൮. ലോകുത്തരകഥാ

൪൩. കതമേ ധമ്മാ ലോകുത്തരാ? ചത്താരോ സതിപട്ഠാനാ, ചത്താരോ സമ്മപ്പധാനാ, ചത്താരോ ഇദ്ധിപാദാ, പഞ്ചിന്ദ്രിയാനി, പഞ്ച ബലാനി, സത്ത ബോജ്ഝങ്ഗാ, അരിയോ അട്ഠങ്ഗികോ മഗ്ഗോ, ചത്താരോ അരിയമഗ്ഗാ, ചത്താരി ച സാമഞ്ഞഫലാനി, നിബ്ബാനഞ്ച – ഇമേ ധമ്മാ ലോകുത്തരാ.

ലോകുത്തരാതി കേനട്ഠേന ലോകുത്തരാ? ലോകം തരന്തീതി – ലോകുത്തരാ. ലോകാ ഉത്തരന്തീതി – ലോകുത്തരാ. ലോകതോ ഉത്തരന്തീതി – ലോകുത്തരാ. ലോകമ്ഹാ ഉത്തരന്തീതി – ലോകുത്തരാ. ലോകം അതിക്കമന്തീതി – ലോകുത്തരാ. ലോകം സമതിക്കമന്തീതി – ലോകുത്തരാ. ലോകം സമതിക്കന്താതി – ലോകുത്തരാ. ലോകേന അതിരേകാതി – ലോകുത്തരാ. ലോകന്തം തരന്തീതി – ലോകുത്തരാ. ലോകാ നിസ്സരന്തീതി – ലോകുത്തരാ. ലോകതോ നിസ്സരന്തീതി – ലോകുത്തരാ. ലോകമ്ഹാ നിസ്സരന്തീതി – ലോകുത്തരാ. ലോകാ നിസ്സടാതി – ലോകുത്തരാ. ലോകേന നിസ്സടാതി – ലോകുത്തരാ. ലോകമ്ഹാ നിസ്സടാതി – ലോകുത്തരാ. ലോകേ ന തിട്ഠന്തീതി – ലോകുത്തരാ. ലോകസ്മിം ന തിട്ഠന്തീതി – ലോകുത്തരാ. ലോകേ ന ലിമ്പന്തീതി – ലോകുത്തരാ. ലോകേന ന ലിമ്പന്തീതി – ലോകുത്തരാ. ലോകേ അസംലിത്താതി – ലോകുത്തരാ. ലോകേന അസംലിത്താതി – ലോകുത്തരാ. ലോകേ അനുപലിത്താതി – ലോകുത്തരാ. ലോകേന അനുപലിത്താതി – ലോകുത്തരാ. ലോകേ വിപ്പമുത്താതി – ലോകുത്തരാ. ലോകേന വിപ്പമുത്താതി – ലോകുത്തരാ. ലോകാ വിപ്പമുത്താതി – ലോകുത്തരാ. ലോകതോ വിപ്പമുത്താതി – ലോകുത്തരാ. ലോകമ്ഹാ വിപ്പമുത്താതി – ലോകുത്തരാ. ലോകേ വിസഞ്ഞുത്താതി – ലോകുത്തരാ. ലോകേന വിസഞ്ഞുത്താതി – ലോകുത്തരാ. ലോകാ വിസഞ്ഞുത്താതി – ലോകുത്തരാ. ലോകസ്മിം വിസഞ്ഞുത്താതി – ലോകുത്തരാ. ലോകതോ വിസഞ്ഞുത്താതി – ലോകുത്തരാ. ലോകമ്ഹാ വിസഞ്ഞുത്താതി – ലോകുത്തരാ. ലോകാ സുജ്ഝന്തീതി – ലോകുത്തരാ. ലോകതോ സുജ്ഝന്തീതി – ലോകുത്തരാ. ലോകമ്ഹാ സുജ്ഝന്തീതി – ലോകുത്തരാ. ലോകാ വിസുജ്ഝന്തീതി – ലോകുത്തരാ. ലോകതോ വിസുജ്ഝന്തീതി – ലോകുത്തരാ. ലോകമ്ഹാ വിസുജ്ഝന്തീതി – ലോകുത്തരാ. ലോകാ വുട്ഠഹന്തീതി [ഉദ്ധരന്തീതി (ക.), ഉട്ഠഹന്തീതി (സീ. അട്ഠ.)] – ലോകുത്തരാ. ലോകതോ വുട്ഠഹന്തീതി – ലോകുത്തരാ. ലോകമ്ഹാ വുട്ഠഹന്തീതി – ലോകുത്തരാ. ലോകാ വിവട്ടന്തീതി – ലോകുത്തരാ. ലോകതോ വിവട്ടന്തീതി – ലോകുത്തരാ. ലോകമ്ഹാ വിവട്ടന്തീതി – ലോകുത്തരാ. ലോകേ ന സജ്ജന്തീതി – ലോകുത്തരാ. ലോകേ ന ഗയ്ഹന്തീതി – ലോകുത്തരാ. ലോകേ ന ബജ്ഝന്തീതി – ലോകുത്തരാ. ലോകം സമുച്ഛിന്ദന്തീതി – ലോകുത്തരാ. ലോകം സമുച്ഛിന്നത്താതി – ലോകുത്തരാ. ലോകം പടിപ്പസ്സമ്ഭേന്തീതി – ലോകുത്തരാ. ലോകം പടിപ്പസ്സമ്ഭിതത്താതി – ലോകുത്തരാ. ലോകസ്സ അപഥാതി – ലോകുത്തരാ. ലോകസ്സ അഗതീതി – ലോകുത്തരാ. ലോകസ്സ അവിസയാതി – ലോകുത്തരാ. ലോകസ്സ അസാധാരണാതി – ലോകുത്തരാ. ലോകം വമന്തീതി – ലോകുത്തരാ. ലോകം ന പച്ചാവമന്തീതി – ലോകുത്തരാ. ലോകം പജഹന്തീതി – ലോകുത്തരാ. ലോകം ന ഉപാദിയന്തീതി – ലോകുത്തരാ. ലോകം വിസിനേന്തീതി – ലോകുത്തരാ. ലോകം ന ഉസ്സിനേന്തീതി – ലോകുത്തരാ. ലോകം വിധൂപേന്തീതി – ലോകുത്തരാ. ലോകം ന സംധൂപേന്തീതി – ലോകുത്തരാ. ലോകം സമതിക്കമ്മ അഭിഭുയ്യ തിട്ഠന്തീതി – ലോകുത്തരാ.

ലോകുത്തരകഥാ നിട്ഠിതാ.