൫൨൩. അലമ്ബുസാജാതകം (൩)

൯൫. ‘‘അഥ ബ്രവി ബ്രഹാ ഇന്ദോ, വത്രഭൂ ജയതം പിതാ;

ദേവകഞ്ഞം പരാഭേത്വാ, സുധമ്മായം അലമ്ബുസം.

൯൬. ‘‘മിസ്സേ ദേവാ തം യാചന്തി, താവതിംസാ സഇന്ദകാ;

ഇസിപ്പലോഭനേ [ഇസിപലോഭികേ (സീ. സ്യാ.), ഇസിം പലോഭികേ (പീ.)] ഗച്ഛ, ഇസിസിങ്ഗം അലമ്ബുസേ.

൯൭. ‘‘പുരായം അമ്ഹേ അച്ചേതി [നാച്ചേതി (സ്യാ. ക.)], വത്തവാ [വതവാ (സീ. സ്യാ. പീ.)] ബ്രഹ്മചരിയവാ;

നിബ്ബാനാഭിരതോ വുദ്ധോ [വദ്ധോ (പീ.), ബുദ്ധോ (സ്യാ. ക.)], തസ്സ മഗ്ഗാനി ആവര’’.

൯൮. ‘‘ദേവരാജ കിമേവ ത്വം, മമേവ തുവം സിക്ഖസി;

ഇസിപ്പലോഭനേ [ഇസിപലോഭികേ (സീ. സ്യാ.), ഇസിം പലോഭികേ (പീ.)] ഗച്ഛ, സന്തി അഞ്ഞാപി അച്ഛരാ.

൯൯. ‘‘മാദിസിയോ പവരാ ചേവ, അസോകേ നന്ദനേ വനേ;

താസമ്പി ഹോതു പരിയായോ, താപി യന്തു പലോഭനാ’’ [പലോഭികാ (സ്യാ. പീ.)].

൧൦൦. ‘‘അദ്ധാ ഹി സച്ചം ഭണസി, സന്തി അഞ്ഞാപി അച്ഛരാ;

താദിസിയോ പവരാ ചേവ, അസോകേ നന്ദനേ വനേ.

൧൦൧. ‘‘ന താ ഏവം പജാനന്തി, പാരിചരിയം പുമം ഗതാ;

യാദിസം ത്വം പജാനാസി, നാരി സബ്ബങ്ഗസോഭനേ.

൧൦൨. ‘‘ത്വമേവ ഗച്ഛ കല്യാണി, ഇത്ഥീനം പവരാ ചസി;

തവേവ വണ്ണരൂപേന, സവസമാനയിസ്സസി’’ [വസമാനാപയിസ്സസി (സ്യാ.), വസമാനാമയിസ്സസി (പീ.), തം വസമാനയിസ്സസി (ക.)].

൧൦൩. ‘‘ന വാഹം ന ഗമിസ്സാമി, ദേവരാജേന പേസിതാ;

വിഭേമി ചേതം ആസാദും, ഉഗ്ഗതേജോ ഹി ബ്രാഹ്മണോ.

൧൦൪. ‘‘അനേകേ നിരയം പത്താ, ഇസിമാസാദിയാ ജനാ;

ആപന്നാ മോഹസംസാരം, തസ്മാ ലോമാനി ഹംസയേ’’.

൧൦൫. ‘‘ഇദം വത്വാന പക്കാമി, അച്ഛരാ കാമവണ്ണിനീ;

മിസ്സാ മിസ്സിതു [മിസ്സേതു (സീ. സ്യാ. പീ.)] മിച്ഛന്തീ, ഇസിസിങ്ഗം അലമ്ബുസാ.

൧൦൬. ‘‘സാ ച തം വനമോഗയ്ഹ, ഇസിസിങ്ഗേന രക്ഖിതം;

ബിമ്ബജാലകസഞ്ഛന്നം, സമന്താ അഡ്ഢയോജനം.

൧൦൭. ‘‘പാതോവ പാതരാസമ്ഹി, ഉദണ്ഹസമയം [ഉദയസമയം (സ്യാ.), ഉദന്തസമയം (ക.)] പതി;

അഗ്ഗിട്ഠം പരിമജ്ജന്തം, ഇസിസിങ്ഗം ഉപാഗമി’’.

൧൦൮. ‘‘കാ നു വിജ്ജുരിവാഭാസി, ഓസധീ വിയ താരകാ;

വിചിത്തഹത്ഥാഭരണാ [വിചിത്തവത്ഥാഭരണാ (സീ.)], ആമുത്തമണികുണ്ഡലാ [ആമുക്കമണികുണ്ഡലാ (?)].

൧൦൯. ‘‘ആദിച്ചവണ്ണസങ്കാസാ, ഹേമചന്ദനഗന്ധിനീ;

സഞ്ഞതൂരൂ മഹാമായാ, കുമാരീ ചാരുദസ്സനാ.

൧൧൦. ‘‘വിലഗ്ഗാ [വിലാകാ (സീ. സ്യാ. പീ.)] മുദുകാ സുദ്ധാ, പാദാ തേ സുപ്പതിട്ഠിതാ;

ഗമനാ കാമനീയാ [കമനാ കമനീയാ (സീ. പീ.)] തേ, ഹരന്തിയേവ മേ മനോ.

൧൧൧. ‘‘അനുപുബ്ബാവ തേ ഊരൂ, നാഗനാസസമൂപമാ;

വിമട്ഠാ തുയ്ഹം സുസ്സോണീ, അക്ഖസ്സ ഫലകം യഥാ.

൧൧൨. ‘‘ഉപ്പലസ്സേവ കിഞ്ജക്ഖാ, നാഭി തേ സാധു സണ്ഠിതാ;

പൂരാ കണ്ഹഞ്ജനസ്സേവ, ദൂരതോ പടിദിസ്സതി.

൧൧൩. ‘‘ദുവിധാ ജാതാ ഉരജാ, അവണ്ടാ സാധു പച്ചുദാ;

പയോധരാ അപതിതാ [അപ്പതീതാ (സീ. സ്യാ. പീ.)], അഡ്ഢലാബുസമാ ഥനാ.

൧൧൪. ‘‘ദീഘാ കമ്ബുതലാഭാസാ, ഗീവാ ഏണേയ്യകാ യഥാ;

പണ്ഡരാവരണാ വഗ്ഗു, ചതുത്ഥമനസന്നിഭാ.

൧൧൫. ‘‘ഉദ്ധഗ്ഗാ ച അധഗ്ഗാ ച, ദുമഗ്ഗപരിമജ്ജിതാ;

ദുവിജാ നേലസമ്ഭൂതാ, ദന്താ തവ സുദസ്സനാ.

൧൧൬. ‘‘അപണ്ഡരാ ലോഹിതന്താ, ജിഞ്ജൂക [ജിഞ്ജുക (സീ. സ്യാ. പീ.)] ഫലസന്നിഭാ;

ആയതാ ച വിസാലാ ച, നേത്താ തവ സുദസ്സനാ.

൧൧൭. ‘‘നാതിദീഘാ സുസമ്മട്ഠാ, കനകബ്യാ [കനകഗ്ഗാ (പീ.)] സമോചിതാ;

ഉത്തമങ്ഗരുഹാ തുയ്ഹം, കേസാ ചന്ദനഗന്ധികാ.

൧൧൮. ‘‘യാവതാ കസിഗോരക്ഖാ, വാണിജാനം [വണിജാനം (പീ.)] ച യാ ഗതി;

ഇസീനഞ്ച പരക്കന്തം, സഞ്ഞതാനം തപസ്സിനം.

൧൧൯. ‘‘ന തേ സമസമം പസ്സേ, അസ്മിം പഥവി [പുഥുവി (പീ.)] മണ്ഡലേ;

കോ വാ ത്വം കസ്സ വാ പുത്തോ, കഥം ജാനേമു തം മയം’’.

൧൨൦. ‘‘ന പഞ്ഹകാലോ ഭദ്ദന്തേ, കസ്സപേവം ഗതേ സതി;

ഏഹി സമ്മ രമിസ്സാമ, ഉഭോ അസ്മാകമസ്സമേ;

ഏഹി തം ഉപഗൂഹിസ്സം [ഉപഗുയ്ഹിസ്സം (സ്യാ.)], രതീനം കുസലോ ഭവ’’.

൧൨൧. ‘‘ഇദം വത്വാന പക്കാമി, അച്ഛരാ കാമവണ്ണിനീ;

മിസ്സാ മിസ്സിതുമിച്ഛന്തീ, ഇസിസിങ്ഗം അലമ്ബുസാ’’.

൧൨൨. ‘‘സോ ച വേഗേന നിക്ഖമ്മ, ഛേത്വാ ദന്ധപരക്കമം [ദന്ധപദക്കമം (ക.)];

തമുത്തമാസു വേണീസു, അജ്ഝപ്പത്തോ [അജ്ഝാപത്തോ (പീ.)] പരാമസി;

൧൨൩. ‘‘തമുദാവത്ത കല്യാണീ, പലിസ്സജി സുസോഭനാ [സുസോഭണീ (സ്യാ. ക.)];

ചവിതമ്ഹി [ചവി തമ്ഹാ (സ്യാ. ക.)] ബ്രഹ്മചരിയാ, യഥാ തം അഥ തോസിതാ.

൧൨൪. ‘‘മനസാ അഗമാ ഇന്ദം, വസന്തം നന്ദനേ വനേ;

തസ്സാ സങ്കപ്പമഞ്ഞായ, മഘവാ ദേവകുഞ്ജരോ.

൧൨൫. ‘‘പല്ലങ്കം പഹിണീ ഖിപ്പം, സോവണ്ണം സോപവാഹനം;

സഉത്തരച്ഛദപഞ്ഞാസം, സഹസ്സപടിയത്ഥതം [പടികത്ഥതം (സീ.)].

൧൨൬. ‘‘തമേനം തത്ഥ ധാരേസി, ഉരേ കത്വാന സോഭനാ;

യഥാ ഏകമുഹുത്തംവ, തീണി വസ്സാനി ധാരയി.

൧൨൭. ‘‘വിമദോ തീഹി വസ്സേഹി, പബുജ്ഝിത്വാന ബ്രാഹ്മണോ;

അദ്ദസാസി ഹരിത [ഹരീ (പീ.)] രുക്ഖേ, സമന്താ അഗ്ഗിയായനം.

൧൨൮. ‘‘നവപത്തവനം ഫുല്ലം, കോകിലഗ്ഗണഘോസിതം;

സമന്താ പവിലോകേത്വാ, രുദം അസ്സൂനി വത്തയി.

൧൨൯. ‘‘ന ജുഹേ ന ജപേ [ജപ്പേ (ക.)] മന്തേ, അഗ്ഗിഹുത്തം പഹാപിതം;

കോ നു മേ പാരിചരിയായ, പുബ്ബേ ചിത്തം പലോഭയി.

൧൩൦. ‘‘അരഞ്ഞേ മേ വിഹരതോ, യോ മേ തേജാ ഹ സമ്ഭുതം [സമ്ഭതം (പീ.)];

നാനാരത്നപരിപൂരം, നാവംവ ഗണ്ഹി അണ്ണവേ’’.

൧൩൧. ‘‘അഹം തേ പാരിചരിയായ, ദേവരാജേന പേസിതാ;

അവധിം [അവധീ (സ്യാ. പീ. ക.)] ചിത്തം ചിത്തേന, പമാദോ [പമാദാ (സ്യാ. പീ.)] ത്വം ന ബുജ്ഝസി’’.

൧൩൨. ‘‘ഇമാനി കിര മം താതോ, കസ്സപോ അനുസാസതി;

കമലാസദിസിത്ഥിയോ [സരിസിത്ഥിയോ (സ്യാ. പീ.)], തായോ ബുജ്ഝേസി മാണവ.

൧൩൩. ‘‘ഉരേ ഗണ്ഡായോ ബുജ്ഝേസി, തായോ ബുജ്ഝേസി മാണവ;

ഇച്ചാനുസാസി മം താതോ, യഥാ മം അനുകമ്പകോ.

൧൩൪. ‘‘തസ്സാഹം വചനം നാകം, പിതു വുദ്ധസ്സ സാസനം;

അരഞ്ഞേ നിമ്മനുസ്സമ്ഹി, സ്വജ്ജ ഝായാമി [സ്വാജ്ജജ്ഝായാമി (സീ. പീ.)] ഏകകോ.

൧൩൫. ‘‘സോഹം തഥാ കരിസ്സാമി, ധിരത്ഥു ജീവിതേന മേ;

പുന വാ താദിസോ ഹേസ്സം, മരണം മേ ഭവിസ്സതി’’.

൧൩൬. ‘‘തസ്സ തേജം [തേജഞ്ച (സീ. പീ.)] വീരിയഞ്ച, ധിതിം [ധിതിഞ്ച (പീ.)] ഞത്വാ അവട്ഠിതം [സുവഡ്ഢിതം (സീ.)];

സിരസാ അഗ്ഗഹീ പാദേ, ഇസിസിങ്ഗം അലമ്ബുസാ.

൧൩൭. ‘‘മാ മേ കുജ്ഝ [കുജ്ഝി (പീ.)] മഹാവീര, മാ മേ കുജ്ഝ [കുജ്ഝി (പീ.)] മഹാഇസേ;

മഹാ അത്ഥോ മയാ ചിണ്ണോ, തിദസാനം യസസ്സിനം;

തയാ സംകമ്പിതം ആസി, സബ്ബം ദേവപുരം തദാ’’.

൧൩൮. ‘‘താവതിംസാ ച യേ ദേവാ, തിദസാനഞ്ച വാസവോ;

ത്വഞ്ച ഭദ്ദേ സുഖീ ഹോഹി, ഗച്ഛ കഞ്ഞേ യഥാസുഖം’’.

൧൩൯. ‘‘തസ്സ പാദേ ഗഹേത്വാന, കത്വാ ച നം പദക്ഖിണം;

അഞ്ജലിം പഗ്ഗഹേത്വാന, തമ്ഹാ ഠാനാ അപക്കമി.

൧൪൦. ‘‘യോ ച തസ്സാസി പല്ലങ്കോ, സോവണ്ണോ സോപവാഹനോ;

സഉത്തരച്ഛദപഞ്ഞാസോ, സഹസ്സപടിയത്ഥതോ;

തമേവ പല്ലങ്കമാരുയ്ഹ, അഗാ ദേവാന സന്തികേ.

൧൪൧. ‘‘തമോക്കമിവ ആയന്തിം, ജലന്തിം വിജ്ജുതം യഥാ;

പതീതോ സുമനോ വിത്തോ, ദേവിന്ദോ അദദാ വരം’’.

൧൪൨. ‘‘വരഞ്ചേ മേ അദോ സക്ക, സബ്ബഭൂതാനമിസ്സര;

നിസിപ്പലോഭികാ [ന ഇസിപലോഭികാ (സ്യാ.), ന ഇസിപലോഭിയം (പീ.)] ഗച്ഛേ, ഏതം സക്ക വരം വരേ’’തി.

അലമ്ബുസാജാതകം തതിയം.