൫൧൭. ദകരക്ഖസജാതകം (൭)

൨൨൪. സചേ വോ വുയ്ഹമാനാനം, സത്തന്നം ഉദകണ്ണവേ;

മനുസ്സബലിമേസാനോ, നാവം ഗണ്ഹേയ്യ രക്ഖസോ;

അനുപുബ്ബം കഥം ദത്വാ, മുഞ്ചേസി ദകരക്ഖസാ [ദകരക്ഖതോ (പീ.)].

൨൨൫. മാതരം പഠമം ദജ്ജം, ഭരിയം ദത്വാന ഭാതരം;

തതോ സഹായം ദത്വാന, പഞ്ചമം ദജ്ജം [ദജ്ജ (സ്യാ.)] ബ്രാഹ്മണം;

ഛട്ഠാഹം ദജ്ജമത്താനം, നേവ ദജ്ജം മഹോസധം.

൨൨൬. പോസേതാ തേ ജനേത്തീ ച, ദീഘരത്താനുകമ്പികാ;

ഛബ്ഭീ തയി പദുസ്സതി [പദുട്ഠസ്മിം (സീ. സ്യാ.)], പണ്ഡിതാ അത്ഥദസ്സിനീ;

അഞ്ഞം ഉപനിസം കത്വാ, വധാ തം പരിമോചയി.

൨൨൭. തം താദിസിം [താദിസം (ക.)] പാണദദിം, ഓരസം ഗബ്ഭധാരിനിം [ഗബ്ഭധാരിണിം (സീ. സ്യാ.)];

മാതരം കേന ദോസേന, ദജ്ജാസി ദകരക്ഖിനോ [ദകരക്ഖതോ (പീ.)].

൨൨൮. ദഹരാ വിയലങ്കാരം, ധാരേതി അപിളന്ധനം;

ദോവാരികേ അനീകട്ഠേ, അതിവേലം പജഗ്ഘതി [സഞ്ജഗ്ഘതി (ക.)].

൨൨൯. അഥോപി പടിരാജൂനം, സയം ദൂതാനി സാസതി;

മാതരം തേന ദോസേന, ദജ്ജാഹം ദകരക്ഖിനോ.

൨൩൦. ഇത്ഥിഗുമ്ബസ്സ പവരാ, അച്ചന്തം പിയഭാണിനീ [അച്ചന്തപിയവാദിനീ (സീ. പീ.)];

അനുഗ്ഗതാ [അനുബ്ബതാ (സ്യാ.), അനുപുബ്ബതാ (ക.)] സീലവതീ, ഛായാവ അനപായിനീ.

൨൩൧. അക്കോധനാ പുഞ്ഞവതീ [പഞ്ഞവതീ (സീ. പീ.)], പണ്ഡിതാ അത്ഥദസ്സിനീ;

ഉബ്ബരിം [ഉപ്പരിം (സീ.)] കേന ദോസേന, ദജ്ജാസി ദകരക്ഖിനോ.

൨൩൨. ഖിഡ്ഡാരതിസമാപന്നം, അനത്ഥവസമാഗതം;

സാ മം സകാന പുത്താനം, അയാചം യാചതേ ധനം.

൨൩൩. സോഹം ദദാമി സാരത്തോ [സാരതോ (സ്യാ.)], ബഹും ഉച്ചാവചം ധനം;

സുദുച്ചജം ചജിത്വാന, പച്ഛാ സോചാമി ദുമ്മനോ;

ഉബ്ബരിം തേന ദോസേന, ദജ്ജാഹം ദകരക്ഖിനോ.

൨൩൪. യേനോചിതാ ജനപദാ [ജാനപദാ (സീ. സ്യാ. പീ.)], ആനീതാ ച പടിഗ്ഗഹം;

ആഭതം പരരജ്ജേഭി, അഭിട്ഠായ ബഹും ധനം.

൨൩൫. ധനുഗ്ഗഹാനം പവരം, സൂരം തിഖിണമന്തിനം;

ഭാതരം കേന ദോസേന, ദജ്ജാസി ദകരക്ഖിനോ.

൨൩൬. യേനോചിതാ [മയോചിതാ (സീ.), മയാചിതാ (പീ.)] ജനപദാ, ആനീതാ ച പടിഗ്ഗഹം;

ആഭതം പരരജ്ജേഭി, അഭിട്ഠായ ബഹും ധനം.

൨൩൭. ധനുഗ്ഗഹാനം പവരോ, സൂരോ തിഖിണമന്തി ച [തിഖിണമന്തിനോ (ക.)];

മയായം [മയാ സോ (സീ. പീ.)] സുഖിതോ രാജാ, അതിമഞ്ഞതി ദാരകോ.

൨൩൮. ഉപട്ഠാനമ്പി മേ അയ്യേ, ന സോ ഏതി യഥാ പുരേ;

ഭാതരം തേന ദോസേന, ദജ്ജാഹം ദകരക്ഖിനോ.

൨൩൯. ഏകരത്തേന ഉഭയോ, ത്വഞ്ചേവ ധനുസേഖ ച [ധനുസേഖവാ (സീ. സ്യാ. പീ.)];

ഉഭോ ജാതേത്ഥ പഞ്ചാലാ, സഹായാ സുസമാവയാ.

൨൪൦. ചരിയാ തം അനുബന്ധിത്ഥോ [അനുബന്ധോ (ക.)], ഏകദുക്ഖസുഖോ തവ;

ഉസ്സുക്കോ തേ ദിവാരത്തിം, സബ്ബകിച്ചേസു ബ്യാവടോ;

സഹായം കേന ദോസേന, ദജ്ജാസി ദകരക്ഖിനോ.

൨൪൧. ചരിയാ മം അയം [ചരിയായ അയം (സീ. പീ.)] അയ്യേ, പജഗ്ഘിത്ഥോ [സഞ്ജഗ്ഘിത്ഥോ (സ്യാ.)] മയാ സഹ;

അജ്ജാപി തേന വണ്ണേന, അതിവേലം പജഗ്ഘതി.

൨൪൨. ഉബ്ബരിയാപിഹം അയ്യേ, മന്തയാമി രഹോഗതോ;

അനാമന്തോ [അനാമന്താ (സീ.)] പവിസതി, പുബ്ബേ അപ്പടിവേദിതോ.

൨൪൩. ലദ്ധദ്വാരോ [ലദ്ധവാരോ (സീ. പീ.)] കതോകാസോ, അഹിരികം അനാദരം;

സഹായം തേന ദോസേന, ദജ്ജാഹം ദകരക്ഖിനോ.

൨൪൪. കുസലോ സബ്ബനിമിത്താനം, രുതഞ്ഞൂ [രുദഞ്ഞൂ (സീ. സ്യാ. പീ.)] ആഗതാഗമോ;

ഉപ്പാതേ സുപിനേ യുത്തോ, നിയ്യാനേ ച പവേസനേ.

൨൪൫. പട്ഠോ [പദ്ധോ (സീ. പീ.)] ഭൂമന്തലിക്ഖസ്മിം, നക്ഖത്തപദകോവിദോ;

ബ്രാഹ്മണം കേന ദോസേന, ദജ്ജാസി ദകരക്ഖിനോ.

൨൪൬. പരിസായമ്പി മേ അയ്യേ, ഉമ്മീലിത്വാ ഉദിക്ഖതി;

തസ്മാ അച്ചഭമും ലുദ്ദം, ദജ്ജാഹം ദകരക്ഖിനോ.

൨൪൭. സസമുദ്ദപരിയായം, മഹിം സാഗരകുണ്ഡലം;

വസുന്ധരം ആവസസി, അമച്ചപരിവാരിതോ.

൨൪൮. ചാതുരന്തോ മഹാരട്ഠോ, വിജിതാവീ മഹബ്ബലോ;

പഥബ്യാ ഏകരാജാസി, യസോ തേ വിപുലം ഗതോ.

൨൪൯. സോളസിത്ഥിസഹസ്സാനി, ആമുത്തമണികുണ്ഡലാ;

നാനാജനപദാ നാരീ, ദേവകഞ്ഞൂപമാ സുഭാ.

൨൫൦. ഏവം സബ്ബങ്ഗസമ്പന്നം, സബ്ബകാമസമിദ്ധിനം;

സുഖിതാനം പിയം ദീഘം, ജീവിതം ആഹു ഖത്തിയ.

൨൫൧. അഥ ത്വം കേന വണ്ണേന, കേന വാ പന ഹേതുനാ;

പണ്ഡിതം അനുരക്ഖന്തോ, പാണം ചജസി ദുച്ചജം.

൨൫൨. യതോപി ആഗതോ അയ്യേ, മമ ഹത്ഥം മഹോസധോ;

നാഭിജാനാമി ധീരസ്സ, അനുമത്തമ്പി ദുക്കടം.

൨൫൩. സചേ ച കിസ്മിചി കാലേ, മരണം മേ പുരേ സിയാ;

സോ മേ പുത്തേ [പുത്തേ ച മേ (സീ. സ്യാ. പീ.] പപുത്തേ ച, സുഖാപേയ്യ മഹോസധോ.

൨൫൪. അനാഗതം പച്ചുപ്പന്നം, സബ്ബമത്ഥമ്പി പസ്സതി [സബ്ബമത്ഥം വിപസ്സതി (സീ. സ്യാ. പീ.)];

അനാപരാധകമ്മന്തം, ന ദജ്ജം ദകരക്ഖിനോ.

൨൫൫. ഇദം സുണാഥ പഞ്ചാലാ, ചൂളനേയ്യസ്സ [ചൂളനീയസ്സ (സീ.)] ഭാസിതം;

പണ്ഡിതം അനുരക്ഖന്തോ, പാണം ചജതി ദുച്ചജം.

൨൫൬. മാതു ഭരിയായ ഭാതുച്ച, സഖിനോ ബ്രാഹ്മണസ്സ ച;

അത്തനോ ചാപി പഞ്ചാലോ, ഛന്നം ചജതി ജീവിതം.

൨൫൭. ഏവം മഹത്ഥികാ [ഖഹിദ്ധിയാ (സ്യാ.), മഹിദ്ധികാ (ക.)] പഞ്ഞാ, നിപുണാ സാധുചിന്തിനീ;

ദിട്ഠധമ്മഹിതത്ഥായ, സമ്പരായസുഖായ ചാതി.

ദകരക്ഖസജാതകം സത്തമം.