൪. അസദിസവഗ്ഗോ

൧൮൧. അസദിസജാതകം (൨-൪-൧)

൬൧. ധനുഗ്ഗഹോ അസദിസോ, രാജപുത്തോ മഹബ്ബലോ;

ദൂരേപാതീ അക്ഖണവേധീ, മഹാകായപ്പദാലനോ.

൬൨. സബ്ബാമിത്തേ രണം കത്വാ, ന ച കഞ്ചി വിഹേഠയി;

ഭാതരം സോത്ഥിം കത്വാന, സംയമം അജ്ഝുപാഗമീതി.

അസദിസജാതകം പഠമം.

൧൮൨. സങ്ഗാമാവചരജാതകം (൨-൪-൨)

൬൩. സങ്ഗാമാവചരോ സൂരോ, ബലവാ ഇതി വിസ്സുതോ;

കിം നു തോരണമാസജ്ജ, പടിക്കമസി കുഞ്ജര.

൬൪. ഓമദ്ദ ഖിപ്പം പലിഘം, ഏസികാനി ച അബ്ബഹ [ഉബ്ബഹ (സ്യാ.), അബ്ഭുഹ (ക.)];

തോരണാനി ച മദ്ദിത്വാ, ഖിപ്പം പവിസ കുഞ്ജരാതി.

സങ്ഗാമാവചരജാതകം ദുതിയം.

൧൮൩. വാലോദകജാതകം (൨-൪-൩)

൬൫. വാലോദകം അപ്പരസം നിഹീനം, പിത്വാ [പീത്വാ (സീ. പീ.)] മദോ ജായതി ഗദ്രഭാനം;

ഇമഞ്ച പിത്വാന രസം പണീതം, മദോ ന സഞ്ജായതി സിന്ധവാനം.

൬൬. അപ്പം പിവിത്വാന നിഹീനജച്ചോ, സോ മജ്ജതീ തേന ജനിന്ദ പുട്ഠോ [ഫുട്ഠോ (സീ. സ്യാ.), മുട്ഠോ (ക.)];

ധോരയ്ഹസീലീ ച കുലമ്ഹി ജാതോ, ന മജ്ജതീ അഗ്ഗരസം പിവിത്വാതി.

വാലോദകജാതകം തതിയം.

൧൮൪. ഗിരിദത്തജാതകം (൨-൪-൪)

൬൭. ദൂസിതോ ഗിരിദത്തേന [ഗിരിദന്തേന (പീ.)], ഹയോ സാമസ്സ പണ്ഡവോ;

പോരാണം പകതിം ഹിത്വാ, തസ്സേവാനുവിധിയ്യതി [നുവിധീയതി (സീ. പീ.)].

൬൮. സചേ ച തനുജോ പോസോ, സിഖരാകാര [സിങ്ഗാരാകാര (സ്യാ.)] കപ്പിതോ;

ആനനേ നം [തം (സീ. സ്യാ. പീ.)] ഗഹേത്വാന, മണ്ഡലേ പരിവത്തയേ;

ഖിപ്പമേവ പഹന്ത്വാന, തസ്സേവാനുവിധിയ്യതീതി.

ഗിരിദത്തജാതകം ചതുത്ഥം.

൧൮൫. അനഭിരതിജാതകം (൨-൪-൫)

൬൯. യഥോദകേ ആവിലേ അപ്പസന്നേ, ന പസ്സതി സിപ്പികസമ്ബുകഞ്ച;

സക്ഖരം വാലുകം മച്ഛഗുമ്ബം, ഏവം ആവിലമ്ഹി [ആവിലേ ഹി (സീ.)] ചിത്തേ;

ന പസ്സതി അത്തദത്ഥം പരത്ഥം.

൭൦. യഥോദകേ അച്ഛേ വിപ്പസന്നേ, സോ പസ്സതി സിപ്പികസമ്ബുകഞ്ച;

സക്ഖരം വാലുകം മച്ഛഗുമ്ബം, ഏവം അനാവിലമ്ഹി ചിത്തേ;

സോ പസ്സതി അത്തദത്ഥം പരത്ഥന്തി.

അനഭിരതിജാതകം പഞ്ചമം.

൧൮൬. ദധിവാഹനജാതകം (൨-൪-൬)

൭൧. വണ്ണഗന്ധരസൂപേതോ, അമ്ബോയം അഹുവാ പുരേ;

തമേവ പൂജം ലഭമാനോ, കേനമ്ബോ കടുകപ്ഫലോ.

൭൨. പുചിമന്ദപരിവാരോ, അമ്ബോ തേ ദധിവാഹന;

മൂലം മൂലേന സംസട്ഠം, സാഖാ സാഖാ [സാഖം (സ്യാ. ക.)] നിസേവരേ [നിവീസരേ (ക.)];

അസാതസന്നിവാസേന, തേനമ്ബോ കടുകപ്ഫലോതി.

ദധിവാഹനജാതകം ഛട്ഠം.

൧൮൭. ചതുമട്ഠജാതകം (൨-൪-൭)

൭൩. ഉച്ചേ വിടഭിമാരുയ്ഹ, മന്തയവ്ഹോ രഹോഗതാ;

നീചേ ഓരുയ്ഹ മന്തവ്ഹോ, മിഗരാജാപി സോസ്സതി.

൭൪. യം സുവണ്ണോ സുവണ്ണേന [യം സുപണ്ണോ സുപണ്ണേന (സീ. സ്യാ. പീ.)], ദേവോ ദേവേന മന്തയേ;

കിം തേത്ഥ ചതുമട്ഠസ്സ, ബിലം പവിസ ജമ്ബുകാതി.

ചതുമട്ഠജാതകം സത്തമം.

൧൮൮. സീഹകോത്ഥുജാതകം (൨-൪-൮)

൭൫. സീഹങ്ഗുലീ സീഹനഖോ, സീഹപാദപതിട്ഠിതോ;

സോ സീഹോ സീഹസങ്ഘമ്ഹി, ഏകോ നദതി അഞ്ഞഥാ.

൭൬. മാ ത്വം നദി രാജപുത്ത, അപ്പസദ്ദോ വനേ വസ;

സരേന ഖോ [മാ (ക.)] തം ജാനേയ്യും, ന ഹി തേ പേത്തികോ സരോതി.

സീഹകോത്ഥുജാതകം അട്ഠമം.

൧൮൯. സീഹചമ്മജാതകം (൨-൪-൯)

൭൭. നേതം സീഹസ്സ നദിതം, ന ബ്യഗ്ഘസ്സ ന [ബ്യഗ്ഘസ്സ ന ച (ക.)] ദീപിനോ;

പാരുതോ സീഹചമ്മേന, ജമ്മോ നദതി ഗദ്രഭോ.

൭൮. ചിരമ്പി ഖോ തം ഖാദേയ്യ, ഗദ്രഭോ ഹരിതം യവം;

പാരുതോ സീഹചമ്മേന, രവമാനോവ ദൂസയീതി.

സീഹചമ്മജാതകം നവമം.

൧൯൦. സീലാനിസംസജാതകം (൨-൪-൧൦)

൭൯. പസ്സ സദ്ധായ സീലസ്സ, ചാഗസ്സ ച അയം ഫലം;

നാഗോ നാവായ വണ്ണേന, സദ്ധം വഹതുപാസകം.

൮൦. സബ്ഭിരേവ സമാസേഥ, സബ്ഭി കുബ്ബേഥ സന്ഥവം;

സതഞ്ഹി സന്നിവാസേന, സോത്ഥിം ഗച്ഛതി ന്ഹാപിതോതി.

സീലാനിസംസജാതകം ദസമം.

അസദിസവഗ്ഗോ ചതുത്ഥോ.

തസ്സുദ്ദാനം –

ധനുഗ്ഗഹ കുഞ്ജര അപ്പരസോ, ഗിരിദത്തമനാവിലചിത്തവരം;

ദധിവാഹന ജമ്ബൂക സീഹനഖോ, ഹരിതയവ നാഗവരേന ദസാതി.