൬. ധമ്മചരിയസുത്തം

൨൭൬. ധമ്മചരിയം ബ്രഹ്മചരിയം, ഏതദാഹു വസുത്തമം;

പബ്ബജിതോപി ചേ ഹോതി, അഗാരാ അനഗാരിയം.

൨൭൭. സോ ചേ മുഖരജാതികോ, വിഹേസാഭിരതോ മഗോ;

ജീവിതം തസ്സ പാപിയോ, രജം വഡ്ഢേതി അത്തനോ.

൨൭൮. കലഹാഭിരതോ ഭിക്ഖു, മോഹധമ്മേന ആവുതോ;

അക്ഖാതമ്പി ന ജാനാതി, ധമ്മം ബുദ്ധേന ദേസിതം.

൨൭൯. വിഹേസം ഭാവിതത്താനം, അവിജ്ജായ പുരക്ഖതോ;

സംകിലേസം ന ജാനാതി, മഗ്ഗം നിരയഗാമിനം.

൨൮൦. വിനിപാതം സമാപന്നോ, ഗബ്ഭാ ഗബ്ഭം തമാ തമം;

സ വേ താദിസകോ ഭിക്ഖു, പേച്ച ദുക്ഖം നിഗച്ഛതി.

൨൮൧. ഗൂഥകൂപോ യഥാ അസ്സ, സമ്പുണ്ണോ ഗണവസ്സികോ;

യോ ച ഏവരൂപോ അസ്സ, ദുബ്ബിസോധോ ഹി സാങ്ഗണോ.

൨൮൨. യം ഏവരൂപം ജാനാഥ, ഭിക്ഖവോ ഗേഹനിസ്സിതം;

പാപിച്ഛം പാപസങ്കപ്പം, പാപആചാരഗോചരം.

൨൮൩. സബ്ബേ സമഗ്ഗാ ഹുത്വാന, അഭിനിബ്ബജ്ജിയാഥ [അഭിനിബ്ബജ്ജയാഥ (സീ. പീ. അ. നി. ൮.൧൦)] നം;

കാരണ്ഡവം [കാരണ്ഡം വ (സ്യാ. ക.) അ. നി. ൮.൧൦] നിദ്ധമഥ, കസമ്ബും അപകസ്സഥ [അവകസ്സഥ (സീ. സ്യാ. ക.)].

൨൮൪. തതോ പലാപേ [പലാസേ (ക.)] വാഹേഥ, അസ്സമണേ സമണമാനിനേ;

നിദ്ധമിത്വാന പാപിച്ഛേ, പാപആചാരഗോചരേ.

൨൮൫. സുദ്ധാ സുദ്ധേഹി സംവാസം, കപ്പയവ്ഹോ പതിസ്സതാ;

തതോ സമഗ്ഗാ നിപകാ, ദുക്ഖസ്സന്തം കരിസ്സഥാതി.

ധമ്മചരിയസുത്തം [കപിലസുത്തം (അട്ഠ.)] ഛട്ഠം നിട്ഠിതം.