൬. ഞാണരാസിഛക്കനിദ്ദേസോ

൧൮൩. കതമാനി ചതുവീസതി സമാധിവസേന ഞാണാനി? ദീഘം അസ്സാസവസേന ചിത്തസ്സ ഏകഗ്ഗതാ അവിക്ഖേപോ സമാധി, ദീഘം പസ്സാസവസേന ചിത്തസ്സ ഏകഗ്ഗതാ അവിക്ഖേപോ സമാധി…പേ… വിമോചയം ചിത്തം അസ്സാസവസേന ചിത്തസ്സ ഏകഗ്ഗതാ അവിക്ഖേപോ സമാധി, വിമോചയം ചിത്തം പസ്സാസവസേന ചിത്തസ്സ ഏകഗ്ഗതാ അവിക്ഖേപോ സമാധി. ഇമാനി ചതുവീസതി സമാധിവസേന ഞാണാനി.

കതമാനി ദ്വേസത്തതി വിപസ്സനാവസേന ഞാണാനി? ദീഘം അസ്സാസം അനിച്ചതോ അനുപസ്സനട്ഠേന വിപസ്സനാ, ദുക്ഖതോ അനുപസ്സനട്ഠേന വിപസ്സനാ, അനത്തതോ അനുപസ്സനട്ഠേന വിപസ്സനാ, ദീഘം പസ്സാസം അനിച്ചതോ അനുപസ്സനട്ഠേന വിപസ്സനാ, ദുക്ഖതോ അനുപസ്സനട്ഠേന വിപസ്സനാ, അനത്തതോ അനുപസ്സനട്ഠേന വിപസ്സനാ…പേ… വിമോചയം ചിത്തം അസ്സാസം, വിമോചയം ചിത്തം പസ്സാസം അനിച്ചതോ അനുപസ്സനട്ഠേന വിപസ്സനാ, ദുക്ഖതോ അനുപസ്സനട്ഠേന വിപസ്സനാ, അനത്തതോ അനുപസ്സനട്ഠേന വിപസ്സനാ. ഇമാനി ദ്വേസത്തതി വിപസ്സനാവസേന ഞാണാനി.

കതമാനി അട്ഠ നിബ്ബിദാഞാണാനി? അനിച്ചാനുപസ്സീ അസ്സാസം യഥാഭൂതം ജാനാതി പസ്സതീതി – നിബ്ബിദാഞാണം, അനിച്ചാനുപസ്സീ പസ്സാസം യഥാഭൂതം ജാനാതി പസ്സതീതി – നിബ്ബിദാഞാണം…പേ… പടിനിസ്സഗ്ഗാനുപസ്സീ അസ്സാസം യഥാഭൂതം ജാനാതി പസ്സതീതി – നിബ്ബിദാഞാണം, പടിനിസ്സഗ്ഗാനുപസ്സീ പസ്സാസം യഥാഭൂതം ജാനാതി പസ്സതീതി – നിബ്ബിദാഞാണം. ഇമാനി അട്ഠ നിബ്ബിദാഞാണാനി.

കതമാനി അട്ഠ നിബ്ബിദാനുലോമേ ഞാണാനി? അനിച്ചാനുപസ്സീ അസ്സാസം ഭയതുപട്ഠാനേ പഞ്ഞാ നിബ്ബിദാനുലോമേ ഞാണം, അനിച്ചാനുപസ്സീ പസ്സാസം ഭയതുപട്ഠാനേ പഞ്ഞാ നിബ്ബിദാനുലോമേ ഞാണം…പേ… പടിനിസ്സഗ്ഗാനുപസ്സീ അസ്സാസം ഭയതുപട്ഠാനേ പഞ്ഞാ നിബ്ബിദാനുലോമേ ഞാണം, പടിനിസ്സഗ്ഗാനുപസ്സീ പസ്സാസം ഭയതുപട്ഠാനേ പഞ്ഞാ നിബ്ബിദാനുലോമേ ഞാണം – ഇമാനി അട്ഠ നിബ്ബിദാനുലോമേ ഞാണാനി.

കതമാനി അട്ഠ നിബ്ബിദാപടിപ്പസ്സദ്ധിഞാണാനി? അനിച്ചാനുപസ്സീ അസ്സാസം പടിസങ്ഖാ സന്തിട്ഠനാ പഞ്ഞാ നിബ്ബിദാപടിപ്പസ്സദ്ധിഞാണം, അനിച്ചാനുപസ്സീ പസ്സാസം പടിസങ്ഖാ സന്തിട്ഠനാ പഞ്ഞാ നിബ്ബിദാപടിപ്പസ്സദ്ധിഞാണം…പേ… പടിനിസ്സഗ്ഗാനുപസ്സീ അസ്സാസം പടിസങ്ഖാ സന്തിട്ഠനാ പഞ്ഞാ നിബ്ബിദാപടിപ്പസ്സദ്ധിഞാണം, പടിനിസ്സഗ്ഗാനുപസ്സീ പസ്സാസം പടിസങ്ഖാ സന്തിട്ഠനാ പഞ്ഞാ നിബ്ബിദാപടിപ്പസ്സദ്ധിഞാണം – ഇമാനി അട്ഠ നിബ്ബിദാപടിപ്പസ്സദ്ധിഞാണാനി.

കതമാനി ഏകവീസതി വിമുത്തിസുഖേ ഞാണാനി? സോതാപത്തിമഗ്ഗേന സക്കായദിട്ഠിയാ പഹീനത്താ സമുച്ഛിന്നത്താ ഉപ്പജ്ജതി വിമുത്തിസുഖേ ഞാണം, വിചികിച്ഛായ പഹീനത്താ സമുച്ഛിന്നത്താ ഉപ്പജ്ജതി വിമുത്തിസുഖേ ഞാണം, സീലബ്ബതപരാമാസസ്സ…പേ… ദിട്ഠാനുസയസ്സ, വിചികിച്ഛാനുസയസ്സ പഹീനത്താ സമുച്ഛിന്നത്താ ഉപ്പജ്ജതി വിമുത്തിസുഖേ ഞാണം, സകദാഗാമിമഗ്ഗേന ഓളാരികസ്സ, കാമരാഗസഞ്ഞോജനസ്സ…പേ… പടിഘസഞ്ഞോജനസ്സ, ഓളാരികസ്സ കാമരാഗാനുസയസ്സ, പടിഘാനുസയസ്സ പഹീനത്താ സമുച്ഛിന്നത്താ ഉപ്പജ്ജതി വിമുത്തിസുഖേ ഞാണം, അനാഗാമിമഗ്ഗേന അനുസഹഗതസ്സ കാമരാഗസഞ്ഞോജനസ്സ…പേ… പടിഘസഞ്ഞോജനസ്സ, അനുസഹഗതസ്സ കാമരാഗാനുസയസ്സ, പടിഘാനുസയസ്സ പഹീനത്താ സമുച്ഛിന്നത്താ ഉപ്പജ്ജതി വിമുത്തിസുഖേ ഞാണം, അരഹത്തമഗ്ഗേന, രൂപരാഗസ്സ…പേ… അരൂപരാഗസ്സ, മാനസ്സ, ഉദ്ധച്ചസ്സ, അവിജ്ജായ, മാനാനുസയസ്സ, ഭവരാഗാനുസയസ്സ, അവിജ്ജാനുസയസ്സ പഹീനത്താ സമുച്ഛിന്നത്താ ഉപ്പജ്ജതി വിമുത്തിസുഖേ ഞാണം. ഇമാനി ഏകവീസതി വിമുത്തിസുഖേ ഞാണാനി. സോളസവത്ഥുകം ആനാപാനസ്സതിസമാധിം ഭാവയതോ സമധികാനി ഇമാനി ദ്വേ ഞാണസതാനി ഉപ്പജ്ജന്തി.

ഞാണരാസിഛക്കനിദ്ദേസോ ഛട്ഠോ.

ആനാപാനസ്സതികഥാ [ആനാപാനകഥാ (സ്യാ. ക.)] നിട്ഠിതാ.