൧൦. സിങ്ഗാലവഗ്ഗോ
൨൪൧. സബ്ബദാഠിജാതകം (൨-൧൦-൧)
൧൮൨. സിങ്ഗാലോ മാനഥദ്ധോ ച, പരിവാരേന അത്ഥികോ;
പാപുണി മഹതിം ഭൂമിം, രാജാസി സബ്ബദാഠിനം.
൧൮൩. ഏവമേവ മനുസ്സേസു, യോ ഹോതി പരിവാരവാ;
സോ ഹി തത്ഥ മഹാ ഹോതി, സിങ്ഗാലോ വിയ ദാഠിനന്തി.
സബ്ബദാഠിജാതകം പഠമം.
൨൪൨. സുനഖജാതകം (൨-൧൦-൨)
൧൮൪. ബാലോ വതായം സുനഖോ, യോ വരത്തം [യോ ച യോത്തം (ക.)] ന ഖാദതി;
ബന്ധനാ ച പമുഞ്ചേയ്യ, അസിതോ ച ഘരം വജേ.
൧൮൫. അട്ഠിതം മേ മനസ്മിം മേ, അഥോ മേ ഹദയേ കതം;
കാലഞ്ച പടികങ്ഖാമി, യാവ പസ്സുപതൂ ജനോ [പസുപതുജ്ജനോ (സ്യാ. ക.)].
സുനഖജാതകം ദുതിയം.
൨൪൩. ഗുത്തിലജാതകം (൨-൧൦-൩)
൧൮൬. സത്തതന്തിം സുമധുരം, രാമണേയ്യം അവാചയിം;
സോ മം രങ്ഗമ്ഹി അവ്ഹേതി, സരണം മേ ഹോഹി കോസിയ.
൧൮൭. അഹം തം സരണം സമ്മ [അഹം തേ സരണം ഹോമി (വി. വ. ൩൨൮)], അഹമാചരിയപൂജകോ;
ന തം ജയിസ്സതി സിസ്സോ, സിസ്സമാചരിയ ജേസ്സസീതി.
ഗുത്തിലജാതകം തതിയം.
൨൪൪. വിഗതിച്ഛജാതകം (൨-൧൦-൪)
൧൮൮. യം പസ്സതി ന തം ഇച്ഛതി, യഞ്ച ന പസ്സതി തം കിരിച്ഛതി;
മഞ്ഞാമി ചിരം ചരിസ്സതി, ന ഹി തം ലച്ഛതി യം സ ഇച്ഛതി.
൧൮൯. യം ലഭതി ന തേന തുസ്സതി, യഞ്ച പത്ഥേതി ലദ്ധം ഹീളേതി;
ഇച്ഛാ ഹി അനന്തഗോചരാ, വിഗതിച്ഛാന [വീതിച്ഛാനം (സീ. പീ.)] നമോ കരോമസേതി.
വിഗതിച്ഛ [വീതിച്ഛ (സീ. പീ.)] ജാതകം ചതുത്ഥം.
൨൪൫. മൂലപരിയായജാതകം (൨-൧൦-൫)
൧൯൦. കാലോ ഘസതി ഭൂതാനി, സബ്ബാനേവ സഹത്തനാ;
യോ ച കാലഘസോ ഭൂതോ, സ ഭൂതപചനിം പചി.
൧൯൧. ബഹൂനി നരസീസാനി, ലോമസാനി ബ്രഹാനി ച;
ഗീവാസു പടിമുക്കാനി, കോചിദേവേത്ഥ കണ്ണവാതി.
മൂലപരിയായജാതകം പഞ്ചമം.
൨൪൬. ബാലോവാദജാതകം (൨-൧൦-൬)
൧൯൨. ഹന്ത്വാ ഛേത്വാ [ഝത്വാ (സീ. പീ.), ഘത്വാ (സ്യാ.)] വധിത്വാ ച, ദേതി ദാനം അസഞ്ഞതോ;
ഏദിസം ഭത്തം ഭുഞ്ജമാനോ, സ പാപമുപലിമ്പതി [സ പാപേന ഉപലിപ്പതി (സീ. പീ.)].
൧൯൩. പുത്തദാരമ്പി ചേ ഹന്ത്വാ, ദേതി ദാനം അസഞ്ഞതോ;
ഭുഞ്ജമാനോപി സപ്പഞ്ഞോ, ന പാപമുപലിമ്പതീതി.
ബാലോവാദജാതകം ഛട്ഠം.
൨൪൭. പാദഞ്ജലീജാതകം (൨-൧൦-൭)
൧൯൪. അദ്ധാ പാദഞ്ജലീ സബ്ബേ, പഞ്ഞായ അതിരോചതി;
തഥാ ഹി ഓട്ഠം ഭഞ്ജതി, ഉത്തരിം നൂന പസ്സതി.
൧൯൫. നായം ധമ്മം അധമ്മം വാ, അത്ഥാനത്ഥഞ്ച ബുജ്ഝതി;
അഞ്ഞത്ര ഓട്ഠനിബ്ഭോഗാ, നായം ജാനാതി കിഞ്ചനന്തി.
പാദഞ്ജലീജാതകം സത്തമം.
൨൪൮. കിംസുകോപമജാതകം (൨-൧൦-൮)
൧൯൬. സബ്ബേഹി കിംസുകോ ദിട്ഠോ, കിംന്വേത്ഥ വിചികിച്ഛഥ;
ന ഹി സബ്ബേസു ഠാനേസു, സാരഥീ പരിപുച്ഛിതോ.
൧൯൭. ഏവം സബ്ബേഹി ഞാണേഹി, യേസം ധമ്മാ അജാനിതാ;
തേ വേ ധമ്മേസു കങ്ഖന്തി, കിംസുകസ്മിംവ ഭാതരോതി.
കിംസുകോപമജാതകം അട്ഠമം.
൨൪൯. സാലകജാതകം (൨-൧൦-൯)
൧൯൮. ഏകപുത്തകോ ഭവിസ്സസി, ത്വഞ്ച നോ ഹേസ്സസി ഇസ്സരോ കുലേ;
ഓരോഹ ദുമസ്മാ സാലക, ഏഹി ദാനി ഘരകം വജേമസേ.
൧൯൯. നനു മം സുഹദയോതി [നനു മം ഹദയേതി (സീ. പീ.)] മഞ്ഞസി, യഞ്ച മം ഹനസി വേളുയട്ഠിയാ;
പക്കമ്ബവനേ രമാമസേ, ഗച്ഛ ത്വം ഘരകം യഥാസുഖന്തി.
സാലകജാതകം നവമം.
൨൫൦. കപിജാതകം (൨-൧൦-൧൦)
൨൦൦. അയം ഇസീ ഉപസമസംയമേ രതോ, സ തിട്ഠതി [സന്തിട്ഠതി (സീ. പീ.)] സിസിരഭയേന അട്ടിതോ;
ഹന്ദ അയം പവിസതുമം അഗാരകം, വിനേതു സീതം ദരഥഞ്ച കേവലം.
൨൦൧. നായം ഇസീ ഉപസമസംയമേ രതോ, കപീ അയം ദുമവരസാഖഗോചരോ;
സോ ദൂസകോ രോസകോ ചാപി ജമ്മോ, സചേവജേമമ്പി [സചേ + ആവജേ + ഇമമ്പി] ദൂസേയ്യഗാരന്തി [ദൂസയേ ഘരന്തി (സീ. സ്യാ. പീ.)].
കപിജാതകം ദസമം.
സിങ്ഗാലവഗ്ഗോ ദസമോ.
തസ്സുദ്ദാനം –
അഥ രാജാ സിങ്ഗാലവരോ സുനഖോ, തഥാ കോസിയ ഇച്ഛതി കാലഘസോ;
അഥ ദാനവരോട്ഠപി സാരഥിനാ, പുനമ്ബവനഞ്ച സിസിരകപി ദസാതി.
അഥ വഗ്ഗുദ്ദാനം –
ദള്ഹഞ്ച വഗ്ഗം അപരേന സന്ഥവം, കല്യാണവഗ്ഗാസദിസോ ച രൂഹകം;
നതംദള്ഹ ബീരണഥമ്ഭകം പുന, കാസാവുപാഹന സിങ്ഗാലകേന ദസാതി.
ദുകനിപാതം നിട്ഠിതം.