൭. ബീരണഥമ്ഭവഗ്ഗോ
൨൧൧. സോമദത്തജാതകം (൨-൭-൧)
൧൨൧. അകാസി യോഗ്ഗം ധുവമപ്പമത്തോ, സംവച്ഛരം ബീരണഥമ്ഭകസ്മിം;
ബ്യാകാസി സഞ്ഞം പരിസം വിഗയ്ഹ, ന നിയ്യമോ തായതി അപ്പപഞ്ഞം.
൧൨൨. ദ്വയം യാചനകോ താത, സോമദത്ത നിഗച്ഛതി;
അലാഭം ധനലാഭം വാ, ഏവം ധമ്മാ ഹി യാചനാതി.
സോമദത്തജാതകം പഠമം.
൨൧൨. ഉച്ഛിട്ഠഭത്തജാതകം (൨-൭-൨)
൧൨൩. അഞ്ഞോ ഉപരിമോ വണ്ണോ, അഞ്ഞോ വണ്ണോ ച ഹേട്ഠിമോ;
ബ്രാഹ്മണീ ത്വേവ പുച്ഛാമി, കിം ഹേട്ഠാ കിഞ്ച ഉപ്പരി.
൧൨൪. അഹം നടോസ്മി ഭദ്ദന്തേ, ഭിക്ഖകോസ്മി ഇധാഗതോ;
അയഞ്ഹി കോട്ഠമോതിണ്ണോ, അയം സോ യം [ത്വം (ക.)] ഗവേസസീതി.
ഉച്ഛിട്ഠഭത്തജാതകം ദുതിയം.
൨൧൩. ഭരുജാതകം (൨-൭-൩)
൧൨൫. ഇസീനമന്തരം കത്വാ, ഭരുരാജാതി [കുരുരാജാതി (ക.)] മേ സുതം;
ഉച്ഛിന്നോ സഹ രട്ഠേഹി [രട്ഠേന (സീ. പീ.)], സരാജാ വിഭവങ്ഗതോ.
൧൨൬. തസ്മാ ഹി ഛന്ദാഗമനം, നപ്പസംസന്തി പണ്ഡിതാ;
അദുട്ഠചിത്തോ ഭാസേയ്യ, ഗിരം സച്ചുപസംഹിതന്തി.
ഭരുജാതകം [കുരുരാതകം (ക.)] തതിയം.
൨൧൪. പുണ്ണനദീജാതകം (൨-൭-൪)
൧൨൭. പുണ്ണം നദിം യേന ച പേയ്യമാഹു, ജാതം യവം യേന ച ഗുയ്ഹമാഹു;
ദൂരം ഗതം യേന ച അവ്ഹയന്തി, സോ ത്യാഗതോ [ത്യാഭതോ (സ്യാ. ക.) പഹേളിഗാഥാഭാവോ മനസി കാതബ്ബോ] ഹന്ദ ച ഭുഞ്ജ ബ്രാഹ്മണ.
൧൨൮. യതോ മം സരതീ രാജാ, വായസമ്പി പഹേതവേ;
ഹംസാ കോഞ്ചാ മയൂരാ ച [ഹംസകോഞ്ചമയൂരാനം (ക. അട്ഠ. പാഠന്തരം)], അസതീയേവ പാപിയാതി.
പുണ്ണനദീജാതകം ചതുത്ഥം.
൨൧൫. കച്ഛപജാതകം (൨-൭-൫)
൧൨൯. അവധീ വത അത്താനം, കച്ഛപോ ബ്യാഹരം ഗിരം [കച്ഛപോവ പബ്യാഹരം (സ്യാ.), കച്ഛപോ സോ പബ്യാഹരം (ക.)];
സുഗ്ഗഹീതസ്മിം കട്ഠസ്മിം, വാചായ സകിയാവധി.
൧൩൦. ഏതമ്പി ദിസ്വാ നരവീരിയസേട്ഠ, വാചം പമുഞ്ചേ കുസലം നാതിവേലം;
പസ്സസി ബഹുഭാണേന, കച്ഛപം ബ്യസനം ഗതന്തി.
കച്ഛപജാതകം പഞ്ചമം.
൨൧൬. മച്ഛജാതകം (൨-൭-൬)
൧൩൧. ന മായമഗ്ഗി തപതി, ന സൂലോ സാധുതച്ഛിതോ;
യഞ്ച മം മഞ്ഞതേ മച്ഛീ, അഞ്ഞം സോ രതിയാ ഗതോ.
൧൩൨. സോ മം ദഹതി രാഗഗ്ഗി, ചിത്തം ചൂപതപേതി മം;
ജാലിനോ മുഞ്ചഥായിരാ മം, ന കാമേ ഹഞ്ഞതേ ക്വചീതി.
മച്ഛജാതകം ഛട്ഠം.
൨൧൭. സേഗ്ഗുജാതകം (൨-൭-൭)
൧൩൩. സബ്ബോ ലോകോ അത്തമനോ അഹോസി, അകോവിദാ ഗാമധമ്മസ്സ സേഗ്ഗു;
കോമാരി കോ നാമ [കോമാരികാ നാമ (ക.), കോമാരികോ നാമ (സ്യാ. പീ.)] തവജ്ജ ധമ്മോ, യം ത്വം ഗഹിതാ പവനേ പരോദസി.
൧൩൪. യോ ദുക്ഖഫുട്ഠായ ഭവേയ്യ താണം, സോ മേ പിതാ ദുബ്ഭി വനേ കരോതി;
സാ കസ്സ കന്ദാമി വനസ്സ മജ്ഝേ, യോ തായിതാ സോ സഹസം കരോതീതി.
സേഗ്ഗുജാതകം സത്തമം.
൨൧൮. കൂടവാണിജജാതകം (൨-൭-൮)
൧൩൫. സഠസ്സ സാഠേയ്യമിദം സുചിന്തിതം, പച്ചോഡ്ഡിതം പടികൂടസ്സ കൂടം;
ഫാലഞ്ചേ ഖാദേയ്യും [അദേയ്യും (സീ. പീ.)] മൂസികാ, കസ്മാ കുമാരം കുലലാ ന [നോ (സീ. സ്യാ. പീ.)] ഹരേയ്യും.
൧൩൬. കൂടസ്സ ഹി സന്തി [സന്തീധ (ക.)] കൂടകൂടാ, ഭവതി [ഭവന്തി (ക.)] ചാപി നികതിനോ നികത്യാ;
ദേഹി പുത്തനട്ഠ ഫാലനട്ഠസ്സ ഫാലം, മാ തേ പുത്തമഹാസി ഫാലനട്ഠോതി.
കൂടവാണിജജാതകം അട്ഠമം.
൨൧൯. ഗരഹിതജാതകം (൨-൭-൯)
൧൩൭. ഹിരഞ്ഞം മേ സുവണ്ണം മേ, ഏസാ രത്തിം ദിവാ കഥാ;
ദുമ്മേധാനം മനുസ്സാനം, അരിയധമ്മം അപസ്സതം.
൧൩൮. ദ്വേ ദ്വേ ഗഹപതയോ ഗേഹേ, ഏകോ തത്ഥ അമസ്സുകോ;
ലമ്ബത്ഥനോ വേണികതോ, അഥോ അങ്കിതകണ്ണകോ;
കീതോ ധനേന ബഹുനാ, സോ തം വിതുദതേ ജനന്തി.
ഗരഹിതജാതകം നവമം.
൨൨൦. ധമ്മധജജാതകം (൨-൭-൧൦)
൧൩൯. സുഖം ജീവിതരൂപോസി, രട്ഠാ വിവനമാഗതോ;
സോ ഏകകോ രുക്ഖമൂലേ [അരഞ്ഞസ്മിം (സീ. സ്യാ. പീ.)], കപണോ വിയ ഝായസി.
൧൪൦. സുഖം ജീവിതരൂപോസ്മി, രട്ഠാ വിവനമാഗതോ;
സോ ഏകകോ രുക്ഖമൂലേ, കപണോ വിയ ഝായാമി;
സതം ധമ്മം അനുസ്സരംതി.
ധമ്മധജജാതകം ദസമം.
ബീരണഥമ്ഭവഗ്ഗോ സത്തമോ.
തസ്സുദ്ദാനം –
അഥ ബീരണഥമ്ഭവരോ ച നടോ, ഭരുരാജവരുത്തമപുണ്ണനദീ;
ബഹുഭാണി അഗ്ഗിപവനേ മൂസികാ, സഹലമ്ബത്ഥനോ കപണേന ദസാതി.