൨. ചൂളവഗ്ഗോ

൧. രതനസുത്തം

൨൨൪. യാനീധ ഭൂതാനി സമാഗതാനി, ഭുമ്മാനി [ഭൂമാനി (ക.)] വാ യാനി വ അന്തലിക്ഖേ;

സബ്ബേവ ഭൂതാ സുമനാ ഭവന്തു, അഥോപി സക്കച്ച സുണന്തു ഭാസിതം.

൨൨൫. തസ്മാ ഹി ഭൂതാ നിസാമേഥ സബ്ബേ, മേത്തം കരോഥ മാനുസിയാ പജായ;

ദിവാ ച രത്തോ ച ഹരന്തി യേ ബലിം, തസ്മാ ഹി നേ രക്ഖഥ അപ്പമത്താ.

൨൨൬. യം കിഞ്ചി വിത്തം ഇധ വാ ഹുരം വാ, സഗ്ഗേസു വാ യം രതനം പണീതം;

ന നോ സമം അത്ഥി തഥാഗതേന, ഇദമ്പി ബുദ്ധേ രതനം പണീതം;

ഏതേന സച്ചേന സുവത്ഥി ഹോതു.

൨൨൭. ഖയം വിരാഗം അമതം പണീതം, യദജ്ഝഗാ സക്യമുനീ സമാഹിതോ;

ന തേന ധമ്മേന സമത്ഥി കിഞ്ചി, ഇദമ്പി ധമ്മേ രതനം പണീതം;

ഏതേന സച്ചേന സുവത്ഥി ഹോതു.

൨൨൮. യം ബുദ്ധസേട്ഠോ പരിവണ്ണയീ സുചിം, സമാധിമാനന്തരികഞ്ഞമാഹു;

സമാധിനാ തേന സമോ ന വിജ്ജതി, ഇദമ്പി ധമ്മേ രതനം പണീതം;

ഏതേന സച്ചേന സുവത്ഥി ഹോതു.

൨൨൯. യേ പുഗ്ഗലാ അട്ഠ സതം പസത്ഥാ, ചത്താരി ഏതാനി യുഗാനി ഹോന്തി;

തേ ദക്ഖിണേയ്യാ സുഗതസ്സ സാവകാ, ഏതേസു ദിന്നാനി മഹപ്ഫലാനി;

ഇദമ്പി സങ്ഘേ രതനം പണീതം, ഏതേന സച്ചേന സുവത്ഥി ഹോതു.

൨൩൦. യേ സുപ്പയുത്താ മനസാ ദള്ഹേന, നിക്കാമിനോ ഗോതമസാസനമ്ഹി;

തേ പത്തിപത്താ അമതം വിഗയ്ഹ, ലദ്ധാ മുധാ നിബ്ബുതിം [നിബ്ബുതി (ക.)] ഭുഞ്ജമാനാ;

ഇദമ്പി സങ്ഘേ രതനം പണീതം, ഏതേന സച്ചേന സുവത്ഥി ഹോതു.

൨൩൧. യഥിന്ദഖീലോ പഥവിസ്സിതോ [പദവിസ്സിതോ (ക. സീ.), പഠവിം സിതോ (ക. സീ. സ്യാ. കം. പീ.)] സിയാ, ചതുബ്ഭി വാതേഹി അസമ്പകമ്പിയോ;

തഥൂപമം സപ്പുരിസം വദാമി, യോ അരിയസച്ചാനി അവേച്ച പസ്സതി;

ഇദമ്പി സങ്ഘേ രതനം പണീതം, ഏതേന സച്ചേന സുവത്ഥി ഹോതു.

൨൩൨. യേ അരിയസച്ചാനി വിഭാവയന്തി, ഗമ്ഭീരപഞ്ഞേന സുദേസിതാനി;

കിഞ്ചാപി തേ ഹോന്തി ഭുസം പമത്താ, ന തേ ഭവം അട്ഠമമാദിയന്തി;

ഇദമ്പി സങ്ഘേ രതനം പണീതം, ഏതേന സച്ചേന സുവത്ഥി ഹോതു.

൨൩൩. സഹാവസ്സ ദസ്സനസമ്പദായ [സഹാവസദ്ദസ്സനസമ്പദായ (ക.)], തയസ്സു ധമ്മാ ജഹിതാ ഭവന്തി;

സക്കായദിട്ഠി വിചികിച്ഛിതഞ്ച, സീലബ്ബതം വാപി യദത്ഥി കിഞ്ചി.

൨൩൪. ചതൂഹപായേഹി ച വിപ്പമുത്തോ, ഛച്ചാഭിഠാനാനി [ഛ ചാഭിഠാനാനി (സീ. സ്യാ.)] ഭബ്ബ കാതും [അഭബ്ബോ കാതും (സീ.)];

ഇദമ്പി സങ്ഘേ രതനം പണീതം, ഏതേന സച്ചേന സുവത്ഥി ഹോതു.

൨൩൫. കിഞ്ചാപി സോ കമ്മ [കമ്മം (സീ. സ്യാ. കം. പീ.)] കരോതി പാപകം, കായേന വാചാ ഉദ ചേതസാ വാ;

അഭബ്ബ [അഭബ്ബോ (ബഹൂസു)] സോ തസ്സ പടിച്ഛദായ [പടിച്ഛാദായ (സീ.)], അഭബ്ബതാ ദിട്ഠപദസ്സ വുത്താ;

ഇദമ്പി സങ്ഘേ രതനം പണീതം, ഏതേന സച്ചേന സുവത്ഥി ഹോതു.

൨൩൬. വനപ്പഗുമ്ബേ യഥ [യഥാ (സീ. സ്യാ.)] ഫുസ്സിതഗ്ഗേ, ഗിമ്ഹാനമാസേ പഠമസ്മിം [പഠമസ്മി (?)] ഗിമ്ഹേ;

തഥൂപമം ധമ്മവരം അദേസയി [അദേസയീ (സീ.)], നിബ്ബാനഗാമിം പരമം ഹിതായ;

ഇദമ്പി ബുദ്ധേ രതനം പണീതം, ഏതേന സച്ചേന സുവത്ഥി ഹോതു.

൨൩൭. വരോ വരഞ്ഞൂ വരദോ വരാഹരോ, അനുത്തരോ ധമ്മവരം അദേസയി;

ഇദമ്പി ബുദ്ധേ രതനം പണീതം, ഏതേന സച്ചേന സുവത്ഥി ഹോതു.

൨൩൮. ഖീണം പുരാണം നവ നത്ഥി സമ്ഭവം, വിരത്തചിത്തായതികേ ഭവസ്മിം;

തേ ഖീണബീജാ അവിരൂള്ഹിഛന്ദാ, നിബ്ബന്തി ധീരാ യഥായം [യഥയം (ക.)] പദീപോ;

ഇദമ്പി സങ്ഘേ രതനം പണീതം, ഏതേന സച്ചേന സുവത്ഥി ഹോതു.

൨൩൯. യാനീധ ഭൂതാനി സമാഗതാനി, ഭുമ്മാനി വാ യാനി വ അന്തലിക്ഖേ;

തഥാഗതം ദേവമനുസ്സപൂജിതം, ബുദ്ധം നമസ്സാമ സുവത്ഥി ഹോതു.

൨൪൦. യാനീധ ഭൂതാനി സമാഗതാനി, ഭുമ്മാനി വാ യാനി വ അന്തലിക്ഖേ;

തഥാഗതം ദേവമനുസ്സപൂജിതം, ധമ്മം നമസ്സാമ സുവത്ഥി ഹോതു.

൨൪൧. യാനീധ ഭൂതാനി സമാഗതാനി, ഭുമ്മാനി വാ യാനി വ അന്തലിക്ഖേ;

തഥാഗതം ദേവമനുസ്സപൂജിതം, സങ്ഘം നമസ്സാമ സുവത്ഥി ഹോതൂതി.

രതനസുത്തം പഠമം നിട്ഠിതം.

൨. ആമഗന്ധസുത്തം

൨൪൨. ‘‘സാമാകചിങ്ഗൂലകചീനകാനി ച, പത്തപ്ഫലം മൂലഫലം ഗവിപ്ഫലം;

ധമ്മേന ലദ്ധം സതമസ്നമാനാ [സതമസമാനാ (സീ. പീ.), സതമസ്സമാനാ (സ്യാ. കം.)], ന കാമകാമാ അലികം ഭണന്തി.

൨൪൩. ‘‘യദസ്നമാനോ സുകതം സുനിട്ഠിതം, പരേഹി ദിന്നം പയതം പണീതം;

സാലീനമന്നം പരിഭുഞ്ജമാനോ, സോ ഭുഞ്ജസീ കസ്സപ ആമഗന്ധം.

൨൪൪. ‘‘ന ആമഗന്ധോ മമ കപ്പതീതി, ഇച്ചേവ ത്വം ഭാസസി ബ്രഹ്മബന്ധു;

സാലീനമന്നം പരിഭുഞ്ജമാനോ, സകുന്തമംസേഹി സുസങ്ഖതേഹി;

പുച്ഛാമി തം കസ്സപ ഏതമത്ഥം, കഥം പകാരോ തവ ആമഗന്ധോ’’.

൨൪൫. ‘‘പാണാതിപാതോ വധഛേദബന്ധനം, ഥേയ്യം മുസാവാദോ നികതിവഞ്ചനാനി ച;

അജ്ഝേനകുത്തം [അജ്ഝേന കുജ്ജം (സീ. പീ.)] പരദാരസേവനാ, ഏസാമഗന്ധോ ന ഹി മംസഭോജനം.

൨൪൬. ‘‘യേ ഇധ കാമേസു അസഞ്ഞതാ ജനാ, രസേസു ഗിദ്ധാ അസുചിഭാവമസ്സിതാ [അസുചീകമിസ്സിതാ (സീ. സ്യാ. കം. പീ.)];

നത്ഥികദിട്ഠീ വിസമാ ദുരന്നയാ, ഏസാമഗന്ധോ ന ഹി മംസഭോജനം.

൨൪൭. ‘‘യേ ലൂഖസാ ദാരുണാ പിട്ഠിമംസികാ [യേ ലൂഖരസാ ദാരുണാ പരപിട്ഠിമംസികാ (ക.)], മിത്തദ്ദുനോ നിക്കരുണാതിമാനിനോ;

അദാനസീലാ ന ച ദേന്തി കസ്സചി, ഏസാമഗന്ധോ ന ഹി മംസഭോജനം.

൨൪൮. ‘‘കോധോ മദോ ഥമ്ഭോ പച്ചുപട്ഠാപനാ [പച്ചുട്ഠാപനാ ച (സീ. സ്യാ.), പച്ചുട്ഠാപനാ (പീ.)], മായാ ഉസൂയാ ഭസ്സസമുസ്സയോ ച;

മാനാതിമാനോ ച അസബ്ഭി സന്ഥവോ, ഏസാമഗന്ധോ ന ഹി മംസഭോജനം.

൨൪൯. ‘‘യേ പാപസീലാ ഇണഘാതസൂചകാ, വോഹാരകൂടാ ഇധ പാടിരൂപികാ [പാതിരൂപികാ (?)];

നരാധമാ യേധ കരോന്തി കിബ്ബിസം, ഏസാമഗന്ധോ ന ഹി മംസഭോജനം.

൨൫൦. ‘‘യേ ഇധ പാണേസു അസഞ്ഞതാ ജനാ, പരേസമാദായ വിഹേസമുയ്യുതാ;

ദുസ്സീലലുദ്ദാ ഫരുസാ അനാദരാ, ഏസാമഗന്ധോ ന ഹി മംസഭോജനം.

൨൫൧. ‘‘ഏതേസു ഗിദ്ധാ വിരുദ്ധാതിപാതിനോ, നിച്ചുയ്യുതാ പേച്ച തമം വജന്തി യേ;

പതന്തി സത്താ നിരയം അവംസിരാ, ഏസാമഗന്ധോ ന ഹി മംസഭോജനം.

൨൫൨. ‘‘ന മച്ഛമംസാനമനാസകത്തം [ന മച്ഛമംസം ന അനാസകത്തം (സീ. അട്ഠ മൂലപാഠോ), ന മംച്ഛമംസാനാനാസകത്തം (സ്യാ. ക.)], ന നഗ്ഗിയം ന മുണ്ഡിയം ജടാജല്ലം;

ഖരാജിനാനി നാഗ്ഗിഹുത്തസ്സുപസേവനാ, യേ വാപി ലോകേ അമരാ ബഹൂ തപാ;

മന്താഹുതീ യഞ്ഞമുതൂപസേവനാ, സോധേന്തി മച്ചം അവിതിണ്ണകങ്ഖം.

൨൫൩. ‘‘യോ തേസു [സോതേസു (സീ. പീ.)] ഗുത്തോ വിദിതിന്ദ്രിയോ ചരേ, ധമ്മേ ഠിതോ അജ്ജവമദ്ദവേ രതോ;

സങ്ഗാതിഗോ സബ്ബദുക്ഖപ്പഹീനോ, ന ലിപ്പതി [ന ലിമ്പതി (സ്യാ. കം ക.)] ദിട്ഠസുതേസു ധീരോ’’.

൨൫൪. ഇച്ചേതമത്ഥം ഭഗവാ പുനപ്പുനം, അക്ഖാസി നം [തം (സീ. പീ.)] വേദയി മന്തപാരഗൂ;

ചിത്രാഹി ഗാഥാഹി മുനീ പകാസയി, നിരാമഗന്ധോ അസിതോ ദുരന്നയോ.

൨൫൫. സുത്വാന ബുദ്ധസ്സ സുഭാസിതം പദം, നിരാമഗന്ധം സബ്ബദുക്ഖപ്പനൂദനം;

നീചമനോ വന്ദി തഥാഗതസ്സ, തത്ഥേവ പബ്ബജ്ജമരോചയിത്ഥാതി.

ആമഗന്ധസുത്തം ദുതിയം നിട്ഠിതം.

൩. ഹിരിസുത്തം

൨൫൬. ഹിരിം തരന്തം വിജിഗുച്ഛമാനം, തവാഹമസ്മി [സഖാഹമസ്മി (സീ. സ്യാ. കം. പീ.)] ഇതി ഭാസമാനം;

സയ്ഹാനി കമ്മാനി അനാദിയന്തം, നേസോ മമന്തി ഇതി നം വിജഞ്ഞാ.

൨൫൭. അനന്വയം [അത്ഥന്വയം (ക.)] പിയം വാചം, യോ മിത്തേസു പകുബ്ബതി;

അകരോന്തം ഭാസമാനം, പരിജാനന്തി പണ്ഡിതാ.

൨൫൮. ന സോ മിത്തോ യോ സദാ അപ്പമത്തോ, ഭേദാസങ്കീ രന്ധമേവാനുപസ്സീ;

യസ്മിഞ്ച സേതി ഉരസീവ പുത്തോ, സ വേ മിത്തോ യോ പരേഹി അഭേജ്ജോ.

൨൫൯. പാമുജ്ജകരണം ഠാനം, പസംസാവഹനം സുഖം;

ഫലാനിസംസോ ഭാവേതി, വഹന്തോ പോരിസം ധുരം.

൨൬൦. പവിവേകരസം പിത്വാ, രസം ഉപസമസ്സ ച;

നിദ്ദരോ ഹോതി നിപ്പാപോ, ധമ്മപീതിരസം പിവന്തി.

ഹിരിസുത്തം തതിയം നിട്ഠിതം.

൪. മങ്ഗലസുത്തം

ഏവം മേ സുതം – ഏകം സമയം ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. അഥ ഖോ അഞ്ഞതരാ ദേവതാ അഭിക്കന്തായ രത്തിയാ അഭിക്കന്തവണ്ണാ കേവലകപ്പം ജേതവനം ഓഭാസേത്വാ യേന ഭഗവാ തേനുപസങ്കമി; ഉപസങ്കമിത്വാ ഭഗവന്തം അഭിവാദേത്വാ ഏകമന്തം അട്ഠാസി. ഏകമന്തം ഠിതാ ഖോ സാ ദേവതാ ഭഗവന്തം ഗാഥായ അജ്ഝഭാസി –

൨൬൧. ‘‘ബഹൂ ദേവാ മനുസ്സാ ച, മങ്ഗലാനി അചിന്തയും;

ആകങ്ഖമാനാ സോത്ഥാനം, ബ്രൂഹി മങ്ഗലമുത്തമം’’.

൨൬൨. ‘‘അസേവനാ ച ബാലാനം, പണ്ഡിതാനഞ്ച സേവനാ;

പൂജാ ച പൂജനേയ്യാനം [പൂജനീയാനം (സീ. സ്യാ. കം. പീ.)], ഏതം മങ്ഗലമുത്തമം.

൨൬൩. ‘‘പതിരൂപദേസവാസോ ച, പുബ്ബേ ച കതപുഞ്ഞതാ;

അത്തസമ്മാപണിധി [അത്തസമ്മാപണീധീ (കത്ഥചി)] ച, ഏതം മങ്ഗലമുത്തമം.

൨൬൪. ‘‘ബാഹുസച്ചഞ്ച സിപ്പഞ്ച, വിനയോ ച സുസിക്ഖിതോ;

സുഭാസിതാ ച യാ വാചാ, ഏതം മങ്ഗലമുത്തമം.

൨൬൫. ‘‘മാതാപിതു ഉപട്ഠാനം, പുത്തദാരസ്സ സങ്ഗഹോ;

അനാകുലാ ച കമ്മന്താ, ഏതം മങ്ഗലമുത്തമം.

൨൬൬. ‘‘ദാനഞ്ച ധമ്മചരിയാ ച, ഞാതകാനഞ്ച സങ്ഗഹോ;

അനവജ്ജാനി കമ്മാനി, ഏതം മങ്ഗലമുത്തമം.

൨൬൭. ‘‘ആരതീ വിരതീ പാപാ, മജ്ജപാനാ ച സംയമോ;

അപ്പമാദോ ച ധമ്മേസു, ഏതം മങ്ഗലമുത്തമം.

൨൬൮. ‘‘ഗാരവോ ച നിവാതോ ച, സന്തുട്ഠി ച കതഞ്ഞുതാ;

കാലേന ധമ്മസ്സവനം [ധമ്മസവണം (കത്ഥചി), ധമ്മസവനം (സീ. ക.)], ഏതം മങ്ഗലമുത്തമം.

൨൬൯. ‘‘ഖന്തീ ച സോവചസ്സതാ, സമണാനഞ്ച ദസ്സനം;

കാലേന ധമ്മസാകച്ഛാ, ഏതം മങ്ഗലമുത്തമം.

൨൭൦. ‘‘തപോ ച ബ്രഹ്മചരിയഞ്ച, അരിയസച്ചാന ദസ്സനം;

നിബ്ബാനസച്ഛികിരിയാ ച, ഏതം മങ്ഗലമുത്തമം.

൨൭൧. ‘‘ഫുട്ഠസ്സ ലോകധമ്മേഹി, ചിത്തം യസ്സ ന കമ്പതി;

അസോകം വിരജം ഖേമം, ഏതം മങ്ഗലമുത്തമം.

൨൭൨. ‘‘ഏതാദിസാനി കത്വാന, സബ്ബത്ഥമപരാജിതാ;

സബ്ബത്ഥ സോത്ഥിം ഗച്ഛന്തി, തം തേസം മങ്ഗലമുത്തമ’’ന്തി.

മങ്ഗലസുത്തം ചതുത്ഥം നിട്ഠിതം.

൫. സൂചിലോമസുത്തം

ഏവം മേ സുതം – ഏകം സമയം ഭഗവാ ഗയായം വിഹരതി ടങ്കിതമഞ്ചേ സൂചിലോമസ്സ യക്ഖസ്സ ഭവനേ. തേന ഖോ പന സമയേന ഖരോ ച യക്ഖോ സൂചിലോമോ ച യക്ഖോ ഭഗവതോ അവിദൂരേ അതിക്കമന്തി. അഥ ഖോ ഖരോ യക്ഖോ സൂചിലോമം യക്ഖം ഏതദവോച – ‘‘ഏസോ സമണോ’’തി. ‘‘നേസോ സമണോ, സമണകോ ഏസോ. യാവാഹം ജാനാമി [യാവ ജാനാമി (സീ. പീ.)] യദി വാ സോ സമണോ [യദി വാ സമണോ (സ്യാ.)], യദി വാ സോ സമണകോ’’തി [യദി വാ സമണകോതി (സീ. സ്യാ. പീ.)].

അഥ ഖോ സൂചിലോമോ യക്ഖോ യേന ഭഗവാ തേനുപസങ്കമി; ഉപസങ്കമിത്വാ ഭഗവതോ കായം ഉപനാമേസി. അഥ ഖോ ഭഗവാ കായം അപനാമേസി. അഥ ഖോ സൂചിലോമോ യക്ഖോ ഭഗവന്തം ഏതദവോച – ‘‘ഭായസി മം, സമണാ’’തി? ‘‘ന ഖ്വാഹം തം, ആവുസോ, ഭായാമി; അപി ച തേ സപ്ഫസ്സോ പാപകോ’’തി.

‘‘പഞ്ഹം തം, സമണ, പുച്ഛിസ്സാമി. സചേ മേ ന ബ്യാകരിസ്സസി, ചിത്തം വാ തേ ഖിപിസ്സാമി, ഹദയം വാ തേ ഫാലേസ്സാമി, പാദേസു വാ ഗഹേത്വാ പാരഗങ്ഗായ ഖിപിസ്സാമീ’’തി.

‘‘ന ഖ്വാഹം തം, ആവുസോ, പസ്സാമി സദേവകേ ലോകേ സമാരകേ സബ്രഹ്മകേ സസ്സമണബ്രാഹ്മണിയാ പജായ സദേവമനുസ്സായ യോ മേ ചിത്തം വാ ഖിപേയ്യ ഹദയം വാ ഫാലേയ്യ പാദേസു വാ ഗഹേത്വാ പാരഗങ്ഗായ ഖിപേയ്യ. അപി ച ത്വം, ആവുസോ, പുച്ഛ യദാകങ്ഖസീ’’തി. അഥ ഖോ സൂചിലോമോ യക്ഖോ ഭഗവന്തം ഗാഥായ അജ്ഝഭാസി –

൨൭൩. ‘‘രാഗോ ച ദോസോ ച കുതോനിദാനാ, അരതീ രതീ ലോമഹംസോ കുതോജാ;

കുതോ സമുട്ഠായ മനോവിതക്കാ, കുമാരകാ ധങ്കമിവോസ്സജന്തി’’.

൨൭൪. ‘‘രാഗോ ച ദോസോ ച ഇതോനിദാനാ, അരതീ രതീ ലോമഹംസോ ഇതോജാ;

ഇതോ സമുട്ഠായ മനോവിതക്കാ, കുമാരകാ ധങ്കമിവോസ്സജന്തി.

൨൭൪. ‘‘സ്നേഹജാ അത്തസമ്ഭൂതാ, നിഗ്രോധസ്സേവ ഖന്ധജാ;

പുഥൂ വിസത്താ കാമേസു, മാലുവാവ വിതതാവനേ.

൨൭൫. ‘‘യേ നം പജാനന്തി യതോനിദാനം, തേ നം വിനോദേന്തി സുണോഹി യക്ഖ;

തേ ദുത്തരം ഓഘമിമം തരന്തി, അതിണ്ണപുബ്ബം അപുനബ്ഭവായാ’’തി.

സൂചിലോമസുത്തം പഞ്ചമം നിട്ഠിതം.

൬. ധമ്മചരിയസുത്തം

൨൭൬. ധമ്മചരിയം ബ്രഹ്മചരിയം, ഏതദാഹു വസുത്തമം;

പബ്ബജിതോപി ചേ ഹോതി, അഗാരാ അനഗാരിയം.

൨൭൭. സോ ചേ മുഖരജാതികോ, വിഹേസാഭിരതോ മഗോ;

ജീവിതം തസ്സ പാപിയോ, രജം വഡ്ഢേതി അത്തനോ.

൨൭൮. കലഹാഭിരതോ ഭിക്ഖു, മോഹധമ്മേന ആവുതോ;

അക്ഖാതമ്പി ന ജാനാതി, ധമ്മം ബുദ്ധേന ദേസിതം.

൨൭൯. വിഹേസം ഭാവിതത്താനം, അവിജ്ജായ പുരക്ഖതോ;

സംകിലേസം ന ജാനാതി, മഗ്ഗം നിരയഗാമിനം.

൨൮൦. വിനിപാതം സമാപന്നോ, ഗബ്ഭാ ഗബ്ഭം തമാ തമം;

സ വേ താദിസകോ ഭിക്ഖു, പേച്ച ദുക്ഖം നിഗച്ഛതി.

൨൮൧. ഗൂഥകൂപോ യഥാ അസ്സ, സമ്പുണ്ണോ ഗണവസ്സികോ;

യോ ച ഏവരൂപോ അസ്സ, ദുബ്ബിസോധോ ഹി സാങ്ഗണോ.

൨൮൨. യം ഏവരൂപം ജാനാഥ, ഭിക്ഖവോ ഗേഹനിസ്സിതം;

പാപിച്ഛം പാപസങ്കപ്പം, പാപആചാരഗോചരം.

൨൮൩. സബ്ബേ സമഗ്ഗാ ഹുത്വാന, അഭിനിബ്ബജ്ജിയാഥ [അഭിനിബ്ബജ്ജയാഥ (സീ. പീ. അ. നി. ൮.൧൦)] നം;