൫൧൬. മഹാകപിജാതകം (൬)
൧൭൮. ബാരാണസ്യം [ബാരാണസ്സം (സീ. പീ.)] അഹൂ രാജാ, കാസീനം രട്ഠവഡ്ഢനോ;
മിത്താമച്ചപരിബ്യൂള്ഹോ, അഗമാസി മിഗാജിനം [മിഗാജിരം (സീ.), മിഗാചിരം (പീ.)].
൧൭൯. തത്ഥ ബ്രാഹ്മണമദ്ദക്ഖി, സേതം ചിത്രം കിലാസിനം;
വിദ്ധസ്തം കോവിളാരംവ, കിസം ധമനിസന്ഥതം.
൧൮൦. പരമകാരുഞ്ഞതം പത്തം, ദിസ്വാ കിച്ഛഗതം നരം;
അവച ബ്യമ്ഹിതോ രാജാ, ‘‘യക്ഖാനം കതമോ നുസി.
൧൮൧. ‘‘ഹത്ഥപാദാ ച തേ സേതാ, തതോ സേതതരം [സേതതരോ (പീ.)] സിരോ;
ഗത്തം കമ്മാസവണ്ണം തേ, കിലാസബഹുലോ ചസി.
൧൮൨. ‘‘വട്ടനാവളി [വട്ഠനാവലി (പീ.)] സങ്കാസാ, പിട്ഠി തേ നിന്നതുന്നതാ;
കാളപബ്ബാവ [കാളപബ്ബാ ച (സ്യാ.), കാളാ പബ്ബാ ച (പീ.)] തേ അങ്ഗാ, നാഞ്ഞം പസ്സാമി ഏദിസം.
൧൮൩. ‘‘ഉഗ്ഘട്ടപാദോ തസിതോ, കിസോ ധമനിസന്ഥതോ;
ഛാതോ ആതത്തരൂപോസി [ആദിത്തരൂപോസി (ക.), അതിത്തരൂപോസി (സ്യാ. ക. അട്ഠ.)], കുതോസി കത്ഥ ഗച്ഛസി.
൧൮൪. ‘‘ദുദ്ദസീ അപ്പകാരോസി, ദുബ്ബണ്ണോ ഭീമദസ്സനോ;
ജനേത്തി യാപി തേ മാതാ, ന തം ഇച്ഛേയ്യ പസ്സിതും.
൧൮൫. ‘‘കിം കമ്മമകരം [കമ്മമകരാ (സീ. സ്യാ. പീ.)] പുബ്ബേ, കം അവജ്ഝം അഘാതയി;
കിബ്ബിസം യം കരിത്വാന, ഇദം ദുക്ഖം ഉപാഗമി’’.
൧൮൬. തഗ്ഘ തേ അഹമക്ഖിസ്സം, യഥാപി കുസലോ തഥാ;
സച്ചവാദിഞ്ഹി ലോകസ്മിം, പസംസന്തീധ പണ്ഡിതാ.
൧൮൭. ഏകോ ചരം ഗോഗവേസോ, മൂള്ഹോ അച്ചസരിം വനേ;
അരഞ്ഞേ ഇരീണേ [ഈരിണേ (സീ. സ്യാ. പീ.)] വിവനേ, നാനാകുഞ്ജരസേവിതേ.
൧൮൮. വാളമിഗാനുചരിതേ, വിപ്പനട്ഠോസ്മി കാനനേ;
അചരിം തത്ഥ സത്താഹം, ഖുപ്പിപാസ [ഖുപ്പിപാസാ (സീ. പീ.)] സമപ്പിതോ.
൧൮൯. തത്ഥ തിന്ദുകമദ്ദക്ഖിം, വിസമട്ഠം ബുഭുക്ഖിതോ;
പപാതമഭിലമ്ബന്തം, സമ്പന്നഫലധാരിനം.
൧൯൦. വാതസ്സിതാനി ഭക്ഖേസിം, താനി രുച്ചിംസു മേ ഭുസം;
അതിത്തോ രുക്ഖമാരൂഹിം [മാരുയ്ഹ (സീ. സ്യാ.)], തത്ഥ ഹേസ്സാമി ആസിതോ.
൧൯൧. ഏകം മേ ഭക്ഖിതം ആസി, ദുതിയം അഭിപത്ഥിതം;
തതോ സാ ഭഞ്ജഥ സാഖാ, ഛിന്നാ ഫരസുനാ വിയ.
൧൯൨. സോഹം സഹാവ സാഖാഹി, ഉദ്ധംപാദോ അവംസിരോ;
അപ്പതിട്ഠേ അനാലമ്ബേ, ഗിരിദുഗ്ഗസ്മി പാപതം.
൧൯൩. യസ്മാ ച വാരി ഗമ്ഭീരം, തസ്മാ ന സമപജ്ജിസം [സമപജ്ജസിം (സീ.), സമഭജ്ജിസം (പീ.)];
തത്ഥ സേസിം നിരാനന്ദോ, അനൂനാ [അനാഥോ (സീ.)] ദസ രത്തിയോ.
൧൯൪. അഥേത്ഥ കപി മാഗഞ്ഛി [മാഗച്ഛി (സ്യാ. ക.)], ഗോനങ്ഗുലോ ദരീചരോ;
സാഖാഹി സാഖം വിചരന്തോ, ഖാദമാനോ ദുമപ്ഫലം.
൧൯൫. സോ മം ദിസ്വാ കിസം പണ്ഡും, കാരുഞ്ഞമകരം മയി;
അമ്ഭോ കോ നാമ സോ ഏത്ഥ, ഏവം ദുക്ഖേന അട്ടിതോ.
൧൯൬. മനുസ്സോ അമനുസ്സോ വാ, അത്താനം മേ പവേദയ;
തസ്സഞ്ജലിം പണാമേത്വാ, ഇദം വചനമബ്രവിം.
൧൯൭. മനുസ്സോഹം ബ്യസമ്പത്തോ [വസമ്പത്തോ (സ്യാ. ക.)], സാ മേ നത്ഥി ഇതോ ഗതി;
തം വോ വദാമി ഭദ്ദം വോ, ത്വഞ്ച മേ സരണം ഭവ.
൧൯൮. ഗരും [ഗരു (സീ. പീ.)] സിലം ഗഹേത്വാന, വിചരീ [വിചരി (പീ.)] പബ്ബതേ കപി;
സിലായ യോഗ്ഗം കത്വാന, നിസഭോ ഏതദബ്രവി.
൧൯൯. ഏഹി മേ പിട്ഠിമാരുയ്ഹ, ഗീവം ഗണ്ഹാഹി ബാഹുഭി;
അഹം തം ഉദ്ധരിസ്സാമി, ഗിരിദുഗ്ഗത വേഗസാ.
൨൦൦. തസ്സ തം വചനം സുത്വാ, വാനരിന്ദസ്സ സിരീമതോ;
പിട്ഠിമാരുയ്ഹ ധീരസ്സ, ഗീവം ബാഹാഹി അഗ്ഗഹിം.
൨൦൧. സോ മം തതോ സമുട്ഠാസി, തേജസ്സീ [തേജസീ (സ്യാ. പീ. ക.)] ബലവാ കപി;
വിഹഞ്ഞമാനോ കിച്ഛേന, ഗിരിദുഗ്ഗത വേഗസാ.
൨൦൨. ഉദ്ധരിത്വാന മം സന്തോ, നിസഭോ ഏതദബ്രവി;
ഇങ്ഘ മം സമ്മ രക്ഖസ്സു, പസ്സുപിസ്സം മുഹുത്തകം.
൨൦൩. സീഹാ ബ്യഗ്ഘാ ച ദീപീ ച, അച്ഛകോകതരച്ഛയോ;
തേ മം പമത്തം ഹിംസേയ്യും, തേ ത്വം ദിസ്വാ നിവാരയ [ദിസ്വാന വാരയ (പീ.)].
൨൦൪. ഏവം മേ പരിത്താതൂന [പരിത്താതുന (ക.)], പസ്സുപി സോ മുഹുത്തകം;
തദാഹം പാപികം ദിട്ഠിം, പടിലച്ഛിം അയോനിസോ.
൨൦൫. ഭക്ഖോ അയം മനുസ്സാനം, യഥാ ചഞ്ഞേ വനേ മിഗാ;
യം നൂനിമം വധിത്വാന, ഛാതോ ഖാദേയ്യ വാനരം.
൨൦൬. അസിതോ [ആസികോ (പീ.)] ച ഗമിസ്സാമി, മംസമാദായ സമ്ബലം;
കന്താരം നിത്ഥരിസ്സാമി, പാഥേയ്യം മേ ഭവിസ്സതി.
൨൦൭. തതോ സിലം ഗഹേത്വാന, മത്ഥകം സന്നിതാളയിം;
മമ ഗത്ത [ഭത്ത (സീ. സ്യാ.), ഹത്ഥ (പീ.)] കിലന്തസ്സ, പഹാരോ ദുബ്ബലോ അഹു.
൨൦൮. സോ ച വേഗേനുദപ്പത്തോ, കപി രുഹിര [രുധിര (സീ.)] മക്ഖിതോ;
അസ്സുപുണ്ണേഹി നേത്തേഹി, രോദന്തോ മം ഉദിക്ഖതി.
൨൦൯. മായ്യോമം കരി ഭദ്ദന്തേ, ത്വഞ്ച നാമേദിസം കരി;
ത്വഞ്ച ഖോ നാമ ദീഘാവു [ദീഘായു (പീ.)], അഞ്ഞേ [അഞ്ഞം (പീ.)] വാരേതുമരഹസി.
൨൧൦. അഹോ വത രേ പുരിസ, താവ ദുക്കരകാരക;
ഏദിസാ വിസമാ ദുഗ്ഗാ, പപാതാ ഉദ്ധതോ [ഉദ്ധടോ (പീ.)] മയാ.
൨൧൧. ആനീതോ പരലോകാവ, ദുബ്ഭേയ്യം മം അമഞ്ഞഥ;
തം തേന പാപധമ്മേന, പാപം പാപേന ചിന്തിതം.
൨൧൨. മാ ഹേവ ത്വം അധമ്മട്ഠ, വേദനം കടുകം ഫുസി;
മാ ഹേവ പാപകമ്മം തം, ഫലം വേളുംവ തം വധി.
൨൧൩. തയിമേ നത്ഥി വിസ്സാസോ, പാപധമ്മ അസഞ്ഞത [പാപധമ്മം അമഞ്ഞഥ (പീ.)];
ഏഹി മേ പിട്ഠിതോ ഗച്ഛ, ദിസ്സമാനോവ സന്തികേ.
൨൧൪. മുത്തോസി ഹത്ഥാ വാളാനം, പത്തോസി മാനുസിം പദം;
ഏസ മഗ്ഗോ അധമ്മട്ഠ, തേന ഗച്ഛ യഥാസുഖം.
൨൧൫. ഇദം വത്വാ ഗിരിചരോ, രഹദേ [രുഹിരം (സ്യാ. ക.)] പക്ഖല്യ മത്ഥകം;
അസ്സൂനി സമ്പമജ്ജിത്വാ, തതോ പബ്ബതമാരുഹി.
൨൧൬. സോഹം തേനാഭിസത്തോസ്മി, പരിളാഹേന അട്ടിതോ;
ഡയ്ഹമാനേന ഗത്തേന, വാരിം പാതും ഉപാഗമിം.
൨൧൭. അഗ്ഗിനാ വിയ സന്തത്തോ, രഹദോ രുഹിരമക്ഖിതോ;
പുബ്ബലോഹിതസങ്കാസോ, സബ്ബോ മേ സമപജ്ജഥ.
൨൧൮. യാവന്തോ ഉദബിന്ദൂനി, കായസ്മിം നിപതിംസു മേ;
താവന്തോ ഗണ്ഡ [ഗണ്ഡൂ (സീ. പീ.), ഗണ്ഡു (സ്യാ.)] ജായേഥ, അദ്ധബേലുവസാദിസാ.
൨൧൯. പഭിന്നാ പഗ്ഘരിംസു മേ, കുണപാ പുബ്ബലോഹിതാ;
യേന യേനേവ ഗച്ഛാമി, ഗാമേസു നിഗമേസു ച.
൨൨൦. ദണ്ഡഹത്ഥാ നിവാരേന്തി, ഇത്ഥിയോ പുരിസാ ച മം;
ഓക്കിതാ [ഓകിണ്ണാ (സീ.)] പൂതിഗന്ധേന, മാസ്സു ഓരേന ആഗമാ [മാഗമാ (സീ. പീ.)].
൨൨൧. ഏതാദിസം ഇദം ദുക്ഖം, സത്ത വസ്സാനി ദാനി മേ;
അനുഭോമി സകം കമ്മം, പുബ്ബേ ദുക്കടമത്തനോ.
൨൨൨. തം വോ വദാമി ഭദ്ദന്തേ [ഭദ്ദം വോ (സീ. പീ.)], യാവന്തേത്ഥ സമാഗതാ;
മാസ്സു മിത്താന [മിത്താനം (സീ. പീ.)] ദുബ്ഭിത്ഥോ, മിത്തദുബ്ഭോ ഹി പാപകോ.
൨൨൩. കുട്ഠീ കിലാസീ ഭവതി, യോ മിത്താനിധ ദുബ്ഭതി [യോ മിത്താനം ഇധദ്ദുഭി (സീ. അട്ഠ.), യോ മിത്താനം ഇധ ദുബ്ഭതി (പീ.)];
കായസ്സ ഭേദാ മിത്തദ്ദു [മിത്തദുബ്ഭീ (സ്യാ. ക.)], നിരയം സോപപജ്ജതീതി [സോ ഉപപജ്ജതീതി (സീ. സ്യാ. പീ.)].
മഹാകപിജാതകം ഛട്ഠം.