൧൬. സാരിപുത്തസുത്തം

൯൬൧. ‘‘ന മേ ദിട്ഠോ ഇതോ പുബ്ബേ, (ഇച്ചായസ്മാ സാരിപുത്തോ)

ന സുതോ ഉദ കസ്സചി;

ഏവം വഗ്ഗുവദോ സത്ഥാ,

തുസിതാ ഗണിമാഗതോ.

൯൬൨. ‘‘സദേവകസ്സ ലോകസ്സ, യഥാ ദിസ്സതി ചക്ഖുമാ;

സബ്ബം തമം വിനോദേത്വാ, ഏകോവ രതിമജ്ഝഗാ.

൯൬൩. ‘‘തം ബുദ്ധം അസിതം താദിം, അകുഹം ഗണിമാഗതം;

ബഹൂനമിധ ബദ്ധാനം, അത്ഥി പഞ്ഹേന ആഗമം.

൯൬൪. ‘‘ഭിക്ഖുനോ വിജിഗുച്ഛതോ, ഭജതോ രിത്തമാസനം;

രുക്ഖമൂലം സുസാനം വാ, പബ്ബതാനം ഗുഹാസു വാ.

൯൬൫. ‘‘ഉച്ചാവചേസു സയനേസു, കീവന്തോ തത്ഥ ഭേരവാ;

യേഹി ഭിക്ഖു ന വേധേയ്യ, നിഗ്ഘോസേ സയനാസനേ.

൯൬൬. ‘‘കതീ പരിസ്സയാ ലോകേ, ഗച്ഛതോ അഗതം ദിസം;

യേ ഭിക്ഖു അഭിസമ്ഭവേ, പന്തമ്ഹി സയനാസനേ.

൯൬൭. ‘‘ക്യാസ്സ ബ്യപ്പഥയോ അസ്സു, ക്യാസ്സസ്സു ഇധ ഗോചരാ;

കാനി സീലബ്ബതാനാസ്സു, പഹിതത്തസ്സ ഭിക്ഖുനോ.

൯൬൮. ‘‘കം സോ സിക്ഖം സമാദായ, ഏകോദി നിപകോ സതോ;

കമ്മാരോ രജതസ്സേവ, നിദ്ധമേ മലമത്തനോ’’.

൯൬൯. ‘‘വിജിഗുച്ഛമാനസ്സ യദിദം ഫാസു, (സാരിപുത്താതി ഭഗവാ)

രിത്താസനം സയനം സേവതോ ചേ;

സമ്ബോധികാമസ്സ യഥാനുധമ്മം,

തം തേ പവക്ഖാമി യഥാ പജാനം.

൯൭൦. ‘‘പഞ്ചന്നം ധീരോ ഭയാനം ന ഭായേ, ഭിക്ഖു സതോ സപരിയന്തചാരീ;

ഡംസാധിപാതാനം സരീസപാനം, മനുസ്സഫസ്സാനം ചതുപ്പദാനം.

൯൭൧. ‘‘പരധമ്മികാനമ്പി ന സന്തസേയ്യ, ദിസ്വാപി തേസം ബഹുഭേരവാനി;

അഥാപരാനി അഭിസമ്ഭവേയ്യ, പരിസ്സയാനി കുസലാനുഏസീ.

൯൭൨. ‘‘ആതങ്കഫസ്സേന ഖുദായ ഫുട്ഠോ, സീതം അതുണ്ഹം [അച്ചുണ്ഹം (സീ. സ്യാ.)] അധിവാസയേയ്യ;

സോ തേഹി ഫുട്ഠോ ബഹുധാ അനോകോ, വീരിയം പരക്കമ്മദള്ഹം കരേയ്യ.

൯൭൩. ‘‘ഥേയ്യം ന കാരേ [ന കരേയ്യ (സീ. സ്യാ. ക.)] ന മുസാ ഭണേയ്യ, മേത്തായ ഫസ്സേ തസഥാവരാനി;

യദാവിലത്തം മനസോ വിജഞ്ഞാ, കണ്ഹസ്സ പക്ഖോതി വിനോദയേയ്യ.

൯൭൪. ‘‘കോധാതിമാനസ്സ വസം ന ഗച്ഛേ, മൂലമ്പി തേസം പലിഖഞ്ഞ തിട്ഠേ;

അഥപ്പിയം വാ പന അപ്പിയം വാ, അദ്ധാ ഭവന്തോ അഭിസമ്ഭവേയ്യ.

൯൭൫. ‘‘പഞ്ഞം പുരക്ഖത്വാ കല്യാണപീതി, വിക്ഖമ്ഭയേ താനി പരിസ്സയാനി;

അരതിം സഹേഥ സയനമ്ഹി പന്തേ, ചതുരോ സഹേഥ പരിദേവധമ്മേ.

൯൭൬. ‘‘കിംസൂ അസിസ്സാമി കുവം വാ [കുധ വാ (ക.), കുഥ വാ (നിദ്ദേസ)] അസിസ്സം, ദുക്ഖം വത സേത്ഥ ക്വജ്ജ സേസ്സം;

ഏതേ വിതക്കേ പരിദേവനേയ്യേ, വിനയേഥ സേഖോ അനികേതചാരീ.

൯൭൭. ‘‘അന്നഞ്ച ലദ്ധാ വസനഞ്ച കാലേ, മത്തം സോ ജഞ്ഞാ ഇധ തോസനത്ഥം;

സോ തേസു ഗുത്തോ യതചാരി ഗാമേ, രുസിതോപി വാചം ഫരുസം ന വജ്ജാ.

൯൭൮. ‘‘ഓക്ഖിത്തചക്ഖു ന ച പാദലോലോ, ഝാനാനുയുത്തോ ബഹുജാഗരസ്സ;

ഉപേക്ഖമാരബ്ഭ സമാഹിതത്തോ, തക്കാസയം കുക്കുച്ചിയൂപഛിന്ദേ.

൯൭൯. ‘‘ചുദിതോ വചീഭി സതിമാഭിനന്ദേ, സബ്രഹ്മചാരീസു ഖിലം പഭിന്ദേ;

വാചം പമുഞ്ചേ കുസലം നാതിവേലം, ജനവാദധമ്മായ ന ചേതയേയ്യ.

൯൮൦. ‘‘അഥാപരം പഞ്ച രജാനി ലോകേ, യേസം സതീമാ വിനയായ സിക്ഖേ;

രൂപേസു സദ്ദേസു അഥോ രസേസു, ഗന്ധേസു ഫസ്സേസു സഹേഥ രാഗം.

൯൮൧. ‘‘ഏതേസു ധമ്മേസു വിനേയ്യ ഛന്ദം, ഭിക്ഖു സതിമാ സുവിമുത്തചിത്തോ;

കാലേന സോ സമ്മാ ധമ്മം പരിവീമംസമാനോ,

ഏകോദിഭൂതോ വിഹനേ തമം സോ’’തി.

സാരിപുത്തസുത്തം സോളസമം നിട്ഠിതം.

അട്ഠകവഗ്ഗോ ചതുത്ഥോ