൧൬. തിംസനിപാതോ
൫൧൧. കിംഛന്ദജാതകം (൧)
൧. കിംഛന്ദോ കിമധിപ്പായോ, ഏകോ സമ്മസി ഘമ്മനി;
കിം പത്ഥയാനോ കിം ഏസം, കേന അത്ഥേന ബ്രാഹ്മണ.
൨. യഥാ മഹാ വാരിധരോ, കുമ്ഭോ സുപരിണാഹവാ [സുപരിണാമവാ (ക.)];
തഥൂപമം അമ്ബപക്കം, വണ്ണഗന്ധരസുത്തമം.
൩. തം വുയ്ഹമാനം സോതേന, ദിസ്വാനാമലമജ്ഝിമേ;
പാണീഹി നം ഗഹേത്വാന, അഗ്യായതനമാഹരിം.
൪. തതോ കദലിപത്തേസു, നിക്ഖിപിത്വാ സയം അഹം;
സത്ഥേന നം വികപ്പേത്വാ, ഖുപ്പിപാസം അഹാസി മേ.
൫. സോഹം അപേതദരഥോ, ബ്യന്തീഭൂതോ [ബ്യന്തിഭൂതോ (സീ. പീ. ക.)] ദുഖക്ഖമോ;
അസ്സാദം നാധിഗച്ഛാമി, ഫലേസ്വഞ്ഞേസു കേസുചി [കേസുപി (ക. സീ.)].
൬. സോസേത്വാ നൂന മരണം, തം മമം ആവഹിസ്സതി;
അമ്ബം യസ്സ ഫലം സാദു, മധുരഗ്ഗം മനോരമം;
യമുദ്ധരിം വുയ്ഹമാനം, ഉദധിസ്മാ മഹണ്ണവേ.
൭. അക്ഖാതം തേ മയാ സബ്ബം, യസ്മാ ഉപവസാമഹം;
രമ്മം പതി നിസിന്നോസ്മി, പുഥുലോമായുതാ പുഥു.
൮. ത്വഞ്ച ഖോ മേവ [മേ (സീ.), മമ (?)] അക്ഖാഹി, അത്താനമപലായിനി;
കാ വാ ത്വമസി കല്യാണി, കിസ്സ വാ ത്വം സുമജ്ഝിമേ.
൯. രുപ്പപട്ടപലിമട്ഠീവ [രുപ്പപട്ടപ്ലമട്ഠീവ (സ്യാ.), രൂപപട്ടപമട്ഠീവ (ക.)], ബ്യഗ്ഘീവ ഗിരിസാനുജാ;
യാ സന്തി നാരിയോ ദേവേസു, ദേവാനം പരിചാരികാ.
൧൦. യാ ച മനുസ്സലോകസ്മിം, രൂപേനാന്വാഗതിത്ഥിയോ;
രൂപേന തേ സദിസീ നത്ഥി, ദേവേസു ഗന്ധബ്ബമനുസ്സലോകേ [ദേവഗന്ധബ്ബമാനുസേ (സ്യാ.)];
പുട്ഠാസി മേ ചാരുപുബ്ബങ്ഗി, ബ്രൂഹി നാമഞ്ച ബന്ധവേ.
൧൧. യം ത്വം പതി നിസിന്നോസി, രമ്മം ബ്രാഹ്മണ കോസികിം;
സാഹം ഭുസാലയാ വുത്ഥാ, വരവാരിവഹോഘസാ.
൧൨. നാനാദുമഗണാകിണ്ണാ, ബഹുകാ ഗിരികന്ദരാ;
മമേവ പമുഖാ ഹോന്തി, അഭിസന്ദന്തി പാവുസേ.
൧൩. അഥോ ബഹൂ വനതോദാ, നീലവാരിവഹിന്ധരാ;
ബഹുകാ നാഗവിത്തോദാ, അഭിസന്ദന്തി വാരിനാ.
൧൪. താ അമ്ബജമ്ബുലബുജാ, നീപാ താലാ ചുദുമ്ബരാ [താലമുദുമ്ബരാ (സ്യാ. ക.)];
ബഹൂനി ഫലജാതാനി, ആവഹന്തി അഭിണ്ഹസോ.
൧൫. യം കിഞ്ചി ഉഭതോ തീരേ, ഫലം പതതി അമ്ബുനി;
അസംസയം തം സോതസ്സ, ഫലം ഹോതി വസാനുഗം.
൧൬. ഏതദഞ്ഞായ മേധാവി, പുഥുപഞ്ഞ സുണോഹി മേ;
മാ രോചയ മഭിസങ്ഗം, പടിസേധ ജനാധിപ.
൧൭. ന വാഹം വഡ്ഢവം [വദ്ധവം (സീ. പീ.)] മഞ്ഞേ, യം ത്വം രട്ഠാഭിവഡ്ഢന;
ആചേയ്യമാനോ രാജിസി, മരണം അഭികങ്ഖസി.
൧൮. തസ്സ ജാനന്തി പിതരോ, ഗന്ധബ്ബാ ച സദേവകാ;
യേ ചാപി ഇസയോ ലോകേ, സഞ്ഞതത്താ തപസ്സിനോ;
അസംസയം തേപി [തേ (സീ. പീ.)] ജാനന്തി, പട്ഠഭൂതാ [വദ്ധഭൂതാ (സീ. പീ.)] യസസ്സിനോ.
൧൯. ഏവം വിദിത്വാ വിദൂ സബ്ബധമ്മം, വിദ്ധംസനം ചവനം ജീവിതസ്സ;
ന ചീയതീ തസ്സ നരസ്സ പാപം, സചേ ന ചേതേതി വധായ തസ്സ.
൨൦. ഇസിപൂഗസമഞ്ഞാതേ, ഏവം ലോക്യാ വിദിതാ സതി [പതി (ക. സ്യാ. ക.)];
അനരിയപരിസമ്ഭാസേ, പാപകമ്മം ജിഗീസസി [ജിഗിംസസി (സീ. സ്യാ. പീ.)].
൨൧. സചേ അഹം മരിസ്സാമി, തീരേ തേ പുഥുസുസ്സോണി;
അസംസയം തം അസിലോകോ, മയി പേതേ ആഗമിസ്സതി.
൨൨. തസ്മാ ഹി പാപകം കമ്മം, രക്ഖസ്സേവ [രക്ഖസ്സു ച (സ്യാ.)] സുമജ്ഝിമേ;
മാ തം സബ്ബോ ജനോ പച്ഛാ, പകുട്ഠായി [പകത്ഥാസി (സീ. പീ.), പത്വക്ഖാസി (സ്യാ.)] മയി മതേ.
൨൩. അഞ്ഞാതമേതം അവിസയ്ഹസാഹി, അത്താനമമ്ബഞ്ച ദദാമി തേ തം;
സോ ദുച്ചജേ കാമഗുണേ പഹായ, സന്തിഞ്ച ധമ്മഞ്ച അധിട്ഠിതോസി.
൨൪. യോ ഹിത്വാ പുബ്ബസഞ്ഞോഗം, പച്ഛാ സംയോജനേ ഠിതോ;
അധമ്മഞ്ചേവ ചരതി, പാപഞ്ചസ്സ പവഡ്ഢതി.
൨൫. ഏഹി തം പാപയിസ്സാമി, കാമം അപ്പോസ്സുകോ ഭവ;
ഉപാനയാമി സീതസ്മിം, വിഹരാഹി അനുസ്സുകോ.
൨൬. തം പുപ്ഫരസമത്തേഭി, വക്കങ്ഗേഹി അരിന്ദമ;
കോഞ്ചാ മയൂരാ ദിവിയാ, കോലട്ഠിമധുസാളികാ;
കൂജിതാ ഹംസപൂഗേഹി, കോകിലേത്ഥ പബോധരേ.
൨൭. അമ്ബേത്ഥ വിപ്പസാഖഗ്ഗാ [വിപ്പസൂനഗ്ഗാ (സീ. സ്യാ. പീ.), വിപ്പഓനഗ്ഗാ (ക.)], പലാലഖലസന്നിഭാ;
കോസമ്ബസളലാ [കോസുമ്ഭസലലാ (സീ. സ്യാ. പീ.)] നീപാ, പക്കതാലവിലമ്ബിനോ.
൨൮. മാലീ തിരിടീ കായൂരീ, അങ്ഗദീ ചന്ദനുസ്സദോ [ചന്ദനസ്സദോ (സീ.)];
രത്തിം ത്വം പരിചാരേസി, ദിവാ വേദേസി വേദനം.
൨൯. സോളസിത്ഥിസഹസ്സാനി, യാ തേമാ പരിചാരികാ;
ഏവം മഹാനുഭാവോസി, അബ്ഭുതോ ലോമഹംസനോ.
൩൦. കിം കമ്മമകരീ പുബ്ബേ, പാപം അത്തദുഖാവഹം;
യം കരിത്വാ മനുസ്സേസു, പിട്ഠിമംസാനി ഖാദസി.
൩൧. അജ്ഝേനാനി പടിഗ്ഗയ്ഹ, കാമേസു ഗധിതോ [ഗഥിതോ (സീ. പീ.), ഗിദ്ധിതോ (സ്യാ. ക.), ഗിദ്ധികോ (ക. അട്ഠ.)] അഹം;
അചരിം ദീഘമദ്ധാനം, പരേസം അഹിതായഹം.
൩൨. യോ പിട്ഠിമംസികോ ഹോതി, ഏവം ഉക്കച്ച ഖാദതി;
യഥാഹം അജ്ജ ഖാദാമി, പിട്ഠിമംസാനി അത്തനോതി.
കിംഛന്ദജാതകം പഠമം.
൫൧൨. കുമ്ഭജാതകം (൨)
൩൩. കോ പാതുരാസീ തിദിവാ നഭമ്ഹി, ഓഭാസയം സംവരിം ചന്ദിമാവ;
ഗത്തേഹി തേ രസ്മിയോ നിച്ഛരന്തി, സതേരതാ [സതേരിതാ (സീ. സ്യാ. ക.)] വിജ്ജുരിവന്തലിക്ഖേ.
൩൪. സോ ഛിന്നവാതം കമസീ അഘമ്ഹി, വേഹായസം ഗച്ഛസി തിട്ഠസീ ച;
ഇദ്ധീ നു തേ വത്ഥുകതാ സുഭാവിതാ, അനദ്ധഗൂനം അപി ദേവതാനം.
൩൫. വേഹായസം ഗമ്മമാഗമ്മ [കമമാഗമ്മ (സീ. സ്യാ.)] തിട്ഠസി, കുമ്ഭം കിണാഥാതി യമേതമത്ഥം;
കോ വാ തുവം കിസ്സ വാ തായ കുമ്ഭോ, അക്ഖാഹി മേ ബ്രാഹ്മണ ഏതമത്ഥം.
൩൬. ന സപ്പികുമ്ഭോ നപി തേലകുമ്ഭോ, ന ഫാണിതസ്സ ന മധുസ്സ കുമ്ഭോ;
കുമ്ഭസ്സ വജ്ജാനി അനപ്പകാനി, ദോസേ ബഹൂ കുമ്ഭഗതേ സുണാഥ.
൩൭. ഗളേയ്യ യം പിത്വാ [പീത്വാ (സീ. പീ.)] പതേ പപാതം, സോബ്ഭം ഗുഹം ചന്ദനിയോളിഗല്ലം;
ബഹുമ്പി ഭുഞ്ജേയ്യ അഭോജനേയ്യം, തസ്സാ പുണ്ണം കുമ്ഭമിമം കിണാഥ.
൩൮. യം പിത്വാ [യം വേ പീത്വാ (സീ.)] ചിത്തസ്മിമനേസമാനോ, ആഹിണ്ഡതീ ഗോരിവ ഭക്ഖസാരീ [ഭക്ഖസാദീ (സീ. സ്യാ. അട്ഠ.)];
അനാഥമാനോ ഉപഗായതി നച്ചതി ച, തസ്സാ പുണ്ണം കുമ്ഭമിമം കിണാഥ.
൩൯. യം വേ പിവിത്വാ അചേലോവ നഗ്ഗോ, ചരേയ്യ ഗാമേ വിസിഖന്തരാനി;
സമ്മൂള്ഹചിത്തോ അതിവേലസായീ, തസ്സാ പുണ്ണം കുമ്ഭമിമം കിണാഥ.
൪൦. യം പിത്വാ ഉട്ഠായ പവേധമാനോ, സീസഞ്ച ബാഹുഞ്ച [ബാഹഞ്ച (പീ.)] പചാലയന്തോ;
സോ നച്ചതീ ദാരുകടല്ലകോവ, തസ്സാ പുണ്ണം കുമ്ഭമിമം കിണാഥ.
൪൧. യം വേ പിവിത്വാ അഗ്ഗിദഡ്ഢാ സയന്തി, അഥോ സിഗാലേഹിപി ഖാദിതാസേ;
ബന്ധം വധം ഭോഗജാനിഞ്ചുപേന്തി, തസ്സാ പുണ്ണം കുമ്ഭമിമം കിണാഥ.
൪൨. യം പിത്വാ ഭാസേയ്യ ആഭാസനേയ്യം, സഭായമാസീനോ അപേതവത്ഥോ;
സമ്മക്ഖിതോ [സമക്ഖിതോ (സീ.)] വന്തഗതോ ബ്യസന്നോ, തസ്സാ പുണ്ണം കുമ്ഭമിമം കിണാഥ.
൪൩. യം വേ പിവിത്വാ ഉക്കട്ഠോ ആവിലക്ഖോ, മമേവ സബ്ബാ പഥവീതി മഞ്ഞേ [മഞ്ഞതി (സീ.)];
ന മേ സമോ ചാതുരന്തോപി രാജാ, തസ്സാ പുണ്ണം കുമ്ഭമിമം കിണാഥ.
൪൪. മാനാതിമാനാ കലഹാനി പേസുണീ, ദുബ്ബണ്ണിനീ നഗ്ഗയിനീ പലായിനീ;
ചോരാന ധുത്താന ഗതീ നികേതോ, തസ്സാ പുണ്ണം കുമ്ഭമിമം കിണാഥ.
൪൫. ഇദ്ധാനി ഫീതാനി കുലാനി അസ്സു, അനേകസാഹസ്സധനാനി ലോകേ;
ഉച്ഛിന്നദായജ്ജകതാനിമായ, തസ്സാ പുണ്ണം കുമ്ഭമിമം കിണാഥ.
൪൬. ധഞ്ഞം ധനം രജതം ജാതരൂപം, ഖേത്തം ഗവം യത്ഥ വിനാസയന്തി;
ഉച്ഛേദനീ വിത്തവതം [ഉച്ഛേദനീ വിത്തഗതം (സ്യാ.), ഉച്ഛേദനിവിത്തഗതം (ക.)] കുലാനം, തസ്സാ പുണ്ണം കുമ്ഭമിമം കിണാഥ.
൪൭. യം വേ പിത്വാ ദിത്തരൂപോവ [ദുട്ഠരൂപോവ (സീ.)] പോസോ, അക്കോസതി മാതരം പിതരഞ്ച;
സസ്സുമ്പി ഗണ്ഹേയ്യ അഥോപി സുണ്ഹം, തസ്സാ പുണ്ണം കുമ്ഭമിമം കിണാഥ.
൪൮. യം വേ പിത്വാ ദിത്തരൂപാവ നാരീ, അക്കോസതി സസുരം സാമികഞ്ച;
ദാസമ്പി ഗണ്ഹേ പരിചാരകമ്പി, തസ്സാ പുണ്ണം കുമ്ഭമിമം കിണാഥ.
൪൯. യം വേ പിവിത്വാന [യഞ്ചേ പീത്വാന (പീ.)] ഹനേയ്യ പോസോ, ധമ്മേ ഠിതം സമണം ബ്രാഹ്മണം വാ;
ഗച്ഛേ അപായമ്പി തതോനിദാനം, തസ്സാ പുണ്ണം കുമ്ഭമിമം കിണാഥ.
൫൦. യം വേ പിവിത്വാ ദുച്ചരിതം ചരന്തി, കായേന വാചായ ച ചേതസാ ച;
നിരയം വജന്തി ദുച്ചരിതം ചരിത്വാ, തസ്സാ പുണ്ണം കുമ്ഭമിമം കിണാഥ.
൫൧. യം യാചമാനാ ന ലഭന്തി പുബ്ബേ, ബഹും ഹിരഞ്ഞമ്പി പരിച്ചജന്താ;
സോ തം പിവിത്വാ അലികം ഭണാതി, തസ്സാ പുണ്ണം കുമ്ഭമിമം കിണാഥ.
൫൨. യം വേ പിത്വാ പേസനേ പേസിയന്തോ, അച്ചായികേ കരണീയമ്ഹി ജാതേ;
അത്ഥമ്പി സോ നപ്പജാനാതി വുത്തോ, തസ്സാ പുണ്ണം കുമ്ഭമിമം കിണാഥ.
൫൩. ഹിരീമനാപി അഹിരീകഭാവം, പാതും കരോന്തി മദനായ [മദിരായ (പീ.)] മത്താ;
ധീരാപി സന്താ ബഹുകം ഭണന്തി, തസ്സാ പുണ്ണം കുമ്ഭമിമം കിണാഥ.
൫൪. യം വേ പിത്വാ ഏകഥൂപാ സയന്തി, അനാസകാ ഥണ്ഡിലദുക്ഖസേയ്യം;
ദുബ്ബണ്ണിയം ആയസക്യഞ്ചുപേന്തി, തസ്സാ പുണ്ണം കുമ്ഭമിമം കിണാഥ.
൫൫. യം വേ പിത്വാ പത്തഖന്ധാ സയന്തി, ഗാവോ കുടഹതാവ ന ഹി വാരുണിയാ;
[യം വേ പിത്വാ പത്തക്ഖന്ധാ, സയന്തി ഗാവോ കൂടഹതാരിവ; ന ഹി വാരുണിയാ വേഗോ, നരേന സുസ്സഹോരിവ; (സീ.)] വേഗോ നരേന സുസഹോരിവ [യം വേ പിത്വാ പത്തക്ഖന്ധാ, സയന്തി ഗാവോ കൂടഹതാരിവ; ന ഹി വാരുണിയാ വേഗോ, നരേന സുസ്സഹോരിവ; (സീ.)], തസ്സാ പുണ്ണം കുമ്ഭമിമം കിണാഥ.
൫൬. യം മനുസ്സാ വിവജ്ജേന്തി, സപ്പം ഘോരവിസം മിവ [വിസമിവ (സ്യാ.), വിസം ഇവ (ക.), വിസാമിവ (?)];
തം ലോകേ വിസസമാനം, കോ നരോ പാതുമരഹതി.
൫൭. യം വേ പിത്വാ അന്ധകവേണ്ഡപുത്താ, സമുദ്ദതീരേ പരിചാരയന്താ [അന്ധകവേണ്ഹുപുത്താ (സീ. പീ.), അണ്ഡകവേണ്ഡപുത്താ (ക.)];
ഉപക്കമും മുസലേഹഞ്ഞമഞ്ഞം, തസ്സാ പുണ്ണം കുമ്ഭമിമം കിണാഥ.
൫൮. യം വേ പിത്വാ പുബ്ബദേവാ പമത്താ, തിദിവാ ചുതാ സസ്സതിയാ സമായ;
തം താദിസം മജ്ജമിമം നിരത്ഥകം, ജാനം മഹാരാജ കഥം പിവേയ്യ.
൫൯. നയിമസ്മിം കുമ്ഭസ്മിം ദധി വാ മധു വാ, ഏവം അഭിഞ്ഞായ കിണാഹി രാജ;
ഏവഞ്ഹിമം കുമ്ഭഗതാ മയാ തേ, അക്ഖാതരൂപം തവ സബ്ബമിത്ത.
൬൦. ന മേ പിതാ വാ അഥവാപി മാതാ, ഏതാദിസാ യാദിസകോ തുവംസി;
ഹിതാനുകമ്പീ പരമത്ഥകാമോ, സോഹം കരിസ്സം വചനം തവജ്ജ.
൬൧. ദദാമി തേ ഗാമവരാനി പഞ്ച, ദാസീസതം സത്ത ഗവം സതാനി;
ആജഞ്ഞയുത്തേ ച രഥേ ദസ ഇമേ, ആചരിയോ ഹോസി മമത്ഥകാമോ.
൬൨. തവേവ ദാസീസതമത്ഥു രാജ, ഗാമാ ച ഗാവോ ച തവേവ ഹോന്തു;
ആജഞ്ഞയുത്താ ച രഥാ തവേവ, സക്കോഹമസ്മീ തിദസാനമിന്ദോ.
൬൩. മംസോദനം സപ്പിപായാസം [സപ്പിപായഞ്ച (സീ.)] ഭുഞ്ജ, ഖാദസ്സു ച ത്വം മധുമാസപൂവേ;
ഏവം തുവം ധമ്മരതോ ജനിന്ദ, അനിന്ദിതോ സഗ്ഗമുപേഹി ഠാനന്തി.
കുമ്ഭജാതകം ദുതിയം.
൫൧൩. ജയദ്ദിസജാതകം (൩)
൬൪. ചിരസ്സം വത മേ ഉദപാദി അജ്ജ, ഭക്ഖോ മഹാ സത്തമിഭത്തകാലേ;
കുതോസി കോ വാസി തദിങ്ഘ ബ്രൂഹി, ആചിക്ഖ ജാതിം വിദിതോ യഥാസി.
൬൫. പഞ്ചാലരാജാ മിഗവം പവിട്ഠോ, ജയദ്ദിസോ നാമ യദിസ്സുതോ തേ;
ചരാമി കച്ഛാനി വനാനി ചാഹം, പസദം ഇമം ഖാദ മമജ്ജ മുഞ്ച.
൬൬. സേനേവ ത്വം പണസി സസ്സമാനോ [സയ്ഹമാനോ (സ്യാ. ക.)], മമേസ ഭക്ഖോ പസദോ യം വദേസി;
തം ഖാദിയാന പസദം ജിഘഞ്ഞം [ജിഘച്ഛം (?)], ഖാദിസ്സം പച്ഛാ ന വിലാപകാലോ.
൬൭. ന ചത്ഥി മോക്ഖോ മമ നിക്കയേന [വിക്കയേന (സീ.)], ഗന്ത്വാന പച്ചാഗമനായ പണ്ഹേ;
തം സങ്കരം [സങ്ഗരം (സീ. സ്യാ. പീ.)] ബ്രാഹ്മണസ്സപ്പദായ, സച്ചാനുരക്ഖീ പുനരാവജിസ്സം.
൬൮. കിം കമ്മജാതം അനുതപ്പതേ ത്വം [അനുതപ്പതീ തം (സീ. പീ.)], പത്തം സമീപം മരണസ്സ രാജ;
ആചിക്ഖ മേ തം അപി സക്കുണേമു, അനുജാനിതും ആഗമനായ പണ്ഹേ.
൬൯. കതാ മയാ ബ്രാഹ്മണസ്സ ധനാസാ, തം സങ്കരം പടിമുക്കം ന മുത്തം;
തം സങ്കരം ബ്രാഹ്മണസ്സപ്പദായ, സച്ചാനുരക്ഖീ പുനരാവജിസ്സം.
൭൦. യാ തേ കതാ ബ്രാഹ്മണസ്സ ധനാസാ, തം സങ്കരം പടിമുക്കം ന മുത്തം;
തം സങ്കരം ബ്രാഹ്മണസ്സപ്പദായ, സച്ചാനുരക്ഖീ പുനരാവജസ്സു.