൮. കാസാവവഗ്ഗോ

൨൨൧. കാസാവജാതകം (൨-൮-൧)

൧൪൧. അനിക്കസാവോ കാസാവം, യോ വത്ഥം പരിദഹിസ്സതി [പരിദഹേസ്സതി (സീ. പീ.)];

അപേതോ ദമസച്ചേന, ന സോ കാസാവമരഹതി.

൧൪൨. യോ ച വന്തകസാവസ്സ, സീലേസു സുസമാഹിതോ;

ഉപേതോ ദമസച്ചേന, സ വേ കാസാവമരഹതീതി.

കാസാവജാതകം പഠമം.

൨൨൨. ചൂളനന്ദിയജാതകം (൨-൮-൨)

൧൪൩. ഇദം തദാചരിയവചോ, പാരാസരിയോ യദബ്രവി [പോരാണാചരിയോബ്രവി (ക.)];

മാസു ത്വം അകരി [അകരാ (സീ. പീ.)] പാപം, യം ത്വം പച്ഛാ കതം തപേ.

൧൪൪. യാനി കരോതി പുരിസോ, താനി അത്തനി പസ്സതി;

കല്യാണകാരീ കല്യാണം, പാപകാരീ ച പാപകം;

യാദിസം വപതേ ബീജം, താദിസം ഹരതേ ഫലന്തി.

ചൂളനന്ദിയജാതകം ദുതിയം.

൨൨൩. പുടഭത്തജാതകം (൨-൮-൩)

൧൪൫. നമേ നമന്തസ്സ ഭജേ ഭജന്തം, കിച്ചാനുകുബ്ബസ്സ കരേയ്യ കിച്ചം;

നാനത്ഥകാമസ്സ കരേയ്യ അത്ഥം, അസമ്ഭജന്തമ്പി ന സമ്ഭജേയ്യ.

൧൪൬. ചജേ ചജന്തം വനഥം ന കയിരാ, അപേതചിത്തേന ന സമ്ഭജേയ്യ;

ദിജോ ദുമം ഖീണഫലന്തി ഞത്വാ, അഞ്ഞം സമേക്ഖേയ്യ മഹാ ഹി ലോകോതി.

പുടഭത്തജാതകം തതിയം.

൨൨൪. കുമ്ഭിലജാതകം (൨-൮-൪)

൧൪൭. യസ്സേതേ ചതുരോ ധമ്മാ, വാനരിന്ദ യഥാ തവ;

സച്ചം ധമ്മോ ധിതി ചാഗോ, ദിട്ഠം സോ അതിവത്തതി.

൧൪൮. യസ്സ ചേതേ ന വിജ്ജന്തി, ഗുണാ പരമഭദ്ദകാ;

സച്ചം ധമ്മോ ധിതി ചാഗോ, ദിട്ഠം സോ നാതിവത്തതീതി.

കുമ്ഭിലജാതകം ചതുത്ഥം.

൨൨൫. ഖന്തിവണ്ണജാതകം (൨-൮-൫)

൧൪൯. അത്ഥി മേ പുരിസോ ദേവ, സബ്ബകിച്ചേസു ബ്യാവടോ [വാവടോ (ക.)];

തസ്സ ചേകോപരാധത്ഥി, തത്ഥ ത്വം കിന്തി മഞ്ഞസി.

൧൫൦. അമ്ഹാകമ്പത്ഥി പുരിസോ, ഏദിസോ ഇധ വിജ്ജതി;

ദുല്ലഭോ അങ്ഗസമ്പന്നോ, ഖന്തിരസ്മാക രുച്ചതീതി.

ഖന്തിവണ്ണജാതകം പഞ്ചമം.

൨൨൬. കോസിയജാതകം (൨-൮-൬)

൧൫൧. കാലേ നിക്ഖമനാ സാധു, നാകാലേ സാധു നിക്ഖമോ;

അകാലേന ഹി നിക്ഖമ്മ, ഏകകമ്പി ബഹുജ്ജനോ;

ന കിഞ്ചി അത്ഥം ജോതേതി, ധങ്കസേനാവ കോസിയം.

൧൫൨. ധീരോ ച വിധിവിധാനഞ്ഞൂ, പരേസം വിവരാനുഗൂ;

സബ്ബാമിത്തേ വസീകത്വാ, കോസിയോവ സുഖീ സിയാതി.

കോസിയജാതകം ഛട്ഠം.

൨൨൭. ഗൂഥപാണജാതകം (൨-൮-൭)

൧൫൩. സൂരോ സൂരേന സങ്ഗമ്മ, വിക്കന്തേന പഹാരിനാ;

ഏഹി നാഗ നിവത്തസ്സു, കിം നു ഭീതോ പലായസി;

പസ്സന്തു അങ്ഗമഗധാ, മമ തുയ്ഹഞ്ച വിക്കമം.

൧൫൪. ന തം പാദാ വധിസ്സാമി, ന ദന്തേഹി ന സോണ്ഡിയാ;

മീള്ഹേന തം വധിസ്സാമി, പൂതി ഹഞ്ഞതു പൂതിനാതി.

ഗൂഥപാണജാതകം സത്തമം.

൨൨൮. കാമനീതജാതകം (൨-൮-൮)

൧൫൫. തയോ ഗിരിം അന്തരം കാമയാമി, പഞ്ചാലാ കുരുയോ കേകകേ ച [കുരയോ കേകയേ ച (സീ.)];

തതുത്തരിം [തദുത്തരിം (ക.)] ബ്രാഹ്മണ കാമയാമി, തികിച്ഛ മം ബ്രാഹ്മണ കാമനീതം.

൧൫൬. കണ്ഹാഹിദട്ഠസ്സ കരോന്തി ഹേകേ, അമനുസ്സപവിട്ഠസ്സ [അമനുസ്സവദ്ധസ്സ (സീ. പീ.), അമനുസ്സവിട്ഠസ്സ (സ്യാ.)] കരോന്തി പണ്ഡിതാ;

ന കാമനീതസ്സ കരോതി കോചി, ഓക്കന്തസുക്കസ്സ ഹി കാ തികിച്ഛാതി.

കാമനീതജാതകം അട്ഠമം.

൨൨൯. പലായിതജാതകം (൨-൮-൯)

൧൫൭. ഗജഗ്ഗമേഘേഹി ഹയഗ്ഗമാലിഭി, രഥൂമിജാതേഹി സരാഭിവസ്സേഭി [സരാഭിവസ്സഭി (സ്യാ. സീ. അട്ഠ.), സരാഭിവസ്സിഭി (?)];

ഥരുഗ്ഗഹാവട്ട [ധനുഗ്ഗഹാവട്ട (ക.)] ദള്ഹപ്പഹാരിഭി, പരിവാരിതാ തക്കസിലാ സമന്തതോ.

൧൫൮. [അഭിധാവഥാ ച പതഥാ ച, വിവിധവിനദിതാ ച ദന്തിഭി; വത്തതജ്ജ തുമുലോ ഘോസോ, യഥാ വിജ്ജുതാ ജലധരസ്സ ഗജ്ജതോതി; (സീ. പീ. ക.)] അഭിധാവഥ ചൂപധാവഥ ച [അഭിധാവഥാ ചുപ്പതഥാ ച (സ്യാ.)], വിവിധാ വിനാദിതാ [വിനാദിതത്ഥ (ക.)] വദന്തിഭി;

വത്തതജ്ജ തുമുലോ ഘോസോ യഥാ, വിജ്ജുലതാ ജലധരസ്സ ഗജ്ജതോതി [അഭിധാവഥാ ച പതഥാ ച, വിവിധവിനദിതാ ച ദന്തിഭി; വത്തതജ്ജ തുമുലോ ഘോസോ, യഥാ വിജ്ജുതാ ജലധരസ്സ ഗജ്ജതോതി; (സീ. പീ. ക.)].

പലായിതജാതകം നവമം.

൨൩൦. ദുതിയപലായിതജാതകം (൨-൮-൧൦)

൧൫൯. ധജമപരിമിതം അനന്തപാരം, ദുപ്പസഹംധങ്കേഹി സാഗരംവ [സാഗരമിവ (സീ. സ്യാ. പീ.)];

ഗിരിമിവഅനിലേന ദുപ്പസയ്ഹോ [ദുപ്പസഹോ (സീ. പീ. ക.)], ദുപ്പസഹോ അഹമജ്ജതാദിസേന.

൧൬൦. മാ ബാലിയം വിലപി [വിപ്പലപി (ബഹൂസു)] ന ഹിസ്സ താദിസം, വിഡയ്ഹസേ [വിളയ്ഹസേ (സീ. പീ.)] ന ഹി ലഭസേ നിസേധകം;

ആസജ്ജസി ഗജമിവ ഏകചാരിനം, യോ തം പദാ നളമിവ പോഥയിസ്സതീതി.

ദുതിയപലായിതജാതകം ദസമം.

കാസാവവഗ്ഗോ അട്ഠമോ.

തസ്സുദ്ദാനം –

വരവത്ഥവചോ ദുമഖീണഫലം, ചതുരോധമ്മവരം പുരിസുത്തമ;

ധങ്കമഗധാ ച തയോഗിരിനാമ, ഗജഗ്ഗവരോ ധജവരേന ദസാതി.