൪. മേത്താകഥാ

൨൨. സാവത്ഥിനിദാനം. ‘‘മേത്തായ, ഭിക്ഖവേ, ചേതോവിമുത്തിയാ ആസേവിതായ ഭാവിതായ ബഹുലീകതായ യാനീകതായ വത്ഥുകതായ അനുട്ഠിതായ പരിചിതായ സുസമാരദ്ധായ ഏകാദസാനിസംസാ പാടികങ്ഖാ. കതമേ ഏകാദസ? സുഖം സുപതി, സുഖം പടിബുജ്ഝതി, ന പാപകം സുപിനം പസ്സതി, മനുസ്സാനം പിയോ ഹോതി, അമനുസ്സാനം പിയോ ഹോതി, ദേവതാ രക്ഖന്തി, നാസ്സ അഗ്ഗി വാ വിസം വാ സത്ഥം വാ കമതി, തുവടം ചിത്തം സമാധിയതി, മുഖവണ്ണോ വിപ്പസീദതി, അസമ്മൂള്ഹോ കാലങ്കരോതി, ഉത്തരി [ഉത്തരിം (സ്യാ. പീ.) അ. നി. ൧൧.൧൫ പസ്സിതബ്ബാ] അപ്പടിവിജ്ഝന്തോ ബ്രഹ്മലോകൂപഗോ ഹോതി. മേത്തായ, ഭിക്ഖവേ, ചേതോവിമുത്തിയാ ആസേവിതായ ഭാവിതായ ബഹുലീകതായ യാനീകതായ വത്ഥുകതായ അനുട്ഠിതായ പരിചിതായ സുസമാരദ്ധായ – ഇമേ ഏകാദസാനിസംസാ പാടികങ്ഖാ’’.

അത്ഥി അനോധിസോ ഫരണാ മേത്താചേതോവിമുത്തി, അത്ഥി ഓധിസോ ഫരണാ മേത്താചേതോവിമുത്തി, അത്ഥി ദിസാഫരണാ മേത്താചേതോവിമുത്തി. കതിഹാകാരേഹി അനോധിസോ ഫരണാ മേത്താചേതോവിമുത്തി, കതിഹാകാരേഹി ഓധിസോ ഫരണാ മേത്താചേതോവിമുത്തി, കതിഹാകാരേഹി ദിസാഫരണാ മേത്താചേതോവിമുത്തി? പഞ്ചഹാകാരേഹി അനോധിസോ ഫരണാ മേത്താചേതോവിമുത്തി, സത്തഹാകാരേഹി ഓധിസോ ഫരണാ മേത്താചേതോവിമുത്തി, ദസഹാകാരേഹി ദിസാഫരണാ മേത്താചേതോവിമുത്തി.

കതമേഹി പഞ്ചഹാകാരേഹി അനോധിസോ ഫരണാ മേത്താചേതോവിമുത്തി? സബ്ബേ സത്താ അവേരാ അബ്യാപജ്ജാ [അബ്യാപജ്ഝാ (സ്യാ.)] അനീഘാ സുഖീ അത്താനം പരിഹരന്തു. സബ്ബേ പാണാ…പേ… സബ്ബേ ഭൂതാ…പേ… സബ്ബേ പുഗ്ഗലാ…പേ… സബ്ബേ അത്തഭാവപരിയാപന്നാ അവേരാ അബ്യാപജ്ജാ അനീഘാ സുഖീ അത്താനം പരിഹരന്തൂതി. ഇമേഹി പഞ്ചഹാകാരേഹി അനോധിസോ ഫരണാ മേത്താചേതോവിമുത്തി.

കതമേഹി സത്തഹാകാരേഹി ഓധിസോ ഫരണാ മേത്താചേതോവിമുത്തി? സബ്ബാ ഇത്ഥിയോ അവേരാ അബ്യാപജ്ജാ അനീഘാ സുഖീ അത്താനം പരിഹരന്തു. സബ്ബേ പുരിസാ…പേ… സബ്ബേ അരിയാ…പേ… സബ്ബേ അനരിയാ…പേ… സബ്ബേ ദേവാ…പേ… സബ്ബേ മനുസ്സാ…പേ… സബ്ബേ വിനിപാതികാ അവേരാ അബ്യാപജ്ജാ അനീഘാ സുഖീ അത്താനം പരിഹരന്തൂതി. ഇമേഹി സത്തഹാകാരേഹി ഓധിസോ ഫരണാ മേത്താചേതോവിമുത്തി.

കതമേഹി ദസഹാകാരേഹി ദിസാഫരണാ മേത്താചേതോവിമുത്തി? സബ്ബേ പുരത്ഥിമായ ദിസായ സത്താ അവേരാ അബ്യാപജ്ജാ അനീഘാ സുഖീ അത്താനം പരിഹരന്തു. സബ്ബേ പച്ഛിമായ ദിസായ സത്താ…പേ… സബ്ബേ ഉത്തരായ ദിസായ സത്താ…പേ… സബ്ബേ ദക്ഖിണായ ദിസായ സത്താ…പേ… സബ്ബേ പുരത്ഥിമായ അനുദിസായ സത്താ…പേ… സബ്ബേ പച്ഛിമായ അനുദിസായ സത്താ…പേ… സബ്ബേ ഉത്തരായ അനുദിസായ സത്താ…പേ… സബ്ബേ ദക്ഖിണായ അനുദിസായ സത്താ…പേ… സബ്ബേ ഹേട്ഠിമായ ദിസായ സത്താ…പേ… സബ്ബേ ഉപരിമായ ദിസായ സത്താ അവേരാ അബ്യാപജ്ജാ അനീഘാ സുഖീ അത്താനം പരിഹരന്തു. സബ്ബേ പുരത്ഥിമായ ദിസായ പാണാ…പേ… ഭൂതാ… പുഗ്ഗലാ… അത്തഭാവപരിയാപന്നാ… സബ്ബാ ഇത്ഥിയോ… സബ്ബേ പുരിസാ… സബ്ബേ അരിയാ… സബ്ബേ അനരിയാ… സബ്ബേ ദേവാ… സബ്ബേ മനുസ്സാ… സബ്ബേ വിനിപാതികാ അവേരാ അബ്യാപജ്ജാ അനീഘാ സുഖീ അത്താനം പരിഹരന്തു. സബ്ബേ പച്ഛിമായ ദിസായ വിനിപാതികാ…പേ… സബ്ബേ ഉത്തരായ ദിസായ വിനിപാതികാ… സബ്ബേ ദക്ഖിണായ ദിസായ വിനിപാതികാ… സബ്ബേ പുരത്ഥിമായ അനുദിസായ വിനിപാതികാ… സബ്ബേ പച്ഛിമായ അനുദിസായ വിനിപാതികാ… സബ്ബേ ഉത്തരായ അനുദിസായ വിനിപാതികാ… സബ്ബേ ദക്ഖിണായ അനുദിസായ വിനിപാതികാ… സബ്ബേ ഹേട്ഠിമായ ദിസായ വിനിപാതികാ… സബ്ബേ ഉപരിമായ ദിസായ വിനിപാതികാ അവേരാ അബ്യാപജ്ജാ അനീഘാ സുഖീ അത്താനം പരിഹരന്തൂതി. ഇമേഹി ദസഹാകാരേഹി ദിസാഫരണാ മേത്താചേതോവിമുത്തി.

൧. ഇന്ദ്രിയവാരോ

൨൩. സബ്ബേസം സത്താനം പീളനം വജ്ജേത്വാ അപീളനായ, ഉപഘാതം വജ്ജേത്വാ അനുപഘാതേന, സന്താപം വജ്ജേത്വാ അസന്താപേന, പരിയാദാനം വജ്ജേത്വാ അപരിയാദാനേന, വിഹേസം വജ്ജേത്വാ അവിഹേസായ, സബ്ബേ സത്താ അവേരിനോ ഹോന്തു മാ വേരിനോ, സുഖിനോ ഹോന്തു മാ ദുക്ഖിനോ, സുഖിതത്താ ഹോന്തു മാ ദുക്ഖിതത്താതി – ഇമേഹി അട്ഠഹാകാരേഹി സബ്ബേ സത്തേ മേത്തായതീതി – മേത്താ. തം ധമ്മം ചേതയതീതി – ചേതോ. സബ്ബബ്യാപാദപരിയുട്ഠാനേഹി വിമുച്ചതീതി – വിമുത്തി. മേത്താ ച ചേതോ ച വിമുത്തി ചാതി – മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – സദ്ധായ അധിമുച്ചതി. സദ്ധിന്ദ്രിയപരിഭാവിതാ ഹോതി മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – വീരിയം പഗ്ഗണ്ഹാതി. വീരിയിന്ദ്രിയപരിഭാവിതാ ഹോതി മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – സതിം ഉപട്ഠാപേതി. സതിന്ദ്രിയപരിഭാവിതാ ഹോതി മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – ചിത്തം സമാദഹതി. സമാധിന്ദ്രിയപരിഭാവിതാ ഹോതി മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – പഞ്ഞായ പജാനാതി. പഞ്ഞിന്ദ്രിയപരിഭാവിതാ ഹോതി മേത്താചേതോവിമുത്തി.

ഇമാനി പഞ്ചിന്ദ്രിയാനി മേത്തായ ചേതോവിമുത്തിയാ ആസേവനാ ഹോന്തി. ഇമേഹി പഞ്ചഹി ഇന്ദ്രിയേഹി മേത്താചേതോവിമുത്തി ആസേവീയതി. ഇമാനി പഞ്ചിന്ദ്രിയാനി മേത്തായ ചേതോവിമുത്തിയാ ഭാവനാ ഹോന്തി. ഇമേഹി പഞ്ചഹി ഇന്ദ്രിയേഹി മേത്താചേതോവിമുത്തി ഭാവീയതി. ഇമാനി പഞ്ചിന്ദ്രിയാനി മേത്തായ ചേതോവിമുത്തിയാ ബഹുലീകതാ ഹോന്തി. ഇമേഹി പഞ്ചഹി ഇന്ദ്രിയേഹി മേത്താചേതോവിമുത്തി ബഹുലീകരീയതി. ഇമാനി പഞ്ചിന്ദ്രിയാനി മേത്തായ ചേതോവിമുത്തിയാ അലങ്കാരാ ഹോന്തി. ഇമേഹി പഞ്ചഹി ഇന്ദ്രിയേഹി മേത്താചേതോവിമുത്തി സ്വാലങ്കതാ ഹോതി. ഇമാനി പഞ്ചിന്ദ്രിയാനി മേത്തായ ചേതോവിമുത്തിയാ പരിക്ഖാരാ ഹോന്തി. ഇമേഹി പഞ്ചഹി ഇന്ദ്രിയേഹി മേത്താചേതോവിമുത്തി സുപരിക്ഖതാ ഹോതി. ഇമാനി പഞ്ചിന്ദ്രിയാനി മേത്തായ ചേതോവിമുത്തിയാ പരിവാരാ ഹോന്തി. ഇമേഹി പഞ്ചഹി ഇന്ദ്രിയേഹി മേത്താചേതോവിമുത്തി സുപരിവുതാ ഹോതി. ഇമാനി പഞ്ചിന്ദ്രിയാനി മേത്തായ ചേതോവിമുത്തിയാ ആസേവനാ ഹോന്തി, ഭാവനാ ഹോന്തി, ബഹുലീകതാ ഹോന്തി, അലങ്കാരാ ഹോന്തി, പരിക്ഖാരാ ഹോന്തി, പരിവാരാ ഹോന്തി, പാരിപൂരീ ഹോന്തി, സഹഗതാ ഹോന്തി, സഹജാതാ ഹോന്തി, സംസട്ഠാ ഹോന്തി, സമ്പയുത്താ ഹോന്തി, പക്ഖന്ദനാ ഹോന്തി, പസീദനാ [സംസീദനാ (ക. സീ. അട്ഠ.)] ഹോന്തി, സന്തിട്ഠനാ ഹോന്തി, വിമുച്ചനാ ഹോന്തി, ‘‘ഏതം സന്ത’’ന്തി ഫസ്സനാ ഹോന്തി, യാനീകതാ ഹോന്തി, വത്ഥുകതാ ഹോന്തി, അനുട്ഠിതാ ഹോന്തി, പരിചിതാ ഹോന്തി, സുസമാരദ്ധാ ഹോന്തി, സുഭാവിതാ ഹോന്തി, സ്വാധിട്ഠിതാ ഹോന്തി, സുസമുഗ്ഗതാ ഹോന്തി, സുവിമുത്താ ഹോന്തി, നിബ്ബത്തേന്തി ജോതേന്തി പതാപേന്തി.

൨. ബലവാരോ

൨൪. സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – അസ്സദ്ധിയേ ന കമ്പതി. സദ്ധാബലപരിഭാവിതാ ഹോതി മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – കോസജ്ജേ ന കമ്പതി. വീരിയബലപരിഭാവിതാ ഹോതി മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – പമാദേ ന കമ്പതി. സതിബലപരിഭാവിതാ ഹോതി മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – ഉദ്ധച്ചേ ന കമ്പതി. സമാധിബലപരിഭാവിതാ ഹോതി മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – അവിജ്ജായ ന കമ്പതി. പഞ്ഞാബലപരിഭാവിതാ ഹോതി മേത്താചേതോവിമുത്തി.

ഇമാനി പഞ്ച ബലാനി മേത്തായ ചേതോവിമുത്തിയാ ആസേവനാ ഹോന്തി. ഇമേഹി പഞ്ചഹി ബലേഹി മേത്താചേതോവിമുത്തി ആസേവീയതി. ഇമാനി പഞ്ച ബലാനി മേത്തായ ചേതോവിമുത്തിയാ ഭാവനാ ഹോന്തി. ഇമേഹി പഞ്ചഹി ബലേഹി മേത്താചേതോവിമുത്തി ഭാവീയതി. ഇമാനി പഞ്ച ബലാനി മേത്തായ ചേതോവിമുത്തിയാ ബഹുലീകതാ ഹോന്തി. ഇമേഹി പഞ്ചഹി ബലേഹി മേത്താചേതോവിമുത്തി ബഹുലീകരീയതി. ഇമാനി പഞ്ച ബലാനി മേത്തായ ചേതോവിമുത്തിയാ അലങ്കാരാ ഹോന്തി. ഇമേഹി പഞ്ചഹി ബലേഹി മേത്താചേതോവിമുത്തി സ്വാലങ്കതാ ഹോതി. ഇമാനി പഞ്ച ബലാനി മേത്തായ ചേതോവിമുത്തിയാ പരിക്ഖാരാ ഹോന്തി. ഇമേഹി പഞ്ചഹി ബലേഹി മേത്താചേതോവിമുത്തി സുപരിക്ഖതാ ഹോതി. ഇമാനി പഞ്ച ബലാനി മേത്തായ ചേതോവിമുത്തിയാ പരിവാരാ ഹോന്തി. ഇമേഹി പഞ്ചഹി ബലേഹി മേത്താചേതോവിമുത്തി സുപരിവുതാ ഹോതി. ഇമാനി പഞ്ച ബലാനി മേത്തായ ചേതോവിമുത്തിയാ ആസേവനാ ഹോന്തി, ഭാവനാ ഹോന്തി, ബഹുലീകതാ ഹോന്തി, അലങ്കാരാ ഹോന്തി, പരിക്ഖാരാ ഹോന്തി, പരിവാരാ ഹോന്തി, പാരിപൂരീ ഹോന്തി, സഹഗതാ ഹോന്തി, സഹജാതാ ഹോന്തി, സംസട്ഠാ ഹോന്തി, സമ്പയുത്താ ഹോന്തി, പക്ഖന്ദനാ ഹോന്തി, പസീദനാ ഹോന്തി, സന്തിട്ഠനാ ഹോന്തി, വിമുച്ചനാ ഹോന്തി, ‘‘ഏതം സന്ത’’ന്തി ഫസ്സനാ ഹോന്തി, യാനീകതാ ഹോന്തി, വത്ഥുകതാ ഹോന്തി, അനുട്ഠിതാ ഹോന്തി, പരിചിതാ ഹോന്തി, സുസമാരദ്ധാ ഹോന്തി, സുഭാവിതാ ഹോന്തി, സ്വാധിട്ഠിതാ ഹോന്തി, സുസമുഗ്ഗതാ ഹോന്തി, സുവിമുത്താ ഹോന്തി നിബ്ബത്തേന്തി ജോതേന്തി പതാപേന്തി.

൩. ബോജ്ഝങ്ഗവാരോ

൨൫. സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – സതിം ഉപട്ഠാപേതി. സതിസമ്ബോജ്ഝങ്ഗപരിഭാവിതാ ഹോതി മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – പഞ്ഞായ പവിചിനാതി. ധമ്മവിചയസമ്ബോജ്ഝങ്ഗപരിഭാവിതാ ഹോതി മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – വീരിയം പഗ്ഗണ്ഹാതി. വീരിയസമ്ബോജ്ഝങ്ഗപരിഭാവിതാ ഹോതി മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – പരിളാഹം പടിപ്പസ്സമ്ഭേതി. പീതിസമ്ബോജ്ഝങ്ഗപരിഭാവിതാ ഹോതി മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – ദുട്ഠുല്ലം പടിപ്പസ്സമ്ഭേതി. പസ്സദ്ധിസമ്ബോജ്ഝങ്ഗപരിഭാവിതാ ഹോതി മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – ചിത്തം സമാദഹതി. സമാധിസമ്ബോജ്ഝങ്ഗപരിഭാവിതാ ഹോതി മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – ഞാണേന കിലേസേ പടിസങ്ഖാതി. ഉപേക്ഖാസമ്ബോജ്ഝങ്ഗപരിഭാവിതാ ഹോതി മേത്താചേതോവിമുത്തി.

ഇമേ സത്ത ബോജ്ഝങ്ഗാ മേത്തായ ചേതോവിമുത്തിയാ ആസേവനാ ഹോന്തി. ഇമേഹി സത്തഹി ബോജ്ഝങ്ഗേഹി മേത്താചേതോവിമുത്തി ആസേവീയതി. ഇമേ സത്ത ബോജ്ഝങ്ഗാ മേത്തായ ചേതോവിമുത്തിയാ ഭാവനാ ഹോന്തി. ഇമേഹി സത്തഹി ബോജ്ഝങ്ഗേഹി മേത്താചേതോവിമുത്തി ഭാവീയതി. ഇമേ സത്ത ബോജ്ഝങ്ഗാ മേത്തായ ചേതോവിമുത്തിയാ ബഹുലീകതാ ഹോന്തി. ഇമേഹി സത്തഹി ബോജ്ഝങ്ഗേഹി മേത്താചേതോവിമുത്തി ബഹുലീകരീയതി. ഇമേ സത്ത ബോജ്ഝങ്ഗാ മേത്തായ ചേതോവിമുത്തിയാ അലങ്കാരാ ഹോന്തി. ഇമേഹി സത്തഹി ബോജ്ഝങ്ഗേഹി മേത്താചേതോവിമുത്തി സ്വാലങ്കതാ ഹോതി. ഇമേ സത്ത ബോജ്ഝങ്ഗാ മേത്തായ ചേതോവിമുത്തിയാ പരിക്ഖാരാ ഹോന്തി. ഇമേഹി സത്തഹി ബോജ്ഝങ്ഗേഹി മേത്താചേതോവിമുത്തി സുപരിക്ഖതാ ഹോതി. ഇമേ സത്ത ബോജ്ഝങ്ഗാ മേത്തായ ചേതോവിമുത്തിയാ പരിവാരാ ഹോന്തി. ഇമേഹി സത്തഹി ബോജ്ഝങ്ഗേഹി മേത്താചേതോവിമുത്തി സുപരിവുതാ ഹോതി. ഇമേ സത്ത ബോജ്ഝങ്ഗാ മേത്തായ ചേതോവിമുത്തിയാ ആസേവനാ ഹോന്തി, ഭാവനാ ഹോന്തി, ബഹുലീകതാ ഹോന്തി, അലങ്കാരാ ഹോന്തി, പരിക്ഖാരാ ഹോന്തി, പരിവാരാ ഹോന്തി, പാരിപൂരീ ഹോന്തി, സഹഗതാ ഹോന്തി, സഹജാതാ ഹോന്തി, സംസട്ഠാ ഹോന്തി, സമ്പയുത്താ ഹോന്തി, പക്ഖന്ദനാ ഹോന്തി, പസീദനാ ഹോന്തി, സന്തിട്ഠനാ ഹോന്തി, വിമുച്ചനാ ഹോന്തി, ‘‘ഏതം സന്ത’’ന്തി ഫസ്സനാ ഹോന്തി, യാനീകതാ ഹോന്തി, വത്ഥുകതാ ഹോന്തി, അനുട്ഠിതാ ഹോന്തി, പരിചിതാ ഹോന്തി, സുസമാരദ്ധാ ഹോന്തി, സുഭാവിതാ ഹോന്തി, സ്വാധിട്ഠിതാ ഹോന്തി, സുസമുഗ്ഗതാ ഹോന്തി, സുവിമുത്താ ഹോന്തി, നിബ്ബത്തേന്തി ജോതേന്തി പതാപേന്തി.

൪. മഗ്ഗങ്ഗവാരോ

൨൬. സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – സമ്മാ പസ്സതി. സമ്മാദിട്ഠിപരിഭാവിതാ ഹോതി മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – സമ്മാ അഭിനിരോപേതി. സമ്മാസങ്കപ്പപരിഭാവിതാ ഹോതി മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – സമ്മാ പരിഗ്ഗണ്ഹാതി. സമ്മാവാചാപരിഭാവിതാ ഹോതി മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – സമ്മാ സമുട്ഠാപേതി. സമ്മാകമ്മന്തപരിഭാവിതാ ഹോതി മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – സമ്മാ വോദാപേതി. സമ്മാആജീവപരിഭാവിതാ ഹോതി മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – സമ്മാ പഗ്ഗണ്ഹാതി. സമ്മാവായാമപരിഭാവിതാ ഹോതി മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – സമ്മാ ഉപട്ഠാപേതി. സമ്മാസതിപരിഭാവിതാ ഹോതി മേത്താചേതോവിമുത്തി.

സബ്ബേ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – സമ്മാ സമാദഹതി. സമ്മാസമാധിപരിഭാവിതാ ഹോതി മേത്താചേതോവിമുത്തി.

ഇമേ അട്ഠ മഗ്ഗങ്ഗാ മേത്തായ ചേതോവിമുത്തിയാ ആസേവനാ ഹോന്തി. ഇമേഹി അട്ഠഹി മഗ്ഗങ്ഗേഹി മേത്താചേതോവിമുത്തി ആസേവീയതി. ഇമേ അട്ഠ മഗ്ഗങ്ഗാ മേത്തായ ചേതോവിമുത്തിയാ ഭാവനാ ഹോന്തി. ഇമേഹി അട്ഠഹി മഗ്ഗങ്ഗേഹി മേത്താചേതോവിമുത്തി ഭാവീയതി. ഇമേ അട്ഠ മഗ്ഗങ്ഗാ മേത്തായ ചേതോവിമുത്തിയാ ബഹുലീകതാ ഹോന്തി. ഇമേഹി അട്ഠഹി മഗ്ഗങ്ഗേഹി മേത്താചേതോവിമുത്തി ബഹുലീകരീയതി. ഇമേ അട്ഠ മഗ്ഗങ്ഗാ മേത്തായ ചേതോവിമുത്തിയാ അലങ്കാരാ ഹോന്തി. ഇമേഹി അട്ഠഹി മഗ്ഗങ്ഗേഹി മേത്താചേതോവിമുത്തി സ്വാലങ്കതാ ഹോന്തി. ഇമേ അട്ഠ മഗ്ഗങ്ഗാ മേത്തായ ചേതോവിമുത്തിയാ പരിക്ഖാരാ ഹോന്തി. ഇമേഹി അട്ഠഹി മഗ്ഗങ്ഗേഹി മേത്താചേതോവിമുത്തി സുപരിക്ഖതാ ഹോതി. ഇമേ അട്ഠ മഗ്ഗങ്ഗാ മേത്തായ ചേതോവിമുത്തിയാ പരിവാരാ ഹോന്തി. ഇമേഹി അട്ഠഹി മഗ്ഗങ്ഗേഹി മേത്താചേതോവിമുത്തി സുപരിവുതാ ഹോതി. ഇമേ അട്ഠ മഗ്ഗങ്ഗാ മേത്തായ ചേതോവിമുത്തിയാ ആസേവനാ ഹോന്തി, ഭാവനാ ഹോന്തി, ബഹുലീകതാ ഹോന്തി, അലങ്കാരാ ഹോന്തി, പരിക്ഖാരാ ഹോന്തി, പരിവാരാ ഹോന്തി, പാരിപൂരീ ഹോന്തി, സഹഗതാ ഹോന്തി, സഹജാതാ ഹോന്തി, സംസട്ഠാ ഹോന്തി, സമ്പയുത്താ ഹോന്തി, പക്ഖന്ദനാ ഹോന്തി, പസീദനാ ഹോന്തി, സന്തിട്ഠനാ ഹോന്തി, വിമുച്ചനാ ഹോന്തി, ‘‘ഏതം സന്ത’’ന്തി ഫസ്സനാ ഹോന്തി, യാനീകതാ ഹോന്തി, വത്ഥുകതാ ഹോന്തി, അനുട്ഠിതാ ഹോന്തി, പരിചിതാ ഹോന്തി, സുസമാരദ്ധാ ഹോന്തി, സുഭാവിതാ ഹോന്തി, സ്വാധിട്ഠിതാ ഹോന്തി, സുസമുഗ്ഗതാ ഹോന്തി, സുവിമുത്താ ഹോന്തി നിബ്ബത്തേന്തി ജോതേന്തി പതാപേന്തി.

൨൭. സബ്ബേസം പാണാനം…പേ… സബ്ബേസം ഭൂതാനം… സബ്ബേസം പുഗ്ഗലാനം… സബ്ബേസം അത്തഭാവപരിയാപന്നാനം… സബ്ബാസം ഇത്ഥീനം… സബ്ബേസം പുരിസാനം… സബ്ബേസം അരിയാനം… സബ്ബേസം അനരിയാനം… സബ്ബേസം ദേവാനം… സബ്ബേസം മനുസ്സാനം… സബ്ബേസം വിനിപാതികാനം പീളനം വജ്ജേത്വാ അപീളനായ, ഉപഘാതം വജ്ജേത്വാ അനുപഘാതേന, സന്താപം വജ്ജേത്വാ അസന്താപേന, പരിയാദാനം വജ്ജേത്വാ അപരിയാദാനേന, വിഹേസം വജ്ജേത്വാ അവിഹേസായ, സബ്ബേ വിനിപാതികാ അവേരിനോ ഹോന്തു മാ വേരിനോ, സുഖിനോ ഹോന്തു മാ ദുക്ഖിനോ, സുഖിതത്താ ഹോന്തു മാ ദുക്ഖിതത്താതി – ഇമേഹി അട്ഠഹാകാരേഹി സബ്ബേ വിനിപാതികേ മേത്തായതീതി – മേത്താ. തം ധമ്മം ചേതയതീതി – ചേതോ. സബ്ബബ്യാപാദപരിയുട്ഠാനേഹി വിമുച്ചതീതി – വിമുത്തി. മേത്താ ച ചേതോ ച വിമുത്തി ചാതി – മേത്താചേതോവിമുത്തി.

സബ്ബേ വിനിപാതികാ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – സദ്ധായ അധിമുച്ചതി. സദ്ധിന്ദ്രിയപരിഭാവിതാ ഹോതി മേത്താചേതോവിമുത്തി…പേ… നിബ്ബത്തേന്തി ജോതേന്തി പതാപേന്തി.

സബ്ബേസം പുരത്ഥിമായ ദിസായ സത്താനം…പേ… സബ്ബേസം പച്ഛിമായ ദിസായ സത്താനം… സബ്ബേസം ഉത്തരായ ദിസായ സത്താനം… സബ്ബേസം ദക്ഖിണായ ദിസായ സത്താനം… സബ്ബേസം പുരത്ഥിമായ അനുദിസായ സത്താനം… സബ്ബേസം പച്ഛിമായ അനുദിസായ സത്താനം… സബ്ബേസം ഉത്തരായ അനുദിസായ സത്താനം… സബ്ബേസം ദക്ഖിണായ അനുദിസായ സത്താനം… സബ്ബേസം ഹേട്ഠിമായ ദിസായ സത്താനം… സബ്ബേസം ഉപരിമായ ദിസായ സത്താനം പീളനം വജ്ജേത്വാ അപീളനായ, ഉപഘാതം വജ്ജേത്വാ അനുപഘാതേന, സന്താപം വജ്ജേത്വാ അസന്താപേന, പരിയാദാനം വജ്ജേത്വാ അപരിയാദാനേന, വിഹേസം വജ്ജേത്വാ അവിഹേസായ, സബ്ബേ ഉപരിമായ ദിസായ സത്താ അവേരിനോ ഹോന്തു മാ വേരിനോ, സുഖിനോ ഹോന്തു മാ ദുക്ഖിനോ, സുഖിതത്താ ഹോന്തു മാ ദുക്ഖിതത്താതി – ഇമേഹി അട്ഠഹാകാരേഹി സബ്ബേ ഉപരിമായ ദിസായ സത്തേ മേത്തായതീതി – മേത്താ. തം ധമ്മം ചേതയതീതി – ചേതോ. സബ്ബബ്യാപാദപരിയുട്ഠാനേഹി വിമുച്ചതീതി – വിമുത്തി. മേത്താ ച ചേതോ ച വിമുത്തി ചാതി – മേത്താചേതോവിമുത്തി.

സബ്ബേ ഉപരിമായ ദിസായ സത്താ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – സദ്ധായ അധിമുച്ചതി. സദ്ധിന്ദ്രിയപരിഭാവിതാ ഹോതി മേത്താചേതോവിമുത്തി…പേ… നിബ്ബത്തേന്തി ജോതേന്തി പതാപേന്തി.

സബ്ബേസം പുരത്ഥിമായ ദിസായ പാണാനം…പേ… ഭൂതാനം… പുഗ്ഗലാനം അത്തഭാവപരിയാപന്നാനം… സബ്ബാസം ഇത്ഥീനം… സബ്ബേസം പുരിസാനം… സബ്ബേസം അരിയാനം… സബ്ബേസം അനരിയാനം… സബ്ബേസം ദേവാനം… സബ്ബേസം മനുസ്സാനം… സബ്ബേസം വിനിപാതികാനം… സബ്ബേസം പച്ഛിമായ ദിസായ വിനിപാതികാനം… സബ്ബേസം ഉത്തരായ ദിസായ വിനിപാതികാനം… സബ്ബേസം ദക്ഖിണായ ദിസായ വിനിപാതികാനം… സബ്ബേസം പുരത്ഥിമായ അനുദിസായ വിനിപാതികാനം… സബ്ബേസം പച്ഛിമായ അനുദിസായ വിനിപാതികാനം… സബ്ബേസം ഉത്തരായ അനുദിസായ വിനിപാതികാനം… സബ്ബേസം ദക്ഖിണായ അനുദിസായ വിനിപാതികാനം… സബ്ബേസം ഹേട്ഠിമായ ദിസായ വിനിപാതികാനം… സബ്ബേസം ഉപരിമായ ദിസായ വിനിപാതികാനം പീളനം വജ്ജേത്വാ അപീളനായ, ഉപഘാതം വജ്ജേത്വാ അനുപഘാതേന, സന്താപം വജ്ജേത്വാ അസന്താപേന, പരിയാദാനം വജ്ജേത്വാ അപരിയാദാനേന, വിഹേസം വജ്ജേത്വാ അവിഹേസായ, സബ്ബേ ഉപരിമായ ദിസായ വിനിപാതികാ അവേരിനോ ഹോന്തു മാ വേരിനോ, സുഖിനോ ഹോന്തു മാ ദുക്ഖിനോ, സുഖിതത്താ ഹോന്തു മാ ദുക്ഖിതത്താതി – ഇമേഹി അട്ഠഹാകാരേഹി സബ്ബേ ഉപരിമായ ദിസായ വിനിപാതികേ മേത്തായതീതി – മേത്താ. തം ധമ്മം ചേതയതീതി – ചേതോ. സബ്ബബ്യാപാദപരിയുട്ഠാനേഹി വിമുച്ചതീതി – വിമുത്തി. മേത്താ ച ചേതോ ച വിമുത്തി ചാതി – മേത്താചേതോവിമുത്തി.

സബ്ബേ ഉപരിമായ ദിസായ വിനിപാതികാ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – സദ്ധായ അധിമുച്ചതി. സദ്ധിന്ദ്രിയപരിഭാവിതാ ഹോതി മേത്താചേതോവിമുത്തി.

സബ്ബേ ഉപരിമായ ദിസായ വിനിപാതികാ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – വീരിയം പഗ്ഗണ്ഹാതി. വീരിയിന്ദ്രിയപരിഭാവിതാ ഹോതി മേത്താചേതോവിമുത്തി.

സതിം ഉപട്ഠാപേതി. സതിന്ദ്രിയപരിഭാവിതാ ഹോതി മേത്താചേതോവിമുത്തി. ചിത്തം സമാദഹതി. സമാധിന്ദ്രിയപരിഭാവിതാ ഹോതി മേത്താചേതോവിമുത്തി. പഞ്ഞായ പജാനാതി. പഞ്ഞിന്ദ്രിയപരിഭാവിതാ ഹോതി മേത്താചേതോവിമുത്തി.

ഇമാനി പഞ്ചിന്ദ്രിയാനി മേത്തായ ചേതോവിമുത്തിയാ ആസേവനാ ഹോന്തി. ഇമേഹി പഞ്ചഹി ഇന്ദ്രിയേഹി മേത്താചേതോവിമുത്തി ആസേവീയതി…പേ… നിബ്ബത്തേന്തി ജോതേന്തി പതാപേന്തി.

സബ്ബേ ഉപരിമായ ദിസായ വിനിപാതികാ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – അസ്സദ്ധിയേ ന കമ്പതി. സദ്ധാബലപരിഭാവിതാ ഹോതി മേത്താചേതോവിമുത്തി. കോസജ്ജേ ന കമ്പതി. വീരിയബലപരിഭാവിതാ ഹോതി മേത്താചേതോവിമുത്തി. പമാദേ ന കമ്പതി. സതിബലപരിഭാവിതാ ഹോതി മേത്താചേതോവിമുത്തി. ഉദ്ധച്ചേ ന കമ്പതി. സമാധിബലപരിഭാവിതാ ഹോതി മേത്താചേതോവിമുത്തി. അവിജ്ജായ ന കമ്പതി. പഞ്ഞാബലപരിഭാവിതാ ഹോതി മേത്താചേതോവിമുത്തി.

ഇമാനി പഞ്ച ബലാനി മേത്തായ ചേതോവിമുത്തിയാ ആസേവനാ ഹോന്തി. ഇമേഹി പഞ്ചഹി ബലേഹി മേത്താചേതോവിമുത്തി ആസേവീയതി…പേ… നിബ്ബത്തേന്തി ജോതേന്തി പതാപേന്തി.

സബ്ബേ ഉപരിമായ ദിസായ വിനിപാതികാ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – സതിം ഉപട്ഠാപേതി. സതിസമ്ബോജ്ഝങ്ഗപരിഭാവിതാ ഹോതി മേത്താചേതോവിമുത്തി.

പഞ്ഞായ പവിചിനാതി. ധമ്മവിചയസമ്ബോജ്ഝങ്ഗപരിഭാവിതാ ഹോതി മേത്താചേതോവിമുത്തി. വീരിയം പഗ്ഗണ്ഹാതി. വീരിയസമ്ബോജ്ഝങ്ഗപരിഭാവിതാ ഹോതി മേത്താചേതോവിമുത്തി. പരിളാഹം പടിപ്പസ്സമ്ഭേതി. പീതിസമ്ബോജ്ഝങ്ഗപരിഭാവിതാ ഹോതി മേത്താചേതോവിമുത്തി. ദുട്ഠുല്ലം പടിപ്പസ്സമ്ഭേതി. പസ്സദ്ധിസമ്ബോജ്ഝങ്ഗപരിഭാവിതാ ഹോതി മേത്താചേതോവിമുത്തി. ചിത്തം സമാദഹതി. സമാധിസമ്ബോജ്ഝങ്ഗപരിഭാവിതാ ഹോതി മേത്താചേതോവിമുത്തി. ഞാണേന കിലേസേ പടിസങ്ഖാതി. ഉപേക്ഖാസമ്ബോജ്ഝങ്ഗപരിഭാവിതാ ഹോതി മേത്താചേതോവിമുത്തി.

ഇമേ സത്ത ബോജ്ഝങ്ഗാ മേത്തായ ചേതോവിമുത്തിയാ ആസേവനാ ഹോന്തി. ഇമേഹി സത്തഹി ബോജ്ഝങ്ഗേഹി മേത്താചേതോവിമുത്തി ആസേവീയതി…പേ… നിബ്ബത്തേന്തി ജോതേന്തി പതാപേന്തി.

സബ്ബേ ഉപരിമായ ദിസായ വിനിപാതികാ അവേരിനോ ഹോന്തു, ഖേമിനോ ഹോന്തു, സുഖിനോ ഹോന്തൂതി – സമ്മാ പസ്സതി. സമ്മാദിട്ഠി പരിഭാവിതാ ഹോതി മേത്താചേതോവിമുത്തി. സമ്മാ അഭിനിരോപേതി. സമ്മാസങ്കപ്പപരിഭാവിതാ ഹോതി മേത്താചേതോവിമുത്തി. സമ്മാ പരിഗ്ഗണ്ഹാതി. സമ്മാവാചാപരിഭാവിതാ ഹോതി മേത്താചേതോവിമുത്തി. സമ്മാ സമുട്ഠാപേതി. സമ്മാകമ്മന്തപരിഭാവിതാ ഹോതി മേത്താചേതോവിമുത്തി. സമ്മാ വോദാപേതി. സമ്മാ ആജീവപരിഭാവിതാ ഹോതി മേത്താചേതോവിമുത്തി. സമ്മാ പഗ്ഗണ്ഹാതി. സമ്മാവായാമപരിഭാവിതാ ഹോതി മേത്താചേതോവിമുത്തി. സമ്മാ ഉപട്ഠാതി. സമ്മാസതിപരിഭാവിതാ ഹോതി മേത്താചേതോവിമുത്തി. സമ്മാ സമാദഹതി. സമ്മാസമാധിപരിഭാവിതാ ഹോതി മേത്താചേതോവിമുത്തി.

ഇമേ അട്ഠ മഗ്ഗങ്ഗാ മേത്തായ ചേതോവിമുത്തിയാ ആസേവനാ ഹോന്തി. ഇമേഹി അട്ഠഹി മഗ്ഗങ്ഗേഹി മേത്താചേതോവിമുത്തി ആസേവീയതി…പേ… ഇമേ അട്ഠ മഗ്ഗങ്ഗാ മേത്തായ ചേതോവിമുത്തിയാ പരിഭാവിതാ ഹോന്തി. ഇമേഹി അട്ഠഹി മഗ്ഗങ്ഗേഹി മേത്താചേതോവിമുത്തി സുപരിവുതാ ഹോതി. ഇമേ അട്ഠ മഗ്ഗങ്ഗാ മേത്തായ ചേതോവിമുത്തിയാ ആസേവനാ ഹോന്തി, ഭാവനാ ഹോന്തി, ബഹുലീകതാ ഹോന്തി, അലങ്കാരാ ഹോന്തി, പരിക്ഖാരാ ഹോന്തി, പരിവാരാ ഹോന്തി, പാരിപൂരീ ഹോന്തി, സഹഗതാ ഹോന്തി, സഹജാതാ ഹോന്തി, സംസട്ഠാ ഹോന്തി, സമ്പയുത്താ ഹോന്തി, പക്ഖന്ദനാ ഹോന്തി, പസീദനാ ഹോന്തി, സന്തിട്ഠനാ ഹോന്തി, വിമുച്ചനാ ഹോന്തി, ‘‘ഏതം സന്ത’’ന്തി ഫസ്സനാ ഹോന്തി, യാനീകതാ ഹോന്തി, വത്ഥുകതാ ഹോന്തി, അനുട്ഠിതാ ഹോന്തി, പരിചിതാ ഹോന്തി, സുസമാരദ്ധാ ഹോന്തി, സുഭാവിതാ ഹോന്തി, സ്വാധിട്ഠിതാ ഹോന്തി, സുസമുഗ്ഗതാ ഹോന്തി, സുവിമുത്താ ഹോന്തി നിബ്ബത്തേന്തി ജോതേന്തി പതാപേന്തീതി.

മേത്താകഥാ നിട്ഠിതാ.