൯. ഉപാഹനവഗ്ഗോ
൨൩൧. ഉപാഹനജാതകം (൨-൯-൧)
൧൬൧. യഥാപി കീതാ പുരിസസ്സുപാഹനാ, സുഖസ്സ അത്ഥായ ദുഖം ഉദബ്ബഹേ;
ഘമ്മാഭിതത്താ ഥലസാ പപീളിതാ, തസ്സേവ പാദേ പുരിസസ്സ ഖാദരേ.
൧൬൨. ഏവമേവ യോ ദുക്കുലീനോ അനരിയോ, തമ്മാക [തമ്ഹാക (സീ.), തുമ്ഹാക (സ്യാ. പീ.)] വിജ്ജഞ്ച സുതഞ്ച ആദിയ;
തമേവ സോ തത്ഥ സുതേന ഖാദതി, അനരിയോ വുച്ചതി ദുപാഹനൂപമോതി [പാനദൂപമോതി (സീ. പീ.)].
ഉപാഹനജാതകം പഠമം.
൨൩൨. വീണാഗുണജാതകം (൨-൯-൨)
൧൬൩. ഏകചിന്തിതോ യമത്ഥോ, ബാലോ അപരിണായകോ;
ന ഹി ഖുജ്ജേന വാമേന, ഭോതി സങ്ഗന്തുമരഹസി.
൧൬൪. പുരിസൂസഭം മഞ്ഞമാനാ, അഹം ഖുജ്ജമകാമയിം;
സോയം സംകുടിതോ സേതി, ഛിന്നതന്തി യഥാ വിണാതി [ഥുണാതി (സീ.)].
വീണാഗുണജാതകം ദുതിയം.
൨൩൩. വികണ്ണജാതകം (൨-൯-൩)
൧൬൫. കാമം യഹിം ഇച്ഛസി തേന ഗച്ഛ, വിദ്ധോസി മമ്മമ്ഹി [മമസ്മി (ക.)] വികണ്ണകേന;
ഹതോസി ഭത്തേന സുവാദിതേന [സവാദിതേന (സീ. സ്യാ. പീ.)], ലോലോ ച മച്ഛേ അനുബന്ധമാനോ.
൧൬൬. ഏവമ്പി ലോകാമിസം ഓപതന്തോ, വിഹഞ്ഞതീ ചിത്തവസാനുവത്തീ;
സോ ഹഞ്ഞതി ഞാതിസഖാന മജ്ഝേ, മച്ഛാനുഗോ സോരിവ സുംസുമാരോതി [സുസുമാരോ (ക.)].
വികണ്ണജാതകം തതിയം.
൨൩൪. അസിതാഭൂജാതകം (൨-൯-൪)
൧൬൭. ത്വമേവ ദാനിമകര [മകരി (സ്യാ.), മകരാ (ക. സീ.)], യം കാമോ ബ്യഗമാ തയി;
സോയം അപ്പടിസന്ധികോ, ഖരഛിന്നംവ രേനുകം [രേരുകം (സീ. പീ.)].
൧൬൮. അത്രിച്ഛം [അത്രിച്ഛാ (സീ. സ്യാ. പീ.)] അതിലോഭേന, അതിലോഭമദേന ച;
ഏവം ഹായതി അത്ഥമ്ഹാ, അഹംവ അസിതാഭുയാതി.
അസിതാഭൂജാതകം ചതുത്ഥം.
൨൩൫. വച്ഛനഖജാതകം (൨-൯-൫)
൧൬൯. സുഖാ ഘരാ വച്ഛനഖ, സഹിരഞ്ഞാ സഭോജനാ;
യത്ഥ ഭുത്വാ പിവിത്വാ ച, സയേയ്യാഥ അനുസ്സുകോ.
൧൭൦. ഘരാ നാനീഹമാനസ്സ, ഘരാ നാഭണതോ മുസാ;
ഘരാ നാദിന്നദണ്ഡസ്സ, പരേസം അനികുബ്ബതോ [അനിക്രുബ്ബതോ (ക.)];
ഏവം ഛിദ്ദം ദുരഭിസമ്ഭവം [ദുരഭിഭവം (സീ. പീ.)], കോ ഘരം പടിപജ്ജതീതി.
വച്ഛനഖജാതകം പഞ്ചമം.
൨൩൬. ബകജാതകം (൨-൯-൬)
൧൭൧. ഭദ്ദകോ വതയം പക്ഖീ, ദിജോ കുമുദസന്നിഭോ;
വൂപസന്തേഹി പക്ഖേഹി, മന്ദമന്ദോവ ഝായതി.
൧൭൨. നാസ്സ സീലം വിജാനാഥ, അനഞ്ഞായ പസംസഥ;
അമ്ഹേ ദിജോ ന പാലേതി, തേന പക്ഖീ ന ഫന്ദതീതി.
ബകജാതകം ഛട്ഠം.
൨൩൭. സാകേതജാതകം (൨-൯-൭)
൧൭൩. കോ നു ഖോ ഭഗവാ ഹേതു, ഏകച്ചേ ഇധ പുഗ്ഗലേ;
അതീവ ഹദയം നിബ്ബാതി, ചിത്തഞ്ചാപി പസീദതി.
൧൭൪. പുബ്ബേവ സന്നിവാസേന, പച്ചുപ്പന്നഹിതേന വാ;
ഏവം തം ജായതേ പേമം, ഉപ്പലംവ യഥോദകേതി.
സാകേതജാതകം സത്തമം.
൨൩൮. ഏകപദജാതകം (൨-൯-൮)
൧൭൫. ഇങ്ഘ ഏകപദം താത, അനേകത്ഥപദസ്സിതം [പദനിസ്സിതം (സീ. പീ.)];
കിഞ്ചി സങ്ഗാഹികം ബ്രൂസി, യേനത്ഥേ സാധയേമസേ.
൧൭൬. ദക്ഖേയ്യേകപദം താത, അനേകത്ഥപദസ്സിതം;
തഞ്ച സീലേന സഞ്ഞുത്തം, ഖന്തിയാ ഉപപാദിതം;
അലം മിത്തേ സുഖാപേതും, അമിത്താനം ദുഖായ ചാതി.
ഏകപദജാതകം അട്ഠമം.
൨൩൯. ഹരിതമണ്ഡൂകജാതകം (൨-൯-൯)
൧൭൭. ആസീവിസമ്പി മം [ആസീവിസം മമം (സീ. പീ.)] സന്തം, പവിട്ഠം കുമിനാമുഖം;
രുച്ചതേ ഹരിതാമാതാ, യം മം ഖാദന്തി മച്ഛകാ.
൧൭൮. വിലുമ്പതേവ പുരിസോ, യാവസ്സ ഉപകപ്പതി;
യദാ ചഞ്ഞേ വിലുമ്പന്തി, സോ വിലുത്തോ വിലുമ്പതീതി [വിലുപ്പതീതി (?)].
ഹരിതമണ്ഡൂകജാതകം നവമം.
൨൪൦. മഹാപിങ്ഗലജാതകം (൨-൯-൧൦)
൧൭൯. സബ്ബോ ജനോ ഹിംസിതോ പിങ്ഗലേന, തസ്മിം മതേ പച്ചയാ [പച്ചയം (സീ. സ്യാ. പീ.)] വേദയന്തി;
പിയോ നു തേ ആസി അകണ്ഹനേത്തോ, കസ്മാ നു ത്വം രോദസി ദ്വാരപാല.
൧൮൦. ന മേ പിയോ ആസി അകണ്ഹനേത്തോ, ഭായാമി പച്ചാഗമനായ തസ്സ;
ഇതോ ഗതോ ഹിംസേയ്യ മച്ചുരാജം, സോ ഹിംസിതോ ആനേയ്യ പുന ഇധ.
൧൮൧. ദഡ്ഢോ വാഹസഹസ്സേഹി, സിത്തോ ഘടസതേഹി സോ;
പരിക്ഖതാ ച സാ ഭൂമി, മാ ഭായി നാഗമിസ്സതീതി.
മഹാപിങ്ഗലജാതകം ദസമം.
ഉപാഹനവഗ്ഗോ നവമോ.
തസ്സുദ്ദാനം –
വരുപാഹന ഖുജ്ജ വികണ്ണകകോ, അസിതാഭുയ പഞ്ചമവച്ഛനഖോ;
ദിജ പേമവരുത്തമഏകപദം, കുമിനാമുഖ പിങ്ഗലകേന ദസാതി.