൧൦. നിബ്ബാനസുഖജാനനപഞ്ഹോ

൧൦. രാജാ ആഹ ‘‘ഭന്തേ നാഗസേന, യോ ന ലഭതി നിബ്ബാനം, ജാനാതി സോ ‘സുഖം നിബ്ബാന’’’ന്തി? ‘‘ആമ, മഹാരാജ, യോ ന ലഭതി നിബ്ബാനം, ജാനാതി സോ ‘സുഖം നിബ്ബാന’’’ന്തി. ‘‘കഥം, ഭന്തേ നാഗസേന, അലഭന്തോ ജാനാതി ‘സുഖം നിബ്ബാന’’’ന്തി? ‘‘തം കിം മഞ്ഞസി, മഹാരാജ, യേസം നച്ഛിന്നാ ഹത്ഥപാദാ, ജാനേയ്യും തേ, മഹാരാജ, ‘ദുക്ഖം ഹത്ഥപാദച്ഛേദന’’’ന്തി? ‘‘ആമ, ഭന്തേ, ജാനേയ്യു’’ന്തി. ‘‘കഥം ജാനേയ്യു’’ന്തി? ‘‘അഞ്ഞേസം, ഭന്തേ, ഛിന്നഹത്ഥപാദാനം പരിദേവിതസദ്ദം സുത്വാ ജാനന്തി ‘ദുക്ഖം ഹത്ഥപാദച്ഛേദന’’’ന്തി. ‘‘ഏവമേവ ഖോ, മഹാരാജ, യേസം ദിട്ഠം നിബ്ബാനം, തേസം സദ്ദം സുത്വാ ജാനാതി ‘സുഖം നിബ്ബാന’’’ന്തി.

‘‘കല്ലോസി, ഭന്തേ നാഗസേനാ’’തി.

നിബ്ബാനസുഖജാനനപഞ്ഹോ ദസമോ.

നിബ്ബാനവഗ്ഗോ ചതുത്ഥോ.

ഇമസ്മിം വഗ്ഗേ ദസ പഞ്ഹാ.