൧൪. അധിട്ഠാനഹാരസമ്പാതോ

൭൬. തത്ഥ കതമോ അധിട്ഠാനോ ഹാരസമ്പാതോ?

തസ്മാ രക്ഖിതചിത്തസ്സ, സമ്മാസങ്കപ്പഗോചരോതി ഗാഥാ. തസ്മാ രക്ഖിതചിത്തസ്സാതി ഏകത്തതാ. ചിത്തം മനോ വിഞ്ഞാണം, അയം വേമത്തതാ. സമ്മാസങ്കപ്പഗോചരോതി ഏകത്തതാ. നേക്ഖമ്മസങ്കപ്പോ അബ്യാപാദസങ്കപ്പോ അവിഹിംസാസങ്കപ്പോ അയം വേമത്തതാ. സമ്മാദിട്ഠിപുരേക്ഖാരോതി ഏകത്തതാ. സമ്മാദിട്ഠി നാമ യം ദുക്ഖേ ഞാണം ദുക്ഖസമുദയേ ഞാണം ദുക്ഖനിരോധേ ഞാണം ദുക്ഖനിരോധഗാമിനിയാ പടിപദായ ഞാണം മഗ്ഗേ ഞാണം ഹേതുമ്ഹി ഞാണം ഹേതുസമുപ്പന്നേസു ധമ്മേസു ഞാണം പച്ചയേ ഞാണം പച്ചയസമുപ്പന്നേസു ധമ്മേസു ഞാണം, യം തത്ഥ തത്ഥ യഥാഭൂതം ഞാണദസ്സനം അഭിസമയോ സമ്പടിവേധോ സച്ചാഗമനം, അയം വേമത്തതാ. ഞത്വാന ഉദയബ്ബയന്തി ഏകത്തതാ, ഉദയേന അവിജ്ജാപച്ചയാ സങ്ഖാരാ, സങ്ഖാരപച്ചയാ വിഞ്ഞാണം, ഏവം സബ്ബം സമുദയോ ഭവതി. വയേന അവിജ്ജാനിരോധാ സങ്ഖാരനിരോധോ, ഏവം സബ്ബം നിരോധോ ഹോതി, അയം വേമത്തതാ. ഥിനമിദ്ധാഭിഭൂ ഭിക്ഖൂതി ഏകത്തതാ, ഥിനം നാമ യാ ചിത്തസ്സ അകല്ലതാ അകമ്മനിയതാ, മിദ്ധം നാമ യം കായസ്സ ലീനത്തം, അയം വേമത്തതാ. സബ്ബാ ദുഗ്ഗതിയോ ജഹേതി ഏകത്തതാ, ദേവമനുസ്സേ വാ ഉപനിധായ അപായാ ദുഗ്ഗതി, നിബ്ബാനം വാ ഉപനിധായ സബ്ബാ ഉപപത്തിയോ ദുഗ്ഗതി, അയം വേമത്തതാ.

നിയുത്തോ അധിട്ഠാനോ ഹാരസമ്പാതോ.