൨. ദുകനിപാതോ
൧. ദള്ഹവഗ്ഗോ
൧൫൧. രാജോവാദജാതകം (൨-൧-൧)
൧. ദള്ഹം ദള്ഹസ്സ ഖിപതി, ബല്ലികോ [മല്ലികോ (സീ. പീ.)] മുദുനാ മുദും;
സാധുമ്പി സാധുനാ ജേതി, അസാധുമ്പി അസാധുനാ;
ഏതാദിസോ അയം രാജാ, മഗ്ഗാ ഉയ്യാഹി സാരഥി.
൨. അക്കോധേന ജിനേ കോധം, അസാധും സാധുനാ ജിനേ;
ജിനേ കദരിയം ദാനേന, സച്ചേനാലികവാദിനം;
ഏതാദിസോ അയം രാജാ, മഗ്ഗാ ഉയ്യാഹി സാരഥീതി.
രാജോവാദജാതകം പഠമം.
൧൫൨. അസമേക്ഖിതകമ്മന്തം, തുരിതാഭിനിപാതിനം.
സാനി കമ്മാനി തപ്പേന്തി, ഉണ്ഹംവജ്ഝോഹിതം മുഖേ.
൪. സീഹോ ച സീഹനാദേന, ദദ്ദരം അഭിനാദയി;
സുത്വാ സീഹസ്സ നിഗ്ഘോസം, സിങ്ഗാലോ [സിഗാലോ (സീ. സ്യാ. പീ.)] ദദ്ദരേ വസം;
ഭീതോ സന്താസമാപാദി, ഹദയഞ്ചസ്സ അപ്ഫലീതി.
സിങ്ഗാലജാതകം [സിഗാലജാതകം (സീ. സ്യാ. പീ.)] ദുതിയം.
൧൫൩. സൂകരജാതകം (൨-൧-൩)
൫. ചതുപ്പദോ അഹം സമ്മ, ത്വമ്പി സമ്മ ചതുപ്പദോ;
ഏഹി സമ്മ [സീഹ (സീ. പീ.)] നിവത്തസ്സു, കിം നു ഭീതോ പലായസി.
൬. അസുചി പൂതിലോമോസി, ദുഗ്ഗന്ധോ വാസി സൂകര;
സചേ യുജ്ഝിതുകാമോസി, ജയം സമ്മ ദദാമി തേതി.
സൂകരജാതകം തതിയം.
൧൫൪. ഉരഗജാതക (൨-൧-൪)
൭. ഇധൂരഗാനം പവരോ പവിട്ഠോ, സേലസ്സ വണ്ണേന പമോക്ഖമിച്ഛം;
ബ്രഹ്മഞ്ച വണ്ണം [വക്കം (ക.)] അപചായമാനോ, ബുഭുക്ഖിതോ നോ വിതരാമി [വിസഹാമി (ക. സി. സ്യാ. പീ.)] ഭോത്തും.
൮. സോ ബ്രഹ്മഗുത്തോ ചിരമേവ ജീവ, ദിബ്യാ ച തേ പാതുഭവന്തു ഭക്ഖാ;
യോ ബ്രഹ്മവണ്ണം അപചായമാനോ, ബുഭുക്ഖിതോ നോ വിതരാസി [സബ്ബത്ഥപി സമാനം] ഭോത്തുന്തി.
ഉരഗജാതകം ചതുത്ഥം.
൧൫൫. ഭഗ്ഗജാതകം (൨-൧-൫)
൯. ജീവ വസ്സസതം ഭഗ്ഗ [ഗഗ്ഗ (സീ. പീ.)], അപരാനി ച വീസതിം [വീസതി (സ്യാ. ക.)];
മാ മം പിസാചാ ഖാദന്തു, ജീവ ത്വം സരദോ സതം.
൧൦. ത്വമ്പി വസ്സസതം ജീവ, അപരാനി ച വീസതിം;
വിസം പിസാചാ ഖാദന്തു, ജീവ ത്വം സരദോ സതന്തി.
ഭഗ്ഗജാതകം പഞ്ചമം.
൧൫൬. അലീനചിത്തജാതകം (൨-൧-൬)
൧൧. അലീനചിത്തം നിസ്സായ, പഹട്ഠാ മഹതീ ചമൂ;
കോസലം സേനാസന്തുട്ഠം, ജീവഗ്ഗാഹം അഗാഹയി.
൧൨. ഏവം നിസ്സയസമ്പന്നോ, ഭിക്ഖു ആരദ്ധവീരിയോ;
ഭാവയം കുസലം ധമ്മം, യോഗക്ഖേമസ്സ പത്തിയാ;
പാപുണേ അനുപുബ്ബേന, സബ്ബസംയോജനക്ഖയന്തി.
അലീനചിത്തജാതകം ഛട്ഠം.
൧൫൭. ഗുണജാതകം (൨-൧-൭)
൧൩. യേന കാമം പണാമേതി, ധമ്മോ ബലവതം മിഗീ;
ഉന്നദന്തീ വിജാനാഹി, ജാതം സരണതോ ഭയം.
൧൪. അപി ചേപി ദുബ്ബലോ മിത്തോ, മിത്തധമ്മേസു തിട്ഠതി;
സോ ഞാതകോ ച ബന്ധു ച, സോ മിത്തോ സോ ച മേ സഖാ;
ദാഠിനി മാതിമഞ്ഞിത്ഥോ [മഞ്ഞിവോ (സ്യാ.), മഞ്ഞവ്ഹോ (ക.)], സിങ്ഗാലോ മമ പാണദോതി.
ഗുണജാതകം സത്തമം.
൧൫൮. സുഹനുജാതകം (൨-൧-൮)
൧൫. നയിദം വിസമസീലേന, സോണേന സുഹനൂ സഹ;
സുഹനൂപി താദിസോയേവ, യോ സോണസ്സ സഗോചരോ.
൧൬. പക്ഖന്ദിനാ പഗബ്ഭേന, നിച്ചം സന്ദാനഖാദിനാ;
സമേതി പാപം പാപേന, സമേതി അസതാ അസന്തി.
സുഹനുജാതകം അട്ഠമം.
൧൫൯. മോരജാതകം (൨-൧-൯)
൧൭. ഉദേതയം ചക്ഖുമാ ഏകരാജാ, ഹരിസ്സവണ്ണോ പഥവിപ്പഭാസോ [പഠവിപ്പഭാസോ (സീ. സ്യാ. പീ.)];
തം തം നമസ്സാമി ഹരിസ്സവണ്ണം പഥവിപ്പഭാസം, തയാജ്ജ ഗുത്താ വിഹരേമു ദിവസം.
യേ ബ്രാഹ്മണാ വേദഗൂ സബ്ബധമ്മേ, തേ മേ നമോ തേ ച മം പാലയന്തു;
നമത്ഥു ബുദ്ധാനം [ബുദ്ധാന (?)] നമത്ഥു ബോധിയാ, നമോ വിമുത്താനം [വിമുത്താന (?)] നമോ വിമുത്തിയാ;
ഇമം സോ പരിത്തം കത്വാ, മോരോ ചരതി ഏസനാ.
൧൮. അപേതയം ചക്ഖുമാ ഏകരാജാ, ഹരിസ്സവണ്ണോ പഥവിപ്പഭാസോ;
തം തം നമ്മസ്സാമി ഹരിസ്സവണ്ണം പഥവിപ്പഭാസം, തയാജ്ജ ഗുത്താ വിഹരേമു രത്തിം.
യേ ബ്രാഹ്മണാ വേദഗൂ സബ്ബധമ്മേ, തേ മേ നമോ തേ ച മം പാലയന്തു;
നമത്ഥു ബുദ്ധാനം നമത്ഥു ബോധിയാ, നമോ വിമുത്താനം നമോ വിമുത്തിയാ;
ഇമം സോ പരിത്തം കത്വാ, മോരോ വാസമകപ്പയീതി.
മോരജാതകം നവമം.
൧൬൦. വിനീലജാതകം (൨-൧-൧൦)
൧൯. ഏവമേവ നൂന [നു (ക.)] രാജാനം, വേദേഹം മിഥിലഗ്ഗഹം;
അസ്സാ വഹന്തി ആജഞ്ഞാ, യഥാ ഹംസാ വിനീലകം.
൨൦. വിനീല ദുഗ്ഗം ഭജസി, അഭൂമിം താത സേവസി;
ഗാമന്തകാനി [ഗാമന്തികാനി (സീ.), ഗാമന്തരാനി (ക.)] സേവസ്സു, ഏതം മാതാലയം തവാതി.
വിനീലജാതകം ദസമം.
ദള്ഹവഗ്ഗോ പഠമോ.
തസ്സുദ്ദാനം –
വരബല്ലിക ദദ്ദര സൂകരകോ, ഉരഗൂത്തമ പഞ്ചമഭഗ്ഗവരോ;
മഹതീചമു യാവ സിങ്ഗാലവരോ, സുഹനുത്തമ മോര വിനീലം ദസാതി.
൨. സന്ഥവവഗ്ഗോ
൧൬൧. ഇന്ദസമാനഗോത്തജാതകം (൨-൨-൧)
൨൧. ന സന്ഥവം [സന്ധവം (ക.)] കാപുരിസേന കയിരാ, അരിയോ അനരിയേന പജാനമത്ഥം;
ചിരാനുവുത്ഥോപി കരോതി പാപം, ഗജോ യഥാ ഇന്ദസമാനഗോത്തം.
൨൨. യം ത്വേവ ജഞ്ഞാ സദിസോ മമന്തി, സീലേന പഞ്ഞായ സുതേന ചാപി;
തേനേവ മേത്തിം കയിരാഥ സദ്ധിം, സുഖോ ഹവേ സപ്പുരിസേന സങ്ഗമോതി.
ഇന്ദസമാനഗോത്തജാതകം പഠമം.
൧൬൨. സന്ഥവജാതകം (൨-൨-൨)
൨൩. ന സന്ഥവസ്മാ പരമത്ഥി പാപിയോ, യോ സന്ഥവോ [സന്ധവോ (ക.)] കാപുരിസേന ഹോതി;
സന്തപ്പിതോ സപ്പിനാ പായസേന [പായാസേന (ക.)], കിച്ഛാകതം പണ്ണകുടിം അദയ്ഹി [അദഡ്ഢഹി (സീ. സ്യാ.), അദട്ഠഹി (പീ.), അദദ്ദഹി (?)].
൨൪. ന സന്ഥവസ്മാ പരമത്ഥി സേയ്യോ, യോ സന്ഥവോ സപ്പുരിസേന ഹോതി;
സീഹസ്സ ബ്യഗ്ഘസ്സ ച ദീപിനോ ച, സാമാ മുഖം ലേഹതി സന്ഥവേനാതി.
സന്ഥവജാതകം ദുതിയം.
൧൬൩. സുസീമജാതകം (൨-൨-൩)
൨൫. കാളാ മിഗാ സേതദന്താ തവീമേ [തവ ഇമേ (സീ. സ്യാ. പീ.)], പരോസതം ഹേമജാലാഭിഛന്നാ [ഹേമജാലാഭിസഞ്ഛന്നാ (സീ.)];
തേ തേ ദദാമീതി സുസീമ ബ്രൂസി, അനുസ്സരം പേത്തിപിതാമഹാനം.
൨൬. കാളാ മിഗാ സേതദന്താ മമീമേ [മമ ഇമേ (സീ. പീ.)], പരോസതം ഹേമജാലാഭിച്ഛന്നാ;
തേ തേ ദദാമീതി വദാമി മാണവ, അനുസ്സരം പേത്തിപിതാമഹാനന്തി.
സുസീമജാതകം തതിയം.
൧൬൪. ഗിജ്ഝജാതകം (൨-൨-൪)
൨൭. യം നു ഗിജ്ഝോ യോജനസതം, കുണപാനി അവേക്ഖതി;
കസ്മാ ജാലഞ്ച പാസഞ്ച, ആസജ്ജാപി ന ബുജ്ഝസി.
൨൮. യദാ പരാഭവോ ഹോതി, പോസോ ജീവിതസങ്ഖയേ;
അഥ ജാലഞ്ച പാസഞ്ച, ആസജ്ജാപി ന ബുജ്ഝതീതി.
ഗിജ്ഝജാതകം ചതുത്ഥം.
൧൬൫. നകുലജാതകം (൨-൨-൫)
൨൯. സന്ധിം കത്വാ അമിത്തേന, അണ്ഡജേന ജലാബുജ;
വിവരിയ ദാഠം സേസി [സയസി (സീ. സ്യാ. പീ.)], കുതോ തേ ഭയമാഗതം.
൩൦. സങ്കേഥേവ [സങ്കതേവ (ക.)] അമിത്തസ്മിം, മിത്തസ്മിമ്പി ന വിസ്സസേ;
അഭയാ ഭയമുപ്പന്നം, അപി മൂലാനി കന്തതീതി [മൂലം നികന്തതീതി (സീ.)].
നകുലജാതകം പഞ്ചമം.
൧൬൬. ഉപസാളകജാതകം (൨-൨-൬)
൩൧. ഉപസാളകനാമാനി [ഉപസാള്ഹകനാമാനം (സീ. സ്യാ. പീ.)], സഹസ്സാനി ചതുദ്ദസ;
അസ്മിം പദേസേ ദഡ്ഢാനി, നത്ഥി ലോകേ അനാമതം.
൩൨. യമ്ഹി സച്ചഞ്ച ധമ്മോ ച, അഹിംസാ സംയമോ ദമോ;
ഏതം അരിയാ സേവന്തി, ഏതം ലോകേ അനാമതന്തി.
ഉപസാളകജാതകം ഛട്ഠം.
൧൬൭. സമിദ്ധിജാതകം (൨-൨-൭)
൩൩. അഭുത്വാ ഭിക്ഖസി ഭിക്ഖു, ന ഹി ഭുത്വാന ഭിക്ഖസി;
ഭുത്വാന ഭിക്ഖു ഭിക്ഖസ്സു, മാ തം കാലോ ഉപച്ചഗാ.
൩൪. കാലം വോഹം ന ജാനാമി, ഛന്നോ കാലോ ന ദിസ്സതി;
തസ്മാ അഭുത്വാ ഭിക്ഖാമി, മാ മം കാലോ ഉപച്ചഗാതി.
സമിദ്ധിജാതകം സത്തമം.
൧൬൮. സകുണഗ്ഘിജാതകം (൨-൨-൮)
൩൫. സേനോ ബലസാ പതമാനോ, ലാപം ഗോചരഠായിനം;
സഹസാ അജ്ഝപ്പത്തോവ, മരണം തേനുപാഗമി.
൩൬. സോഹം നയേന സമ്പന്നോ, പേത്തികേ ഗോചരേ രതോ;
അപേതസത്തു മോദാമി, സമ്പസ്സം അത്ഥമത്തനോതി.
സകുണഗ്ഘിജാതകം അട്ഠമം.
൧൬൯. അരകജാതകം (൨-൨-൯)
൩൭. യോ വേ മേത്തേന ചിത്തേന, സബ്ബലോകാനുകമ്പതി;
ഉദ്ധം അധോ ച തിരിയം, അപ്പമാണേന സബ്ബസോ.
൩൮. അപ്പമാണം ഹിതം ചിത്തം, പരിപുണ്ണം സുഭാവിതം;
യം പമാണകതം കമ്മം, ന തം തത്രാവസിസ്സതീതി.
അരകജാതകം നവമം.
൧൭൦. കകണ്ടകജാതകം (൨-൨-൧൦)
൩൯. നായം പുരേ ഉണ്ണമതി [ഉന്നമതി (സ്യാ.)], തോരണഗ്ഗേ കകണ്ടകോ;
മഹോസധ വിജാനാഹി, കേന ഥദ്ധോ കകണ്ടകോ.
൪൦. അലദ്ധപുബ്ബം ലദ്ധാന, അഡ്ഢമാസം കകണ്ടകോ;
അതിമഞ്ഞതി രാജാനം, വേദേഹം മിഥിലഗ്ഗഹന്തി.
കകണ്ടകജാതകം ദസമം.
സന്ഥവവഗ്ഗോ ദുതിയോ.
തസ്സുദ്ദാനം –
അഥ ഇന്ദസമാന സപണ്ണകുടി, സുസിമുത്തമ ഗിജ്ഝ ജലാബുജകോ;
ഉപസാളക ഭിക്ഖു സലാപവരോ, അഥ മേത്തവരോ ദസപുണ്ണമതീതി.
൩. കല്യാണവഗ്ഗോ
൧൭൧. കല്യാണധമ്മജാതകം (൨-൩-൧)
൪൧. കല്യാണധമ്മോതി യദാ ജനിന്ദ, ലോകേ സമഞ്ഞം അനുപാപുണാതി;
തസ്മാ ന ഹിയ്യേഥ [ഹീയേഥ (സീ.)] നരോ സപഞ്ഞോ, ഹിരിയാപി സന്തോ ധുരമാദിയന്തി.
൪൨. സായം സമഞ്ഞാ ഇധ മജ്ജ പത്താ, കല്യാണധമ്മോതി ജനിന്ദ ലോകേ;
താഹം സമേക്ഖം ഇധ പബ്ബജിസ്സം, ന ഹി മത്ഥി ഛന്ദോ ഇധ കാമഭോഗേതി.
കല്യാണധമ്മജാതകം പഠമം.
൧൭൨. ദദ്ദരജാതകം (൨-൩-൨)
൪൩. കോ നു സദ്ദേന മഹതാ, അഭിനാദേതി ദദ്ദരം;