൧൮. പാരായനാനുഗീതിഗാഥാ

൧൫൬. ‘‘പാരായനമനുഗായിസ്സം, [ഇച്ചായസ്മാ പിങ്ഗിയോ]

യഥാദ്ദക്ഖി തഥാക്ഖാസി, വിമലോ ഭൂരിമേധസോ;

നിക്കാമോ നിബ്ബനോ [നിബ്ബുതോ (സ്യാ.)] നാഗോ, കിസ്സ ഹേതു മുസാ ഭണേ.

൧൫൭. ‘‘പഹീനമലമോഹസ്സ, മാനമക്ഖപ്പഹായിനോ;

ഹന്ദാഹം കിത്തയിസ്സാമി, ഗിരം വണ്ണൂപസഞ്ഹിതം.

൧൫൮. ‘‘തമോനുദോ ബുദ്ധോ സമന്തചക്ഖു, ലോകന്തഗൂ സബ്ബഭവാതിവത്തോ;

അനാസവോ സബ്ബദുക്ഖപ്പഹീനോ, സച്ചവ്ഹയോ ബ്രഹ്മേ ഉപാസിതോ മേ.

൧൫൯. ‘‘ദിജോ യഥാ കുബ്ബനകം പഹായ, ബഹുപ്ഫലം കാനനമാവസേയ്യ;

ഏവമ്പഹം അപ്പദസ്സേ പഹായ, മഹോദധിം ഹംസോരിവ അജ്ഝപത്തോ.

൧൬൦. ‘‘യേമേ പുബ്ബേ വിയാകംസു, ഹുരം ഗോതമസാസനാ;

ഇച്ചാസി ഇതി ഭവിസ്സതി;

സബ്ബം തം ഇതിഹീതിഹം, സബ്ബം തം തക്കവഡ്ഢനം.

൧൬൧. ‘‘ഏകോ തമനുദാസിനോ, ജുതിമാ സോ പഭങ്കരോ;

ഗോതമോ ഭൂരിപഞ്ഞാണോ, ഗോതമോ ഭൂരിമേധസോ.

൧൬൨. ‘‘യോ മേ ധമ്മമദേസേസി, സന്ദിട്ഠികമകാലികം;

തണ്ഹക്ഖയമനീതികം, യസ്സ നത്ഥി ഉപമാ ക്വചി’’.

൧൬൩. ‘‘കിം നു തമ്ഹാ വിപ്പവസസി, മുഹുത്തമപി പിങ്ഗിയ;

ഗോതമാ ഭൂരിപഞ്ഞാണാ, ഗോതമാ ഭൂരിമേധസാ.

൧൬൪. ‘‘യോ തേ ധമ്മമദേസേസി, സന്ദിട്ഠികമകാലികം;

തണ്ഹക്ഖയമനീതികം, യസ്സ നത്ഥി ഉപമാ ക്വചി’’.

൧൬൫. ‘‘നാഹം തമ്ഹാ വിപ്പവസാമി, മുഹുത്തമപി ബ്രാഹ്മണ;

ഗോതമാ ഭൂരിപഞ്ഞാണാ, ഗോതമാ ഭൂരിമേധസാ.

൧൬൬. ‘‘യോ മേ ധമ്മമദേസേസി, സന്ദിട്ഠികമകാലികം;

തണ്ഹക്ഖയമനീതികം, യസ്സ നത്ഥി ഉപമാ ക്വചി.

൧൬൭. ‘‘പസ്സാമി നം മനസാ ചക്ഖുനാവ, രത്തിന്ദിവം ബ്രാഹ്മണ അപ്പമത്തോ.

നമസ്സമാനോ വിവസേമി രത്തിം, തേനേവ മഞ്ഞാമി അവിപ്പവാസം.

൧൬൮. ‘‘സദ്ധാ ച പീതി ച മനോ സതി ച,

നാപേന്തിമേ ഗോതമസാസനമ്ഹാ;

യം യം ദിസം വജതി ഭൂരിപഞ്ഞോ, സ തേന തേനേവ നതോഹമസ്മി.

൧൬൯. ‘‘ജിണ്ണസ്സ മേ ദുബ്ബലഥാമകസ്സ, തേനേവ കായോ ന പലേതി തത്ഥ;

സങ്കപ്പയന്തായ [സംകപ്പയത്തായ (സീ.)] വജാമി നിച്ചം, മനോ ഹി മേ ബ്രാഹ്മണ തേന യുത്തോ.

൧൭൦. ‘‘പങ്കേ സയാനോ പരിഫന്ദമാനോ, ദീപാ ദീപം ഉപല്ലവിം;

അഥദ്ദസാസിം സമ്ബുദ്ധം, ഓഘതിണ്ണമനാസവം.

൧൭൧. ‘‘യഥാ അഹൂ വക്കലി മുത്തസദ്ധോ, ഭദ്രാവുധോ ആളവിഗോതമോ ച;

ഏവമേവ ത്വമ്പി പമുഞ്ചസ്സു സദ്ധം, ഗമിസ്സസി ത്വം പിങ്ഗിയ മച്ചുധേയ്യസ്സ പാരം’’ [മച്ചുധേയ്യപാരം (സീ.)].

൧൭൨. ‘‘ഏസ ഭിയ്യോ പസീദാമി, സുത്വാന മുനിനോ വചോ;

വിവട്ടച്ഛദോ സമ്ബുദ്ധോ, അഖിലോ പടിഭാനവാ.

൧൭൩. ‘‘അധിദേവേ അഭിഞ്ഞായ, സബ്ബം വേദി പരോപരം;

പഞ്ഹാനന്തകരോ സത്ഥാ, കങ്ഖീനം പടിജാനതം.

൧൭൪. ‘‘അസംഹീരം അസംകുപ്പം, യസ്സ നത്ഥി ഉപമാ ക്വചി;

അദ്ധാ ഗമിസ്സാമി ന മേത്ഥ കങ്ഖാ, ഏവം മം ധാരേഹി അധിമുത്തചിത്ത’’ന്തി [അജിതമാണവപുച്ഛായ പട്ഠായ യാവപാരായനാനുഗീതിഗാതാപരിയോസാനാ സ്യാ. … പോത്ഥകേ നത്ഥി].

പാരായനാനുഗീതിഗാഥാ നിട്ഠിതാ.