൩. കല്യാണവഗ്ഗോ

൧൭൧. കല്യാണധമ്മജാതകം (൨-൩-൧)

൪൧. കല്യാണധമ്മോതി യദാ ജനിന്ദ, ലോകേ സമഞ്ഞം അനുപാപുണാതി;

തസ്മാ ന ഹിയ്യേഥ [ഹീയേഥ (സീ.)] നരോ സപഞ്ഞോ, ഹിരിയാപി സന്തോ ധുരമാദിയന്തി.

൪൨. സായം സമഞ്ഞാ ഇധ മജ്ജ പത്താ, കല്യാണധമ്മോതി ജനിന്ദ ലോകേ;

താഹം സമേക്ഖം ഇധ പബ്ബജിസ്സം, ന ഹി മത്ഥി ഛന്ദോ ഇധ കാമഭോഗേതി.

കല്യാണധമ്മജാതകം പഠമം.

൧൭൨. ദദ്ദരജാതകം (൨-൩-൨)

൪൩. കോ നു സദ്ദേന മഹതാ, അഭിനാദേതി ദദ്ദരം;

തം സീഹാ നപ്പടിനദന്തി [കിം സീഹാ നപ്പടിനദന്തി (സീ. പീ.), ന സീഹാ പടിനദന്തി (ക.)], കോ നാമേസോ മിഗാധിഭൂ.

൪൪. അധമോ മിഗജാതാനം, സിങ്ഗാലോ താത വസ്സതി;

ജാതിമസ്സ ജിഗുച്ഛന്താ, തുണ്ഹീ സീഹാ സമച്ഛരേതി.

ദദ്ദരജാതകം ദുതിയം.

൧൭൩. മക്കടജാതകം (൨-൩-൩)

൪൫. താത മാണവകോ ഏസോ, താലമൂലം അപസ്സിതോ;

അഗാരകഞ്ചിദം അത്ഥി, ഹന്ദ ദേമസ്സഗാരകം.

൪൬. മാ ഖോ ത്വം താത പക്കോസി, ദൂസേയ്യ നോ അഗാരകം;

നേതാദിസം മുഖം ഹോതി, ബ്രാഹ്മണസ്സ സുസീലിനോതി.

മക്കടജാതകം തതിയം.

൧൭൪. ദുബ്ഭിയമക്കടജാതകം (൨-൩-൪)

൪൭. അദമ്ഹ തേ വാരി പഹൂതരൂപം, ഘമ്മാഭിതത്തസ്സ പിപാസിതസ്സ;

സോ ദാനി പിത്വാന [പീത്വാന (സീ. പീ.)] കിരിങ്കരോസി [കികിംകരോസി (സീ. സ്യാ. പീ.)], അസങ്ഗമോ പാപജനേന സേയ്യോ.

൪൮. കോ തേ സുതോ വാ ദിട്ഠോ വാ, സീലവാ നാമ മക്കടോ;

ഇദാനി ഖോ തം ഓഹച്ഛം [ഊഹച്ച (സീ. പീ.), ഓഹച്ചം (സ്യാ.), ഉഹജ്ജം (ക.)], ഏസാ അസ്മാക ധമ്മതാതി.

ദുബ്ഭിയമക്കടജാതകം ചതുത്ഥം.

൧൭൫. ആദിച്ചുപട്ഠാനജാതകം (൨-൩-൫)

൪൯. സബ്ബേസു കിര ഭൂതേസു, സന്തി സീലസമാഹിതാ;

പസ്സ സാഖാമിഗം ജമ്മം, ആദിച്ചമുപതിട്ഠതി.

൫൦. നാസ്സ സീലം വിജാനാഥ, അനഞ്ഞായ പസംസഥ;

അഗ്ഗിഹുത്തഞ്ച ഉഹന്നം [ഊഹന്തം (സീ.), ഊഹനം (സ്യാ.), ഊഹന്തി (പീ.), ഉഹദം (ക.)], ദ്വേ ച ഭിന്നാ കമണ്ഡലൂതി.

ആദിച്ചുപട്ഠാനജാതകം പഞ്ചമം.

൧൭൬. കളായമുട്ഠിജാതകം (൨-൩-൬)

൫൧. ബാലോ വതായം ദുമസാഖഗോചരോ, പഞ്ഞാ ജനിന്ദ നയിമസ്സ വിജ്ജതി;

കളായമുട്ഠിം [കലായമുട്ഠിം (സീ. പീ.)] അവകിരിയ കേവലം, ഏകം കളായം പതിതം ഗവേസതി.

൫൨. ഏവമേവ മയം രാജ, യേ ചഞ്ഞേ അതിലോഭിനോ;

അപ്പേന ബഹും ജിയ്യാമ, കളായേനേവ വാനരോതി.

കളായമുട്ഠിജാതകം ഛട്ഠം.

൧൭൭. തിന്ദുകജാതകം (൨-൩-൭)

൫൩. ധനുഹത്ഥകലാപേഹി, നേത്തിം സവരധാരിഭി;

സമന്താ പരികിണ്ണമ്ഹ, കഥം മോക്ഖോ ഭവിസ്സതി.

൫൪. അപ്പേവ ബഹുകിച്ചാനം, അത്ഥോ ജായേഥ കോചി നം;

അത്ഥി രുക്ഖസ്സ അച്ഛിന്നം, ഖജ്ജഥഞ്ഞേവ തിന്ദുകന്തി.

തിന്ദുകജാതകം സത്തമം.

൧൭൮. കച്ഛപജാതകം (൨-൩-൮)

൫൫. ജനിത്തം മേ ഭവിത്തം മേ, ഇതി പങ്കേ അവസ്സയിം;

തം മം പങ്കോ അജ്ഝഭവി, യഥാ ദുബ്ബലകം തഥാ;

തം തം വദാമി ഭഗ്ഗവ, സുണോഹി വചനം മമ.

൫൬. ഗാമേ വാ യദി വാ രഞ്ഞേ, സുഖം യത്രാധിഗച്ഛതി;

തം ജനിത്തം ഭവിത്തഞ്ച, പുരിസസ്സ പജാനതോ;

യമ്ഹി ജീവേ തമ്ഹി ഗച്ഛേ, ന നികേതഹതോ സിയാതി.

കച്ഛപജാതകം അട്ഠമം.

൧൭൯. സതധമ്മജാതകം (൨-൩-൯)

൫൭. തഞ്ച അപ്പഞ്ച ഉച്ഛിട്ഠം, തഞ്ച കിച്ഛേന നോ അദാ;

സോഹം ബ്രാഹ്മണജാതികോ, യം ഭുത്തം തമ്പി ഉഗ്ഗതം.

൫൮. ഏവം ധമ്മം നിരംകത്വാ [നിരാകത്വാ (?) നി + ആ + കര + ത്വാ], യോ അധമ്മേന ജീവതി;

സതധമ്മോവ ലാഭേന, ലദ്ധേനപി ന നന്ദതീതി.

സതധമ്മജാതകം നവമം.

൧൮൦. ദുദ്ദദജാതകം (൨-൩-൧൦)

൫൯. ദുദ്ദദം ദദമാനാനം, ദുക്കരം കമ്മ കുബ്ബതം;

അസന്തോ നാനുകുബ്ബന്തി, സതം ധമ്മോ ദുരന്നയോ.

൬൦. തസ്മാ സതഞ്ച അസതം, നാനാ ഹോതി ഇതോ ഗതി;

അസന്തോ നിരയം യന്തി, സന്തോ സഗ്ഗപരായണാതി [പരായനാ (സ്യാ. ക.)].

ദുദ്ദദജാതകം ദസമം.

കല്യാണവഗ്ഗോ തതിയോ.

തസ്സുദ്ദാനം –

സുസമഞ്ഞമിഗാധിഭൂ മാണവകോ, വാരിപഹൂതരൂപാദിച്ചുപട്ഠാനാ;

സകളായസതിന്ദുകപങ്ക പുന, സതധമ്മ സുദുദ്ദദകേന ദസാതി.