സിങ്ഗാലപിതികോ ഥേരോ, കുലോ ച അജിതോ ദസാതി.