൫. രുഹകവഗ്ഗോ

൧൯൧. രുഹകജാതകം (൨-൫-൧)

൮൧. അപി [അമ്ഭോ (സ്യാ. ക. സീ.)] രുഹക ഛിന്നാപി, ജിയാ സന്ധീയതേ പുന;

സന്ധീയസ്സു പുരാണിയാ, മാ കോധസ്സ വസം ഗമി.

൮൨. വിജ്ജമാനേസു വാകേസു [വിജ്ജമാനാസു മരുവാസു (സീ.), വിജ്ജമാനാസു മരൂദ്വാസു (പീ.)], വിജ്ജമാനേസു കാരിസു;

അഞ്ഞം ജിയം കരിസ്സാമി, അലഞ്ഞേവ പുരാണിയാതി.

രുഹകജാതകം പഠമം.

൧൯൨. സിരികാളകണ്ണിജാതകം (൨-൫-൨)

൮൩. ഇത്ഥീ സിയാ രൂപവതീ, സാ ച സീലവതീ സിയാ;

പുരിസോ തം ന ഇച്ഛേയ്യ, സദ്ദഹാസി മഹോസധ.

൮൪. സദ്ദഹാമി മഹാരാജ, പുരിസോ ദുബ്ഭഗോ സിയാ;

സിരീ ച കാളകണ്ണീ ച, ന സമേന്തി കുദാചനന്തി.

സിരികാളകണ്ണിജാതകം ദുതിയം.

൧൯൩. ചൂളപദുമജാതകം (൨-൫-൩)

൮൫. അയമേവ സാ അഹമപി [അഹമ്പി (സീ. സ്യാ. പീ.), അഹസ്മി (ക.)] സോ അനഞ്ഞോ, അയമേവ സോ ഹത്ഥച്ഛിന്നോ അനഞ്ഞോ;

യമാഹ ‘‘കോമാരപതീ മമ’’ന്തി, വജ്ഝിത്ഥിയോ നത്ഥി ഇത്ഥീസു സച്ചം.

൮൬. ഇമഞ്ച ജമ്മം മുസലേന ഹന്ത്വാ, ലുദ്ദം ഛവം പരദാരൂപസേവിം;

ഇമിസ്സാ ച നം പാപപതിബ്ബതായ, ജീവന്തിയാ ഛിന്ദഥ കണ്ണനാസന്തി.

ചൂളപദുമജാതകം തതിയം.

൧൯൪. മണിചോരജാതകം (൨-൫-൪)

൮൭. ന സന്തി ദേവാ പവസന്തി നൂന, ന ഹി നൂന സന്തി ഇധ ലോകപാലാ;

സഹസാ കരോന്താനമസഞ്ഞതാനം, ന ഹി നൂന സന്തീ പടിസേധിതാരോ.

൮൮. അകാലേ വസ്സതീ തസ്സ, കാലേ തസ്സ ന വസ്സതി;

സഗ്ഗാ ച ചവതി ഠാനാ, നനു സോ താവതാ ഹതോതി.

മണിചോരജാതകം ചതുത്ഥം.

൧൯൫. പബ്ബതൂപത്ഥരജാതകം (൨-൫-൫)

൮൯. പബ്ബതൂപത്ഥരേ [പബ്ബതപത്ഥരേ (സീ. സ്യാ. പീ.)] രമ്മേ, ജാതാ പോക്ഖരണീ സിവാ;

തം സിങ്ഗാലോ അപാപായി [അപാപാസി (സീ. സ്യാ. പീ.)], ജാനം സീഹേന രക്ഖിതം.

൯൦. പിവന്തി ചേ [പിവന്തി വേ (സീ.), പിവന്തിവ (പീ.), പിവന്തേവ (?)] മഹാരാജ, സാപദാനി മഹാനദിം;

ന തേന അനദീ ഹോതി, ഖമസ്സു യദി തേ പിയാതി.

പബ്ബതൂപത്ഥര [പബ്ബതപത്ഥര (സീ. സ്യാ. പീ.)] ജാതകം പഞ്ചമം.

൧൯൬. വലാഹകസ്സജാതകം (൨-൫-൬)

൯൧. യേ ന കാഹന്തി ഓവാദം, നരാ ബുദ്ധേന ദേസിതം;

ബ്യസനം തേ ഗമിസ്സന്തി, രക്ഖസീഹിവ വാണിജാ.

൯൨. യേ ച കാഹന്തി ഓവാദം, നരാ ബുദ്ധേന ദേസിതം;

സോത്ഥിം പാരം ഗമിസ്സന്തി, വലാഹേനേവ [വാലാഹേനേവ (സീ. പീ.)] വാണിജാതി.

വലാഹകസ്സ [വാലാഹസ്സ (സീ. പീ.)] ജാതകം ഛട്ഠം.

൧൯൭. മിത്താമിത്തജാതകം (൨-൫-൭)

൯൩. ന നം ഉമ്ഹയതേ ദിസ്വാ, ന ച നം പടിനന്ദതി;

ചക്ഖൂനി ചസ്സ ന ദദാതി, പടിലോമഞ്ച വത്തതി.

൯൪. ഏതേ ഭവന്തി ആകാരാ, അമിത്തസ്മിം പതിട്ഠിതാ;

യേഹി അമിത്തം ജാനേയ്യ, ദിസ്വാ സുത്വാ ച പണ്ഡിതോതി.

മിത്താമിത്തജാതകം സത്തമം.

൧൯൮. രാധജാതകം (൨-൫-൮)

൯൫. പവാസാ ആഗതോ താത, ഇദാനി നചിരാഗതോ;

കച്ചിന്നു താത തേ മാതാ, ന അഞ്ഞമുപസേവതി.

൯൬. ന ഖോ പനേതം സുഭണം, ഗിരം സച്ചുപസംഹിതം;

സയേഥ പോട്ഠപാദോവ, മുമ്മുരേ [മുമ്മുരേ (സ്യാ.), മം പുരേ (ക.) മുമ്മുരസദ്ദോ ഥുസഗ്ഗിമ്ഹി കുക്കുളേ ച വത്തതീതി സക്കതാഭിധാനേസു] ഉപകൂഥിതോതി [ഉപകൂസിതോതി (സീ. സ്യാ. പീ.), ഉപകൂലിതോ (ക.)].

രാധജാതകം അട്ഠമം.

൧൯൯. ഗഹപതിജാതകം (൨-൫-൯)

൯൭. ഉഭയം മേ ന ഖമതി, ഉഭയം മേ ന രുച്ചതി;

യാചായം കോട്ഠമോതിണ്ണാ, നാദ്ദസം ഇതി ഭാസതി.

൯൮. തം തം ഗാമപതി ബ്രൂമി, കദരേ അപ്പസ്മി ജീവിതേ;

ദ്വേ മാസേ സങ്ഗരം കത്വാ [കാരം കത്വാന (സീ. പീ.), സംകരം കത്വാ (ക.)], മംസം ജരഗ്ഗവം കിസം;

അപ്പത്തകാലേ ചോദേസി, തമ്പി മയ്ഹം ന രുച്ചതീതി.

ഗഹപതിജാതകം നവമം.

൨൦൦. സാധുസീലജാതകം (൨-൫-൧൦)

൯൯. സരീരദബ്യം വുഡ്ഢബ്യം [വദ്ധബ്യം (സീ. പീ.)], സോജച്ചം സാധുസീലിയം;

ബ്രാഹ്മണം തേവ പുച്ഛാമ, കന്നു തേസം വനിമ്ഹസേ [വണിമ്ഹസേ (സീ. പീ.)].

൧൦൦. അത്ഥോ അത്ഥി സരീരസ്മിം, വുഡ്ഢബ്യസ്സ നമോ കരേ;

അത്ഥോ അത്ഥി സുജാതസ്മിം, സീലം അസ്മാക രുച്ചതീതി.

സാധുസീലജാതകം ദസമം.

രുഹകവഗ്ഗോ പഞ്ചമോ.

തസ്സുദ്ദാനം –

അപിരുഹക രൂപവതീ മുസലോ, പവസന്തി സപഞ്ചമപോക്ഖരണീ;

അഥ മുത്തിമവാണിജ ഉമ്ഹയതേ, ചിരആഗത കോട്ഠ സരീര ദസാതി.