൪. ലോകേ നത്ഥിഭാവപഞ്ഹോ

൪. ‘‘ഭന്തേ നാഗസേന, ദിസ്സന്തി ലോകേ ബുദ്ധാ, ദിസ്സന്തി പച്ചേകബുദ്ധാ, ദിസ്സന്തി തഥാഗതസ്സ സാവകാ, ദിസ്സന്തി ചക്കവത്തിരാജാനോ, ദിസ്സന്തി പദേസരാജാനോ, ദിസ്സന്തി ദേവമനുസ്സാ, ദിസ്സന്തി സധനാ, ദിസ്സന്തി അധനാ, ദിസ്സന്തി സുഗതാ, ദിസ്സന്തി ദുഗ്ഗതാ, ദിസ്സതി പുരിസസ്സ ഇത്ഥിലിങ്ഗം പാതുഭൂതം, ദിസ്സതി ഇത്ഥിയാ പുരിസലിങ്ഗം പാതുഭൂതം, ദിസ്സതി സുകതം ദുക്കതം കമ്മം, ദിസ്സന്തി കല്യാണപാപകാനം കമ്മാനം വിപാകൂപഭോഗിനോ സത്താ, അത്ഥി ലോകേ സത്താ അണ്ഡജാ ജലാബുജാ സംസേദജാ ഓപപാതികാ, അത്ഥി സത്താ അപദാ ദ്വിപദാ ചതുപ്പദാ ബഹുപ്പദാ, അത്ഥി ലോകേ യക്ഖാ രക്ഖസാ കുമ്ഭണ്ഡാ അസുരാ ദാനവാ ഗന്ധബ്ബാ പേതാ പിസാചാ, അത്ഥി കിന്നരാ മഹോരഗാ നാഗാ സുപണ്ണാ സിദ്ധാ വിജ്ജാധരാ, അത്ഥി ഹത്ഥീ അസ്സാ ഗാവോ മഹിംസാ [മഹിസാ (സീ. പീ.)] ഓട്ഠാ ഗദ്രഭാ അജാ ഏളകാ മിഗാ സൂകരാ സീഹാ ബ്യഗ്ഘാ ദീപീ അച്ഛാ കോകാ തരച്ഛാ സോണാ സിങ്ഗാലാ, അത്ഥി ബഹുവിധാ സകുണാ, അത്ഥി സുവണ്ണം രജതം മുത്താ മണി സങ്ഖോ സിലാ പവാളം ലോഹിതങ്കോ മസാരഗല്ലം വേളുരിയോ വജിരം ഫലികം കാളലോഹം തമ്ബലോഹം വട്ടലോഹം കംസലോഹം, അത്ഥി ഖോമം കോസേയ്യം കപ്പാസികം സാണം ഭങ്ഗം കമ്ബലം, അത്ഥി സാലി വീഹി യവോ കങ്ഗു കുദ്രൂസോ വരകോ ഗോധൂമോ മുഗ്ഗോ, മാസോ തിലം കുലത്ഥം, അത്ഥി മൂലഗന്ധോ സാരഗന്ധോ ഫേഗ്ഗുഗന്ധോ തചഗന്ധോ പത്തഗന്ധോ പുപ്ഫഗന്ധോ ഫലഗന്ധോ സബ്ബഗന്ധോ, അത്ഥി തിണ ലതാ ഗച്ഛ രുക്ഖ ഓസധി വനപ്പതി നദീ പബ്ബത സമുദ്ദ മച്ഛകച്ഛപാ സബ്ബം ലോകേ അത്ഥി. യം, ഭന്തേ, ലോകേ നത്ഥി, തം മേ കഥേഹീ’’തി.

‘‘തീണിമാനി, മഹാരാജ, ലോകേ നത്ഥി. കതമാനി തീണി? സചേതനാ വാ അചേതനാ വാ അജരാമരാ ലോകേ നത്ഥി, സങ്ഖാരാനം നിച്ചതാ നത്ഥി, പരമത്ഥേന സത്തൂപലദ്ധി നത്ഥി, ഇമാനി ഖോ, മഹാരാജ, തീണി ലോകേ നത്ഥീ’’തി. ‘‘സാധു, ഭന്തേ നാഗസേന, ഏവമേതം തഥാ സമ്പടിച്ഛാമീ’’തി.

ലോകേ നത്ഥിഭാവപഞ്ഹോ ചതുത്ഥോ.