൫൧൫. സമ്ഭവജാതകം (൫)

൧൩൮. രജ്ജഞ്ച പടിപന്നാസ്മ, ആധിപച്ചം സുചീരത;

മഹത്തം പത്തുമിച്ഛാമി, വിജേതും പഥവിം ഇമം.

൧൩൯. ധമ്മേന നോ അധമ്മേന, അധമ്മോ മേ ന രുച്ചതി;

കിച്ചോവ ധമ്മോ ചരിതോ, രഞ്ഞോ ഹോതി സുചീരത.

൧൪൦. ഇധ ചേവാനിന്ദിതാ യേന, പേച്ച യേന അനിന്ദിതാ;

യസം ദേവമനുസ്സേസു, യേന പപ്പോമു [പപ്പേമു (സീ. അട്ഠ.)] ബ്രാഹ്മണ.

൧൪൧. യോഹം അത്ഥഞ്ച ധമ്മഞ്ച, കത്തുമിച്ഛാമി ബ്രാഹ്മണ;

തം ത്വം അത്ഥഞ്ച ധമ്മഞ്ച, ബ്രാഹ്മണക്ഖാഹി പുച്ഛിതോ.

൧൪൨. നാഞ്ഞത്ര വിധുരാ രാജ, ഏതദക്ഖാതുമരഹതി;

യം ത്വം അത്ഥഞ്ച ധമ്മഞ്ച, കത്തുമിച്ഛസി ഖത്തിയ.

൧൪൩. ഏഹി ഖോ പഹിതോ ഗച്ഛ, വിധുരസ്സ ഉപന്തികം;

നിക്ഖഞ്ചിമം [നിക്ഖം രത്ത (സീ.), നിക്ഖമിമം (പീ.)] സുവണ്ണസ്സ, ഹരം ഗച്ഛ സുചീരത;

അഭിഹാരം ഇമം ദജ്ജാ, അത്ഥധമ്മാനുസിട്ഠിയാ.

൧൪൪. സ്വാധിപ്പാഗാ ഭാരദ്വാജോ, വിധുരസ്സ ഉപന്തികം;

തമദ്ദസ മഹാബ്രഹ്മാ, അസമാനം സകേ ഘരേ.

൧൪൫. രഞ്ഞോഹം പഹിതോ ദൂതോ, കോരബ്യസ്സ യസസ്സിനോ;

‘‘അത്ഥം ധമ്മഞ്ച പുച്ഛേസി’’, ഇച്ചബ്രവി യുധിട്ഠിലോ;

തം ത്വം അത്ഥഞ്ച ധമ്മഞ്ച, വിധുരക്ഖാഹി പുച്ഛിതോ.

൧൪൬. ഗങ്ഗം മേ പിദഹിസ്സന്തി, ന തം സക്കോമി ബ്രാഹ്മണ;

അപിധേതും മഹാസിന്ധും, തം കഥം സോ ഭവിസ്സതി.

൧൪൭. ന തേ സക്കോമി അക്ഖാതും, അത്ഥം ധമ്മഞ്ച പുച്ഛിതോ;

ഭദ്രകാരോ ച മേ പുത്തോ, ഓരസോ മമ അത്രജോ;

തം ത്വം അത്ഥഞ്ച ധമ്മഞ്ച, ഗന്ത്വാ പുച്ഛസ്സു ബ്രാഹ്മണ.

൧൪൮. സ്വാധിപ്പാഗാ ഭാരദ്വാജോ, ഭദ്രകാരസ്സുപന്തികം [ഭദ്രകാരസ്സ സന്തികം (സീ. സ്യാ.)];

തമദ്ദസ മഹാബ്രഹ്മാ, നിസിന്നം സമ്ഹി വേസ്മനി.

൧൪൯. രഞ്ഞോഹം പഹിതോ ദൂതോ, കോരബ്യസ്സ യസസ്സിനോ;

‘‘അത്ഥം ധമ്മഞ്ച പുച്ഛേസി’’, ഇച്ചബ്രവി യുധിട്ഠിലോ;

തം ത്വം അത്ഥഞ്ച ധമ്മഞ്ച, ഭദ്രകാര പബ്രൂഹി [ബ്രവീഹി (സീ. പീ.)] മേ.

൧൫൦. മംസകാജം [മംസകാചം (പീ.)] അവഹായ, ഗോധം അനുപതാമഹം;

ന തേ സക്കോമി അക്ഖാതും, അത്ഥം ധമ്മഞ്ച പുച്ഛിതോ.

൧൫൧. സഞ്ചയോ [സഞ്ജയോ (സീ. സ്യാ. പീ.)] നാമ മേ ഭാതാ, കനിട്ഠോ മേ സുചീരത;

തം ത്വം അത്ഥഞ്ച ധമ്മഞ്ച, ഗന്ത്വാ പുച്ഛസ്സു ബ്രാഹ്മണ.

൧൫൨. സ്വാധിപ്പാഗാ ഭാരദ്വാജോ, സഞ്ചയസ്സ ഉപന്തികം;

തമദ്ദസ മഹാബ്രഹ്മാ, നിസിന്നം സമ്ഹി വേസ്മനി [പരിസതി (സ്യാ.), പരീസതി (പീ.)].

൧൫൩. രഞ്ഞോഹം പഹിതോ ദൂതോ, കോരബ്യസ്സ യസസ്സിനോ;

‘‘അത്ഥം ധമ്മഞ്ച പുച്ഛേസി’’, ഇച്ചബ്രവി യുധിട്ഠിലോ;

തം ത്വം അത്ഥഞ്ച ധമ്മഞ്ച, സഞ്ചയക്ഖാഹി പുച്ഛിതോ.

൧൫൪. സദാ മം ഗിലതേ [ഗിലതീ (സീ.), ഗിലതി (പീ.)] മച്ചു, സായം പാതോ സുചീരത;

ന തേ സക്കോമി അക്ഖാതും, അത്ഥം ധമ്മഞ്ച പുച്ഛിതോ.

൧൫൫. സമ്ഭവോ നാമ മേ ഭാതാ, കനിട്ഠോ മേ സുചീരത;

തം ത്വം അത്ഥഞ്ച ധമ്മഞ്ച, ഗന്ത്വാ പുച്ഛസ്സു ബ്രാഹ്മണ.

൧൫൬. അബ്ഭുതോ വത ഭോ ധമ്മോ, നായം അസ്മാക രുച്ചതി;

തയോ ജനാ പിതാപുത്താ, തേസു പഞ്ഞായ നോ വിദൂ.

൧൫൭. ന തം സക്കോഥ അക്ഖാതും, അത്ഥം ധമ്മഞ്ച പുച്ഛിതാ;

കഥം നു ദഹരോ ജഞ്ഞാ, അത്ഥം ധമ്മഞ്ച പുച്ഛിതോ.

൧൫൮. മാ നം ദഹരോതി ഉഞ്ഞാസി [മഞ്ഞാസി (സ്യാ. ക.)], അപുച്ഛിത്വാന സമ്ഭവം;

പുച്ഛിത്വാ സമ്ഭവം ജഞ്ഞാ, അത്ഥം ധമ്മഞ്ച ബ്രാഹ്മണ.

൧൫൯. യഥാപി ചന്ദോ വിമലോ, ഗച്ഛം ആകാസധാതുയാ;

സബ്ബേ താരാഗണേ ലോകേ, ആഭായ അതിരോചതി.

൧൬൦. ഏവമ്പി ദഹരൂപേതോ, പഞ്ഞായോഗേന സമ്ഭവോ;

മാ നം ദഹരോതി ഉഞ്ഞാസി, അപുച്ഛിത്വാന സമ്ഭവം;

പുച്ഛിത്വാ സമ്ഭവം ജഞ്ഞാ, അത്ഥം ധമ്മഞ്ച ബ്രാഹ്മണ.

൧൬൧. യഥാപി രമ്മകോ മാസോ, ഗിമ്ഹാനം ഹോതി ബ്രാഹ്മണ;

അതേവഞ്ഞേഹി മാസേഹി, ദുമപുപ്ഫേഹി സോഭതി.

൧൬൨. ഏവമ്പി ദഹരൂപേതോ, പഞ്ഞായോഗേന സമ്ഭവോ;

മാ നം ദഹരോതി ഉഞ്ഞാസി, അപുച്ഛിത്വാന സമ്ഭവം;

പുച്ഛിത്വാ സമ്ഭവം ജഞ്ഞാ, അത്ഥം ധമ്മഞ്ച ബ്രാഹ്മണ.

൧൬൩. യഥാപി ഹിമവാ ബ്രഹ്മേ, പബ്ബതോ ഗന്ധമാദനോ;

നാനാരുക്ഖേഹി സഞ്ഛന്നോ, മഹാഭൂതഗണാലയോ;

ഓസധേഹി ച ദിബ്ബേഹി, ദിസാ ഭാതി പവാതി ച.

൧൬൪. ഏവമ്പി ദഹരൂപേതോ, പഞ്ഞായോഗേന സമ്ഭവോ;

മാ നം ദഹരോതി ഉഞ്ഞാസി, അപുച്ഛിത്വാന സമ്ഭവം;

പുച്ഛിത്വാ സമ്ഭവം ജഞ്ഞാ, അത്ഥം ധമ്മഞ്ച ബ്രാഹ്മണ.

൧൬൫. യഥാപി പാവകോ ബ്രഹ്മേ, അച്ചിമാലീ യസസ്സിമാ;

ജലമാനോ വനേ ഗച്ഛേ [ചരം കച്ഛേ (പീ.)], അനലോ കണ്ഹവത്തനീ.

൧൬൬. ഘതാസനോ ധൂമകേതു, ഉത്തമാഹേവനന്ദഹോ;

നിസീഥേ [നിസ്സീവേ (സ്യാ.), നിസിവേ (ക.)] പബ്ബതഗ്ഗസ്മിം, പഹൂതേധോ [ബഹുതേജോ (സ്യാ. ക.)] വിരോചതി.

൧൬൭. ഏവമ്പി ദഹരൂപേതോ, പഞ്ഞായോഗേന സമ്ഭവോ;

മാ നം ദഹരോതി ഉഞ്ഞാസി, അപുച്ഛിത്വാന സമ്ഭവം;

പുച്ഛിത്വാ സമ്ഭവം ജഞ്ഞാ, അത്ഥം ധമ്മഞ്ച ബ്രാഹ്മണ.

൧൬൮. ജവേന ഭദ്രം ജാനന്തി, ബലിബദ്ദഞ്ച [ബലിവദ്ദഞ്ച (സീ. പീ.)] വാഹിയേ;

ദോഹേന ധേനും ജാനന്തി, ഭാസമാനഞ്ച പണ്ഡിതം.

൧൬൯. ഏവമ്പി ദഹരൂപേതോ, പഞ്ഞായോഗേന സമ്ഭവോ;

മാ നം ദഹരോതി ഉഞ്ഞാസി, അപുച്ഛിത്വാന സമ്ഭവം;

പുച്ഛിത്വാ സമ്ഭവം ജഞ്ഞാ, അത്ഥം ധമ്മഞ്ച ബ്രാഹ്മണ.

൧൭൦. സ്വാധിപ്പാഗാ ഭാരദ്വാജോ, സമ്ഭവസ്സ ഉപന്തികം;

തമദ്ദസ മഹാബ്രഹ്മാ, കീളമാനം ബഹീപുരേ.

൧൭൧. രഞ്ഞോഹം പഹിതോ ദൂതോ, കോരബ്യസ്സ യസസ്സിനോ;

‘‘അത്ഥം ധമ്മഞ്ച പുച്ഛേസി’’, ഇച്ചബ്രവി യുധിട്ഠിലോ;

തം ത്വം അത്ഥഞ്ച ധമ്മഞ്ച, സമ്ഭവക്ഖാഹി പുച്ഛിതോ.

൧൭൨. തഗ്ഘ തേ അഹമക്ഖിസ്സം, യഥാപി കുസലോ തഥാ;

രാജാ ച ഖോ തം ജാനാതി, യദി കാഹതി വാ ന വാ.

൧൭൩. ‘‘അജ്ജ സുവേ’’തി സംസേയ്യ, രഞ്ഞാ പുട്ഠോ സുചീരത;

മാ കത്വാ അവസീ രാജാ, അത്ഥേ ജാതേ യുധിട്ഠിലോ.

൧൭൪. അജ്ഝത്തഞ്ഞേവ സംസേയ്യ, രഞ്ഞാ പുട്ഠോ സുചീരത;

കുമ്മഗ്ഗം ന നിവേസേയ്യ, യഥാ മൂള്ഹോ അചേതസോ [അചേതനോ (ക.)].

൧൭൫. അത്താനം നാതിവത്തേയ്യ, അധമ്മം ന സമാചരേ;

അതിത്ഥേ നപ്പതാരേയ്യ, അനത്ഥേ ന യുതോ സിയാ.

൧൭൬. യോ ച ഏതാനി ഠാനാനി, കത്തും ജാനാതി ഖത്തിയോ;

സദാ സോ വഡ്ഢതേ രാജാ, സുക്കപക്ഖേവ ചന്ദിമാ.

൧൭൭. ഞാതീനഞ്ച പിയോ ഹോതി, മിത്തേസു ച വിരോചതി;

കായസ്സ ഭേദാ സപ്പഞ്ഞോ, സഗ്ഗം സോ ഉപപജ്ജതീതി.

സമ്ഭവജാതകം പഞ്ചമം.