൫. നകുലങ്ഗപഞ്ഹോ

൫. ‘‘ഭന്തേ നാഗസേന, ‘നകുലസ്സ ഏകം അങ്ഗം ഗഹേതബ്ബ’ന്തി യം വദേസി, കതമം തം ഏകം അങ്ഗം ഗഹേതബ്ബ’’ന്തി? ‘‘യഥാ, മഹാരാജ, നകുലോ ഉരഗമുപഗച്ഛന്തോ ഭേസജ്ജേന കായം പരിഭാവേത്വാ ഉരഗമുപഗച്ഛതി ഗഹേതും, ഏവമേവ ഖോ, മഹാരാജ, യോഗിനാ യോഗാവചരേന കോധാഘാതബഹുലം കലഹവിഗ്ഗഹവിവാദവിരോധാഭിഭൂതം ലോകമുപഗച്ഛന്തേന മേത്താഭേസജ്ജേന മാനസം അനുലിമ്പിതബ്ബം. ഇദം, മഹാരാജ, നകുലസ്സ ഏകം അങ്ഗം ഗഹേതബ്ബം. ഭാസിതമ്പേതം, മഹാരാജ, ഥേരേന സാരിപുത്തേന ധമ്മസേനാപതിനാ –

‘‘‘തസ്മാ സകം പരേസമ്പി, കാതബ്ബാ മേത്തഭാവനാ;

മേത്തചിത്തേന ഫരിതബ്ബം, ഏതം ബുദ്ധാന സാസന’’’ന്തി.

നകുലങ്ഗപഞ്ഹോ പഞ്ചമോ.