൧. പഠമവഗ്ഗോ

൧. ‘‘ഛന്നാ മേ കുടികാ സുഖാ നിവാതാ, വസ്സ ദേവ യഥാസുഖം;

ചിത്തം മേ സുസമാഹിതം വിമുത്തം, ആതാപീ വിഹരാമി വസ്സ ദേവാ’’തി.

ഇത്ഥം സുദം [ഇത്ഥം സുമം (ക. അട്ഠ.)] ആയസ്മാ സുഭൂതിത്ഥേരോ ഗാഥം അഭാസിത്ഥാതി.

൨. ‘‘ഉപസന്തോ ഉപരതോ, മന്തഭാണീ അനുദ്ധതോ;

ധുനാതി പാപകേ ധമ്മേ, ദുമപത്തംവ മാലുതോ’’തി.

ഇത്ഥം സുദം ആയസ്മാ മഹാകോട്ഠികോ [മഹാകോട്ഠിതോ (സീ. സ്യാ.)] ഥേരോ ഗാഥം അഭാസിത്ഥാതി.

൩. ‘‘പഞ്ഞം ഇമം പസ്സ തഥാഗതാനം, അഗ്ഗി യഥാ പജ്ജലിതോ നിസീഥേ;

ആലോകദാ ചക്ഖുദദാ ഭവന്തി, യേ ആഗതാനം വിനയന്തി കങ്ഖ’’ന്തി.

ഇത്ഥം സുദം ആയസ്മാ കങ്ഖാരേവതോ ഥേരോ ഗാഥം അഭാസിത്ഥാതി.

൪. ‘‘സമ്ഭിരേവ സമാസേഥ, പണ്ഡിതേഹത്ഥദസ്സിഭി;

അത്ഥം മഹന്തം ഗമ്ഭീരം, ദുദ്ദസം നിപുണം അണും;

ധീരാ സമധിഗച്ഛന്തി, അപ്പമത്താ വിചക്ഖണാ’’തി.

ഇത്ഥം സുദം ആയസ്മാ പുണ്ണോ മന്താണിപുത്തോ [മന്താനിപുത്തോ (സ്യാ. ക.)] ഥേരോ ഗാഥം അഭാസിത്ഥാതി.

൫. ‘‘യോ ദുദ്ദമിയോ ദമേന ദന്തോ, ദബ്ബോ സന്തുസിതോ വിതിണ്ണകങ്ഖോ;

വിജിതാവീ അപേതഭേരവോ ഹി, ദബ്ബോ സോ പരിനിബ്ബുതോ ഠിതത്തോ’’തി.

ഇത്ഥം സുദം ആയസ്മാ ദബ്ബോ ഥേരോ ഗാഥം അഭാസിത്ഥാതി.

൬. ‘‘യോ സീതവനം ഉപഗാ ഭിക്ഖു, ഏകോ സന്തുസിതോ സമാഹിതത്തോ;

വിജിതാവീ അപേതലോമഹംസോ, രക്ഖം കായഗതാസതിം ധിതിമാ’’തി.

ഇത്ഥം സുദം ആയസ്മാ സീതവനിയോ ഥേരോ ഗാഥം അഭാസിത്ഥാതി.

൭. ‘‘യോപാനുദീ മച്ചുരാജസ്സ സേനം, നളസേതുംവ സുദുബ്ബലം മഹോഘോ;

വിജിതാവീ അപേതഭേരവോ ഹി, ദന്തോ സോ പരിനിബ്ബുതോ ഠിതത്തോ’’തി.

ഇത്ഥം സുദം ആയസ്മാ ഭല്ലിയോ ഥേരോ ഗാഥം അഭാസിത്ഥാതി.

൮. ‘‘യോ ദുദ്ദമിയോ ദമേന ദന്തോ, വീരോ സന്തുസിതോ വിതിണ്ണകങ്ഖോ;

വിജിതാവീ അപേതലോമഹംസോ, വീരോ സോ പരിനിബ്ബുതോ ഠിതത്തോ’’തി.

ഇത്ഥം സുദം ആയസ്മാ വീരോ ഥേരോ ഗാഥം അഭാസിത്ഥാതി.

൯. ‘‘സ്വാഗതം ന ദുരാഗതം [നാപഗതം (സീ. സ്യാ.)], നയിദം ദുമന്തിതം മമ;

സംവിഭത്തേസു ധമ്മേസു, യം സേട്ഠം തദുപാഗമി’’ന്തി.

ഇത്ഥം സുദം ആയസ്മാ പിലിന്ദവച്ഛോ [പിലിന്ദിവച്ഛോ (സീ.)] ഥേരോ ഗാഥം അഭാസിത്ഥാതി.

൧൦. ‘‘വിഹരി അപേക്ഖം ഇധ വാ ഹുരം വാ, യോ വേദഗൂ സമിതോ യതത്തോ;

സബ്ബേസു ധമ്മേസു അനൂപലിത്തോ, ലോകസ്സ ജഞ്ഞാ ഉദയബ്ബയഞ്ചാ’’തി.

ഇത്ഥം സുദം ആയസ്മാ പുണ്ണമാസോ ഥേരോ ഗാഥം അഭാസിത്ഥാതി.

വഗ്ഗോ പഠമോ നിട്ഠിതോ.

തസ്സുദ്ദാനം –

സുഭൂതി കോട്ഠികോ ഥേരോ, കങ്ഖാരേവതസമ്മതോ;

മന്താണിപുത്തോ ദബ്ബോ ച, സീതവനിയോ ച ഭല്ലിയോ;

വീരോ പിലിന്ദവച്ഛോ ച, പുണ്ണമാസോ തമോനുദോതി.