൪൨൩. ഇന്ദ്രിയജാതകം (൭)

൬൦. യോ ഇന്ദ്രിയാനം കാമേന, വസം നാരദ ഗച്ഛതി;

സോ പരിച്ചജ്ജുഭോ ലോകേ, ജീവന്തോവ വിസുസ്സതി [ജീവന്തോപിവിസുസ്സതി (സ്യാ.), ജീവന്തോ വാപി സുസ്സതി (ക.)].

൬൧. സുഖസ്സാനന്തരം ദുക്ഖം, ദുക്ഖസ്സാനന്തരം സുഖം;

സോസി [സോപി (സ്യാ. പീ. ക.)] പത്തോ സുഖാ [സുഖ (സ്യാ.), സുഖം (ക.)] ദുക്ഖം, പാടികങ്ഖ വരം സുഖം.

൬൨. കിച്ഛകാലേ കിച്ഛസഹോ, യോ കിച്ഛം നാതിവത്തതി;

സ കിച്ഛന്തം സുഖം ധീരോ, യോഗം സമധിഗച്ഛതി.

൬൩. ന ഹേവ കാമാന കാമാ, നാനത്ഥാ നാത്ഥകാരണാ;

ന കതഞ്ച നിരങ്കത്വാ, ധമ്മാ ചവിതുമരഹസി.

൬൪. ദക്ഖം ഗഹപതീ [ഗഹപതം (സീ. സ്യാ. പീ.), ഗഹവതം (?)] സാധു, സംവിഭജ്ജഞ്ച ഭോജനം;

അഹാസോ അത്ഥലാഭേസു, അത്ഥബ്യാപത്തി അബ്യഥോ.

൬൫. ഏത്താവതേതം പണ്ഡിച്ചം, അപി സോ [അസിതോ (സീ. സ്യാ. പീ.)] ദവിലോ [ദേവലോ (സീ. പീ.)] ബ്രവി;

ന യിതോ കിഞ്ചി പാപിയോ, യോ ഇന്ദ്രിയാനം വസം വജേ.

൬൬. അമിത്താനംവ ഹത്ഥത്ഥം, സിവി പപ്പോതി മാമിവ;

കമ്മം വിജ്ജഞ്ച ദക്ഖേയ്യം, വിവാഹം സീലമദ്ദവം;

ഏതേ ച യസേ ഹാപേത്വാ, നിബ്ബത്തോ സേഹി കമ്മേഹി.

൬൭. സോഹം സഹസ്സജീനോവ അബന്ധു അപരായണോ;

അരിയധമ്മാ അപക്കന്തോ, യഥാ പേതോ തഥേവഹം.

൬൮. സുഖകാമേ ദുക്ഖാപേത്വാ, ആപന്നോസ്മി പദം ഇമം;

സോ സുഖം നാധിഗച്ഛാമി, ഠിതോ [ചിതോ (പീ. സീ. അട്ഠ.)] ഭാണുമതാമിവാതി.

ഇന്ദ്രിയജാതകം സത്തമം.