൯. അദ്ധാനപഞ്ഹോ

൯. രാജാ ആഹ ‘‘ഭന്തേ നാഗസേന, യം പനേതം ബ്രൂസി ‘ദീഘമദ്ധാന’ന്തി, കിമേതം അദ്ധാനം നാമാ’’തി? ‘‘അതീതോ, മഹാരാജ, അദ്ധാ, അനാഗതോ അദ്ധാ, പച്ചുപ്പന്നോ അദ്ധാ’’തി. ‘‘കിം പന, ഭന്തേ, സബ്ബേ അദ്ധാ അത്ഥീ’’തി? ‘‘കോചി, മഹാരാജ, അദ്ധാ അത്ഥി, കോചി നത്ഥീ’’തി. ‘‘കതമോ പന, ഭന്തേ, അത്ഥി, കതമോ നത്ഥീ’’തി? ‘‘യേ തേ, മഹാരാജ, സങ്ഖാരാ അതീതാ വിഗതാ നിരുദ്ധാ വിപരിണതാ, സോ അദ്ധാ നത്ഥി, യേ ധമ്മാ വിപാകാ, യേ ച വിപാകധമ്മധമ്മാ, യേ ച അഞ്ഞത്ര പടിസന്ധിം ദേന്തി, സോ അദ്ധാ അത്ഥി. യേ സത്താ കാലങ്കതാ അഞ്ഞത്ര ഉപ്പന്നാ, സോ ച അദ്ധാ അത്ഥി. യേ സത്താ കാലങ്കതാ അഞ്ഞത്ര അനുപ്പന്നാ, സോ അദ്ധാ നത്ഥി. യേ ച സത്താ പരിനിബ്ബുതാ, സോ ച അദ്ധാ നത്ഥി പരിനിബ്ബുതത്താ’’തി.

‘‘കല്ലോസി, ഭന്തേ നാഗസേനാ’’തി.

അദ്ധാനപഞ്ഹോ നവമോ.

അദ്ധാനവഗ്ഗോ ദുതിയോ.

ഇമസ്മിം വഗ്ഗേ നവ പഞ്ഹാ.