൧൦. ബുദ്ധനിദസ്സനപഞ്ഹോ

൧൦. രാജാ ആഹ ‘‘ഭന്തേ നാഗസേന, ബുദ്ധോ അത്ഥീ’’തി? ‘‘ആമ, മഹാരാജ, ഭഗവാ അത്ഥീ’’തി. ‘‘സക്കാ പന, ഭന്തേ നാഗസേന, ബുദ്ധോ നിദസ്സേതും ഇധവാ ഇധവാ’’തി? ‘‘പരിനിബ്ബുതോ, മഹാരാജ, ഭഗവാ അനുപാദിസേസായ നിബ്ബാനധാതുയാ, ന സക്കാ ഭഗവാ നിദസ്സേതും ‘ഇധ വാ ഇധ വാ’’’തി.

‘‘ഓപമ്മം കരോഹീ’’തി. ‘‘തം കിം മഞ്ഞസി, മഹാരാജ, മഹതോ അഗ്ഗിക്ഖന്ധസ്സ ജലമാനസ്സ യാ അച്ചി അത്ഥങ്ഗതാ, സക്കാ സാ അച്ചി ദസ്സേതും ‘ഇധ വാ ഇധ വാ’’’തി? ‘‘ന ഹി, ഭന്തേ, നിരുദ്ധാ സാ അച്ചി അപ്പഞ്ഞത്തിം ഗതാ’’തി. ‘‘ഏവമേവ ഖോ, മഹാരാജ, ഭഗവാ അനുപാദിസേസായ നിബ്ബാനധാതുയാ പരിനിബ്ബുതോ അത്ഥങ്ഗതോ, ന സക്കാ ഭഗവാ നിദസ്സേതും ‘ഇധ വാ ഇധ വാ’ തി, ധമ്മകായേന പന ഖോ, മഹാരാജ, സക്കാ ഭഗവാ നിദസ്സേതും. ധമ്മോ ഹി, മഹാരാജ, ഭഗവതാ ദേസിതോ’’തി.

‘‘കല്ലോസി, ഭന്തേ നാഗസേനാ’’തി.

ബുദ്ധനിദസ്സനപഞ്ഹോ ദസമോ.

ബുദ്ധവഗ്ഗോ പഞ്ചമോ.

ഇമസ്മിം വഗ്ഗേ ദസ പഞ്ഹാ.