൪൨൪. ആദിത്തജാതകം (൮)

൬൯. ആദിത്തസ്മിം അഗാരസ്മിം, യം നീഹരതി ഭാജനം;

തം തസ്സ ഹോതി അത്ഥായ, നോ ച യം തത്ഥ ഡയ്ഹതി.

൭൦. ഏവാമാദീപിതോ ലോകോ, ജരായ മരണേന ച;

നീഹരേഥേവ ദാനേന, ദിന്നം ഹോതി സുനീഹതം [സുനീഭതം (സീ. സ്യാ. പീ.), സുനിബ്ഭതം (ക.)].

൭൧. യോ ധമ്മലദ്ധസ്സ ദദാതി ദാനം, ഉട്ഠാനവീരിയാധിഗതസ്സ ജന്തു;

അതിക്കമ്മ സോ വേതരണിം [വേത്തരണിം (ക.)] യമസ്സ, ദിബ്ബാനി ഠാനാനി ഉപേതി മച്ചോ.

൭൨. ദാനഞ്ച യുദ്ധഞ്ച സമാനമാഹു, അപ്പാപി സന്താ ബഹുകേ ജിനന്തി;

അപ്പമ്പി ചേ സദ്ദഹാനോ ദദാതി, തേനേവ സോ ഹോതി സുഖീ പരത്ഥ.

൭൩. വിചേയ്യ ദാനം സുഗതപ്പസത്ഥം, യേ ദക്ഖിണേയ്യാ ഇധ ജീവലോകേ;

ഏതേസു ദിന്നാനി മഹപ്ഫലാനി, ബീജാനി വുത്താനി യഥാ സുഖേത്തേ.

൭൪. യോ പാണഭൂതാനി അഹേഠയം ചരം, പരൂപവാദാ ന കരോതി പാപം;

ഭീരും പസംസന്തി ന തത്ഥ സൂരം, ഭയാ ഹി സന്തോ ന കരോന്തി പാപം.

൭൫. ഹീനേന ബ്രഹ്മചരിയേന, ഖത്തിയേ ഉപപജ്ജതി;

മജ്ഝിമേന ച ദേവത്തം, ഉത്തമേന വിസുജ്ഝതി.

൭൬. അദ്ധാ ഹി ദാനം ബഹുധാ പസത്ഥം, ദാനാ ച ഖോ ധമ്മപദംവ സേയ്യോ;

പുബ്ബേവ ഹി പുബ്ബതരേവ സന്തോ [പുബ്ബേ ച ഹി പുബ്ബതരേ ച സന്തോ (സം. നി. ൧.൩൩)], നിബ്ബാനമേവജ്ഝഗമും സപഞ്ഞാതി.

ആദിത്തജാതകം അട്ഠമം.