൭. രാജപുത്തപേതവത്ഥു

൭൫൩. പുബ്ബേ കതാനം കമ്മാനം, വിപാകോ മഥയേ മനം;

രൂപേ സദ്ദേ രസേ ഗന്ധേ, ഫോട്ഠബ്ബേ ച മനോരമേ.

൭൫൪. നച്ചം ഗീതം രതിം ഖിഡ്ഡം, അനുഭുത്വാ അനപ്പകം;

ഉയ്യാനേ പരിചരിത്വാ, പവിസന്തോ ഗിരിബ്ബജം.

൭൫൫. ഇസിം സുനേത്ത [സുനിത (ക.)] മദ്ദക്ഖി, അത്തദന്തം സമാഹിതം;

അപ്പിച്ഛം ഹിരിസമ്പന്നം, ഉഞ്ഛേ പത്തഗതേ രതം.

൭൫൬. ഹത്ഥിക്ഖന്ധതോ ഓരുയ്ഹ, ലദ്ധാ ഭന്തേതി ചാബ്രവി;

തസ്സ പത്തം ഗഹേത്വാന, ഉച്ചം പഗ്ഗയ്ഹ ഖത്തിയോ.

൭൫൭. ഥണ്ഡിലേ പത്തം ഭിന്ദിത്വാ, ഹസമാനോ അപക്കമി;

‘‘രഞ്ഞോ കിതവസ്സാഹം പുത്തോ, കിം മം ഭിക്ഖു കരിസ്സസി’’.

൭൫൮. തസ്സ കമ്മസ്സ ഫരുസസ്സ, വിപാകോ കടുകോ അഹു;

യം രാജപുത്തോ വേദേസി, നിരയമ്ഹി സമപ്പിതോ.

൭൫൯. ഛളേവ ചതുരാസീതി, വസ്സാനി നവുതാനി ച;

ഭുസം ദുക്ഖം നിഗച്ഛിത്ഥോ, നിരയേ കതകിബ്ബിസോ.

൭൬൦. ഉത്താനോപി ച പച്ചിത്ഥ, നികുജ്ജോ വാമദക്ഖിണോ;

ഉദ്ധംപാദോ ഠിതോ ചേവ, ചിരം ബാലോ അപച്ചഥ.

൭൬൧. ബഹൂനി വസ്സസഹസ്സാനി, പൂഗാനി നഹുതാനി ച;

ഭുസം ദുക്ഖം നിഗച്ഛിത്ഥോ, നിരയേ കതകിബ്ബിസോ.

൭൬൨. ഏതാദിസം ഖോ കടുകം, അപ്പദുട്ഠപ്പദോസിനം;

പച്ചന്തി പാപകമ്മന്താ, ഇസിമാസജ്ജ സുബ്ബതം.

൭൬൩. സോ തത്ഥ ബഹുവസ്സാനി, വേദയിത്വാ ബഹും ദുഖം;

ഖുപ്പിപാസഹതോ നാമ [ഖുപ്പിപാസാഹതോ നാമ (സീ. പീ)], പേതോ ആസി തതോ ചുതോ.

൭൬൪. ഏതമാദീനവം ഞത്വാ [ദിസ്വാ (സീ.)], ഇസ്സരമദസമ്ഭവം;

പഹായ ഇസ്സരമദം, നിവാതമനുവത്തയേ.

൭൬൫. ദിട്ഠേവ ധമ്മേ പാസംസോ, യോ ബുദ്ധേസു സഗാരവോ;

കായസ്സ ഭേദാ സപ്പഞ്ഞോ, സഗ്ഗം സോ ഉപപജ്ജതീതി.

രാജപുത്തപേതവത്ഥു സത്തമം.