൭. തിസ്സമേത്തേയ്യസുത്തം

൮൨൦. ‘‘മേഥുനമനുയുത്തസ്സ, (ഇച്ചായസ്മാ തിസ്സോ മേത്തേയ്യോ) വിഘാതം ബ്രൂഹി മാരിസ;

സുത്വാന തവ സാസനം, വിവേകേ സിക്ഖിസ്സാമസേ.

൮൨൧. ‘‘മേഥുനമനുയുത്തസ്സ, (മേത്തേയ്യാതി ഭഗവാ) മുസ്സതേ വാപി സാസനം;

മിച്ഛാ ച പടിപജ്ജതി, ഏതം തസ്മിം അനാരിയം.

൮൨൨. ‘‘ഏകോ പുബ്ബേ ചരിത്വാന, മേഥുനം യോ നിസേവതി;

യാനം ഭന്തം വ തം ലോകേ, ഹീനമാഹു പുഥുജ്ജനം.

൮൨൩. ‘‘യസോ കിത്തി ച യാ പുബ്ബേ, ഹായതേ വാപി തസ്സ സാ;

ഏതമ്പി ദിസ്വാ സിക്ഖേഥ, മേഥുനം വിപ്പഹാതവേ.

൮൨൪. ‘‘സങ്കപ്പേഹി പരേതോ സോ, കപണോ വിയ ഝായതി;

സുത്വാ പരേസം നിഗ്ഘോസം, മങ്കു ഹോതി തഥാവിധോ.

൮൨൫. ‘‘അഥ സത്ഥാനി കുരുതേ, പരവാദേഹി ചോദിതോ;

ഏസ ഖ്വസ്സ മഹാഗേധോ, മോസവജ്ജം പഗാഹതി.

൮൨൬. ‘‘പണ്ഡിതോതി സമഞ്ഞാതോ, ഏകചരിയം അധിട്ഠിതോ;

അഥാപി [സ ചാപി (നിദ്ദേസേ)] മേഥുനേ യുത്തോ, മന്ദോവ പരികിസ്സതി [പരികിലിസ്സതി (സീ.)].

൮൨൭. ‘‘ഏതമാദീനവം ഞത്വാ, മുനി പുബ്ബാപരേ ഇധ;

ഏകചരിയം ദള്ഹം കയിരാ, ന നിസേവേഥ മേഥുനം.

൮൨൮. ‘‘വിവേകഞ്ഞേവ സിക്ഖേഥ, ഏതദരിയാനമുത്തമം;

ന തേന സേട്ഠോ മഞ്ഞേഥ, സ വേ നിബ്ബാനസന്തികേ.

൮൨൯. ‘‘രിത്തസ്സ മുനിനോ ചരതോ, കാമേസു അനപേക്ഖിനോ;

ഓഘതിണ്ണസ്സ പിഹയന്തി, കാമേസു ഗധിതാ [ഗഥിതാ (സീ.)] പജാ’’തി.

തിസ്സമേത്തേയ്യസുത്തം സത്തമം നിട്ഠിതം.