൬. നതംദള്ഹവഗ്ഗോ
൨൦൧. ബന്ധനാഗാരജാതകം (൨-൬-൧)
൧൦൧. ന തം ദള്ഹം ബന്ധനമാഹു ധീരാ, യദായസം ദാരുജപബ്ബജഞ്ച [ബബ്ബജഞ്ച (സീ.)];
സാരത്തരത്താ മണികുണ്ഡലേസു, പുത്തേസു ദാരേസു ച യാ അപേക്ഖാ.
൧൦൨. ഏതം ദള്ഹം ബന്ധനമാഹു ധീരാ, ഓഹാരിനം സിഥിലം ദുപ്പമുഞ്ചം;
ഏതമ്പി ഛേത്വാന വജന്തി ധീരാ, അനപേക്ഖിനോ കാമസുഖം പഹായാതി.
ബന്ധനാഗാരജാതകം പഠമം.
൨൦൨. കേളിസീലജാതകം (൨-൬-൨)
൧൦൩. ഹംസാ കോഞ്ചാ മയൂരാ ച, ഹത്ഥയോ [ഹത്ഥിനോ (സീ.), ഹത്ഥിയോ (സ്യാ. പീ.)] പസദാ മിഗാ;
സബ്ബേ സീഹസ്സ ഭായന്തി, നത്ഥി കായസ്മി തുല്യതാ.
൧൦൪. ഏവമേവ മനുസ്സേസു, ദഹരോ ചേപി പഞ്ഞവാ;
സോ ഹി തത്ഥ മഹാ ഹോതി, നേവ ബാലോ സരീരവാതി.
കേളിസീലജാതകം ദുതിയം.
൨൦൩. ഖണ്ഡജാതകം (൨-൬-൩)
൧൦൫. വിരൂപക്ഖേഹി മേ മേത്തം, മേത്തം ഏരാപഥേഹി മേ;
ഛബ്യാപുത്തേഹി മേ മേത്തം, മേത്തം കണ്ഹാഗോതമകേഹി ച.
അപാദകേഹി മേ മേത്തം, മേത്തം ദ്വിപാദകേഹി മേ;
ചതുപ്പദേഹി മേ മേത്തം, മേത്തം ബഹുപ്പദേഹി മേ.
മാ മം അപാദകോ ഹിംസി, മാ മം ഹിംസി ദ്വിപാദകോ;
മാ മം ചതുപ്പദോ ഹിംസി, മാ മം ഹിംസി ബഹുപ്പദോ.
സബ്ബേ സത്താ സബ്ബേ പാണാ, സബ്ബേ ഭൂതാ ച കേവലാ;
സബ്ബേ ഭദ്രാനി പസ്സന്തു, മാ കഞ്ചി [കിഞ്ചി (സ്യാ. ക.)] പാപമാഗമാ.
൧൦൬. അപ്പമാണോ ബുദ്ധോ, അപ്പമാണോ ധമ്മോ;
അപ്പമാണോ സങ്ഘോ, പമാണവന്താനി സരീസപാനി [സിരിസപാനി (സീ. സ്യാ. പീ.)];
അഹിവിച്ഛികസതപദീ, ഉണ്ണനാഭി [ഉണ്ണാനാഭി (സീ. സ്യാ. പീ.)] സരബൂമൂസികാ.
കതാ മേ രക്ഖാ കതാ മേ പരിത്താ, പടിക്കമന്തു ഭൂതാനി;
സോഹം നമോ ഭഗവതോ, നമോ സത്തന്നം സമ്മാസമ്ബുദ്ധാനന്തി.
ഖണ്ഡജാതകം തതിയം.
൨൦൪. വീരകജാതകം (൨-൬-൪)
൧൦൭. അപി വീരക പസ്സേസി, സകുണം മഞ്ജുഭാണകം;
മയൂരഗീവസങ്കാസം, പതിം മയ്ഹം സവിട്ഠകം.
൧൦൮. ഉദകഥലചരസ്സ പക്ഖിനോ, നിച്ചം ആമകമച്ഛഭോജിനോ;
തസ്സാനുകരം സവിട്ഠകോ, സേവാലേ പലിഗുണ്ഠിതോ മതോതി.
വീരകജാതകം ചതുത്ഥം.
൨൦൫. ഗങ്ഗേയ്യജാതകം (൨-൬-൫)
൧൦൯. സോഭതി മച്ഛോ ഗങ്ഗേയ്യോ, അഥോ സോഭതി യാമുനോ [സോഭന്തി മച്ഛാ ഗങ്ഗേയ്യാ, അഥോ സോഭന്തി യാമുനാ (സ്യാ. പീ.)];
ചതുപ്പദോയം പുരിസോ, നിഗ്രോധപരിമണ്ഡലോ;
ഈസകായത [ഈസമായത (ക.)] ഗീവോ ച, സബ്ബേവ അതിരോചതി.
൧൧൦. യം പുച്ഛിതോ ന തം അക്ഖാസി [അക്ഖാ (സീ. സ്യാ. പീ.)], അഞ്ഞം അക്ഖാസി [അക്ഖാതി (സ്യാ. പീ.)] പുച്ഛിതോ;
അത്തപ്പസംസകോ പോസോ, നായം അസ്മാക രുച്ചതീതി.
ഗങ്ഗേയ്യജാതകം പഞ്ചമം.
൨൦൬. കുരുങ്ഗമിഗജാതകം (൨-൬-൬)
൧൧൧. ഇങ്ഘ വദ്ധമയം [വദ്ധമയം (സീ. സ്യാ. പീ.)] പാസം, ഛിന്ദ ദന്തേഹി കച്ഛപ;
അഹം തഥാ കരിസ്സാമി, യഥാ നേഹിതി ലുദ്ദകോ.
൧൧൨. കച്ഛപോ പാവിസീ വാരിം, കുരുങ്ഗോ പാവിസീ വനം;
സതപത്തോ ദുമഗ്ഗമ്ഹാ, ദൂരേ പുത്തേ അപാനയീതി.
കുരുങ്ഗമിഗജാതകം ഛട്ഠം.
൨൦൭. അസ്സകജാതകം (൨-൬-൭)
൧൧൩. അയമസ്സകരാജേന, ദേസോ വിചരിതോ മയാ;
അനുകാമയ കാമേന [അനുകാമയവനുകാമേന (സീ. പീ.)], പിയേന പതിനാ സഹ.
൧൧൪. നവേന സുഖദുക്ഖേന, പോരാണം അപിധീയതി [അപിഥീയതി (സീ. പീ.), അപിഥിയ്യതി (സ്യാ.)];
തസ്മാ അസ്സകരഞ്ഞാവ, കീടോ പിയതരോ മമാതി.
അസ്സകജാതകം സത്തമം.
൨൦൮. സുസുമാരജാതകം (൨-൬-൮)
൧൧൫. അലം മേതേഹി അമ്ബേഹി, ജമ്ബൂഹി പനസേഹി ച;
യാനി പാരം സമുദ്ദസ്സ, വരം മയ്ഹം ഉദുമ്ബരോ.
൧൧൬. മഹതീ വത തേ ബോന്ദി, ന ച പഞ്ഞാ തദൂപികാ;
സുസുമാര [സുംസുമാര (സീ. സ്യാ. പീ.)] വഞ്ചിതോ മേസി, ഗച്ഛ ദാനി യഥാസുഖന്തി.
സുസുമാരജാതകം അട്ഠമം.
൨൦൯. കുക്കുടജാതകം (൨-൬-൯)
൧൧൭. ദിട്ഠാ മയാ വനേ രുക്ഖാ, അസ്സകണ്ണാ വിഭീടകാ [വിഭേദകാ (സ്യാ. ക.)];
ന താനി ഏവം സക്കന്തി, യഥാ ത്വം രുക്ഖ സക്കസി.
൧൧൮. പുരാണകുക്കുടോ [കക്കരോ (സീ. സ്യാ. പീ.)] അയം, ഭേത്വാ പഞ്ജരമാഗതോ;
കുസലോ വാളപാസാനം, അപക്കമതി ഭാസതീതി.
കുക്കുട [കക്കര (സീ. സ്യാ. പീ.)] ജാതകം നവമം.
൨൧൦. കന്ദഗലകജാതകം (൨-൬-൧൦)
൧൧൯. അമ്ഭോ കോ നാമ യം രുക്ഖോ, സിന്നപത്തോ [സീനപത്തോ (സീ. പീ.)] സകണ്ടകോ;
യത്ഥ ഏകപ്പഹാരേന, ഉത്തമങ്ഗം വിഭിജ്ജിതം [വിസാടികം (സീ. സ്യാ. പീ.), വിഘാടിതം (സീ. നിയ്യ)].
൧൨൦. അചാരി വതായം വിതുദം വനാനി, കട്ഠങ്ഗരുക്ഖേസു അസാരകേസു;
അഥാസദാ ഖദിരം ജാതസാരം [ജാതിസാരം (ക.)], യത്ഥബ്ഭിദാ ഗരുളോ ഉത്തമങ്ഗന്തി.
കന്ദഗലക [കന്ദലക (ക.)] ജാതകം ദസമം.
നതംദള്ഹവഗ്ഗോ ഛട്ഠോ.
തസ്സുദ്ദാനം –
ദള്ഹബന്ധന ഹംസവരോ ച പുന, വിരൂപക്ഖ സവിട്ഠക മച്ഛവരോ;
സകുരുങ്ഗ സഅസ്സക അമ്ബവരോ, പുന കുക്കുടകോ ഗരുളേന ദസാതി.