൪. സങ്ഖാരജായമാനപഞ്ഹോ

൪. രാജാ ആഹ ‘‘ഭന്തേ നാഗസേന, അത്ഥി കേചി സങ്ഖാരാ, യേ ജായന്തീ’’തി? ‘‘ആമ, മഹാരാജ, അത്ഥി സങ്ഖാരാ, യേ ജായന്തീ’’തി. ‘‘കതമേ തേ, ഭന്തേ’’തി? ‘‘ചക്ഖുസ്മിഞ്ച ഖോ, മഹാരാജ, സതി രൂപേസു ച ചക്ഖുവിഞ്ഞാണം ഹോതി, ചക്ഖുവിഞ്ഞാണേ സതി ചക്ഖുസമ്ഫസ്സോ ഹോതി, ചക്ഖുസമ്ഫസ്സേ സതി വേദനാ ഹോതി, വേദനായ സതി തണ്ഹാ ഹോതി, തണ്ഹായ സതി ഉപാദാനം ഹോതി, ഉപാദാനേ സതി ഭവോ ഹോതി, ഭവേ സതി ജാതി ഹോതി, ജാതിയാ സതി ജരാമരണം സോകപരിദേവദുക്ഖദോമനസ്സുപായാസാ സമ്ഭവന്തി, ഏവമേതസ്സ കേവലസ്സ ദുക്ഖക്ഖന്ധസ്സ സമുദയോ ഹോതി. ചക്ഖുസ്മിഞ്ച ഖോ, മഹാരാജ, അസതി രൂപേസു ച അസതി ചക്ഖുവിഞ്ഞാണം ന ഹോതി, ചക്ഖുവിഞ്ഞാണേ അസതി ചക്ഖുസമ്ഫസ്സോ ന ഹോതി, ചക്ഖുസമ്ഫസ്സേ അസതി വേദനാ ന ഹോതി, വേദനായ അസതി തണ്ഹാ ന ഹോതി, തണ്ഹായ അസതി ഉപാദാനം ന ഹോതി, ഉപാദാനേ അസതി ഭവോ ന ഹോതി, ഭവേ അസതി ജാതി ന ഹോതി, ജാതിയാ അസതി ജരാമരണം സോകപരിദേവദുക്ഖദോമനസ്സുപായാസാ ന ഹോന്തി, ഏവമേതസ്സ കേവലസ്സ ദുക്ഖക്ഖന്ധസ്സ നിരോധോ ഹോതീ’’തി.

‘‘കല്ലോസി, ഭന്തേ നാഗസേനാ’’തി.

സങ്ഖാരജായമാനപഞ്ഹോ ചതുത്ഥോ.