൫൧൪. ഛദ്ദന്തജാതകം (൪)
൯൭. കിം നു സോചസിനുച്ചങ്ഗി, പണ്ഡൂസി വരവണ്ണിനി;
മിലായസി വിസാലക്ഖി, മാലാവ പരിമദ്ദിതാ.
൯൮. ദോഹളോ മേ മഹാരാജ, സുപിനന്തേനുപജ്ഝഗാ [നു’പച്ചഗാ (സീ. സ്യാ. പീ.)];
ന സോ സുലഭരൂപോവ, യാദിസോ മമ ദോഹളോ.
൯൯. യേ കേചി മാനുസാ കാമാ, ഇധ ലോകസ്മി നന്ദനേ;
സബ്ബേ തേ പചുരാ മയ്ഹം, അഹം തേ ദമ്മി ദോഹളം.
൧൦൦. ലുദ്ദാ ദേവ സമായന്തു, യേ കേചി വിജിതേ തവ;
ഏതേസം അഹമക്ഖിസ്സം, യാദിസോ മമ ദോഹളോ.
൧൦൧. ഇമേ തേ ലുദ്ദകാ ദേവി, കതഹത്ഥാ വിസാരദാ;
വനഞ്ഞൂ ച മിഗഞ്ഞൂ ച, മമത്ഥേ [മമ തേ (പീ.)] ചത്തജീവിതാ.
൧൦൨. ലുദ്ദപുത്താ നിസാമേഥ, യാവന്തേത്ഥ സമാഗതാ;
ഛബ്ബിസാണം ഗജം സേതം, അദ്ദസം സുപിനേ അഹം;
തസ്സ ദന്തേഹി മേ അത്ഥോ, അലാഭേ നത്ഥി ജീവിതം.
൧൦൩. ന നോ പിതൂനം ന പിതാമഹാനം, ദിട്ഠോ സുതോ കുഞ്ജരോ ഛബ്ബിസാണോ;
യമദ്ദസാ സുപിനേ രാജപുത്തീ, അക്ഖാഹി നോ യാദിസോ ഹത്ഥിനാഗോ.
൧൦൪. ദിസാ ചതസ്സോ വിദിസാ ചതസ്സോ, ഉദ്ധം അധോ ദസ ദിസാ ഇമായോ;
കതമം ദിസം തിട്ഠതി നാഗരാജാ, യമദ്ദസാ സുപിനേ ഛബ്ബിസാണം.
൧൦൫. ഇതോ ഉജും ഉത്തരിയം ദിസായം, അതിക്കമ്മ സോ സത്തഗിരീ ബ്രഹന്തേ;
സുവണ്ണപസ്സോ നാമ ഗിരീ ഉളാരോ, സുപുപ്ഫിതോ [സമ്പുപ്ഫിതോ (സ്യാ.)] കിമ്പുരിസാനുചിണ്ണോ.
൧൦൬. ആരുയ്ഹ സേലം ഭവനം കിന്നരാനം, ഓലോകയ പബ്ബതപാദമൂലം;
അഥ ദക്ഖസീ മേഘസമാനവണ്ണം, നിഗ്രോധരാജം അഥ സഹസ്സപാദം [പോരം (ക.)].
൧൦൭. തത്ഥച്ഛതീ കുഞ്ജരോ ഛബ്ബിസാണോ, സബ്ബസേതോ ദുപ്പസഹോ പരേഭി;
രക്ഖന്തി നം അട്ഠസഹസ്സനാഗാ, ഈസാദന്താ വാതജവപ്പഹാരിനോ.
൧൦൮. തിട്ഠന്തി തേ തുമൂലം [തുമൂല (സ്യാ.), ഭിമൂല (പീ. ക.)] പസ്സസന്താ, കുപ്പന്തി വാതസ്സപി ഏരിതസ്സ;
മനുസ്സഭൂതം പന തത്ഥ ദിസ്വാ, ഭസ്മം കരേയ്യും നാസ്സ രജോപി തസ്സ.
൧൦൯. ബഹൂ ഹിമേ രാജകുലമ്ഹി സന്തി, പിളന്ധനാ ജാതരൂപസ്സ ദേവീ;
മുത്താമണീവേളുരിയാമയാ ച, കിം കാഹസി ദന്തപിളന്ധനേന;
മാരേതുകാമാ കുഞ്ജരം ഛബ്ബിസാണം, ഉദാഹു ഘാതേസ്സസി ലുദ്ദപുത്തേ.
൧൧൦. സാ ഇസ്സിതാ ദുക്ഖിതാ ചസ്മി ലുദ്ദ, ഉദ്ധഞ്ച സുസ്സാമി അനുസ്സരന്തീ;
കരോഹി മേ ലുദ്ദക ഏതമത്ഥം, ദസ്സാമി തേ ഗാമവരാനി പഞ്ച.
൧൧൧. കത്ഥച്ഛതീ കത്ഥമുപേതി ഠാനം, വീഥിസ്സ കാ ന്ഹാന [നഹാന (സീ. പീ.)] ഗതസ്സ ഹോതി;
കഥഞ്ഹി സോ ന്ഹായതി [നഹായതി (സീ. പീ.)] നാഗരാജാ, കഥം വിജാനേമു ഗതിം ഗജസ്സ.
൧൧൨. തത്ഥേവ സാ പോക്ഖരണീ അദൂരേ [അവിദൂരേ (സ്യാ. ക.)], രമ്മാ സുതിത്ഥാ ച മഹോദികാ [മഹോദകാ (സ്യാ. ക.)] ച;
സമ്പുപ്ഫിതാ ഭമരഗണാനുചിണ്ണാ [കിണ്ണാ (കത്ഥചി)], ഏത്ഥ ഹി സോ ന്ഹായതി നാഗരാജാ.
൧൧൩. സീസം നഹാതുപ്പല [നഹാതോ ഉപ്പല (സീ. സ്യാ. പീ.)] മാലഭാരീ, സബ്ബസേതോ പുണ്ഡരീകത്തചങ്ഗീ;
ആമോദമാനോ ഗച്ഛതി സന്നികേതം, പുരക്ഖത്വാ മഹേസിം സബ്ബഭദ്ദം.
൧൧൪. തത്ഥേവ സോ ഉഗ്ഗഹേത്വാന വാക്യം, ആദായ തൂണിഞ്ച ധനുഞ്ച ലുദ്ദോ;
വിതുരിയതി [വിതുരിയ സോ (സീ. അട്ഠ.)] സത്തഗിരീ ബ്രഹന്തേ, സുവണ്ണപസ്സം നാമ ഗിരിം ഉളാരം.
൧൧൫. ആരുയ്ഹ സേലം ഭവനം കിന്നരാനം, ഓലോകയീ പബ്ബതപാദമൂലം;
തത്ഥദ്ദസാ മേഘസമാനവണ്ണം, നിഗ്രോധരാജം അട്ഠസഹസ്സപാദം.
൧൧൬. തത്ഥദ്ദസാ കുഞ്ജരം ഛബ്ബിസാണം, സബ്ബസേതം ദുപ്പസഹം പരേഭി;
രക്ഖന്തി നം അട്ഠസഹസ്സനാഗാ, ഈസാദന്താ വാതജവപ്പഹാരിനോ.
൧൧൭. തത്ഥദ്ദസാ പോക്ഖരണിം അദൂരേ, രമ്മം സുതിത്ഥഞ്ച മഹോദികഞ്ച;
സമ്പുപ്ഫിതം ഭമരഗണാനുചിണ്ണം, യത്ഥ ഹി സോ ന്ഹായതി നാഗരാജാ.
൧൧൮. ദിസ്വാന നാഗസ്സ ഗതിം ഠിതിഞ്ച, വീഥിസ്സ യാ ന്ഹാനഗതസ്സ ഹോതി;
ഓപാതമാഗച്ഛി അനരിയരൂപോ, പയോജിതോ ചിത്തവസാനുഗായ.
൧൧൯. ഖണിത്വാന കാസും ഫലകേഹി ഛാദയി, അത്താനമോധായ ധനുഞ്ച ലുദ്ദോ;
പസ്സാഗതം പുഥുസല്ലേന നാഗം, സമപ്പയീ ദുക്കടകമ്മകാരീ.
൧൨൦. വിദ്ധോ ച നാഗോ കോഞ്ചമനാദി ഘോരം, സബ്ബേ ച [സബ്ബേവ (സീ. സ്യാ. പീ.)] നാഗാ നിന്നദും [നിന്നാദു (സ്യാ.), നിന്നാദം (ക.)] ഘോരരൂപം;
തിണഞ്ച കട്ഠഞ്ച രണം [ചുണ്ണം (ക. സീ. പീ.)] കരോന്താ, ധാവിംസു തേ അട്ഠദിസാ സമന്തതോ.
൧൨൧. വധിസ്സമേതന്തി [വധിസ്സമേനന്തി (സ്യാ.)] പരാമസന്തോ, കാസാവമദ്ദക്ഖി ധജം ഇസീനം;
ദുക്ഖേന ഫുട്ഠസ്സുദപാദി സഞ്ഞാ, അരഹദ്ധജോ സബ്ഭി അവജ്ഝരൂപോ.
൧൨൨. അനിക്കസാവോ കാസാവം, യോ വത്ഥം പരിദഹിസ്സതി [പരിദഹേസ്സതി (സീ. പീ.), പരിധസ്സതി (കത്ഥചി)];
അപേതോ ദമസച്ചേന, ന സോ കാസാവമരഹതി.
൧൨൩. യോ ച വന്തകസാവസ്സ, സീലേസു സുസമാഹിതോ;
ഉപേതോ ദമസച്ചേന, സ വേ കാസാവമരഹതി.
൧൨൪. സമപ്പിതോ പുഥുസല്ലേന നാഗോ, അദുട്ഠചിത്തോ ലുദ്ദകമജ്ഝഭാസി;
കിമത്ഥയം കിസ്സ വാ സമ്മ ഹേതു, മമം വധീ കസ്സ വായം പയോഗോ.
൧൨൫. കാസിസ്സ രഞ്ഞോ മഹേസീ ഭദന്തേ, സാ പൂജിതാ രാജകുലേ സുഭദ്ദാ;
തം അദ്ദസാ സാ ച മമം അസംസി, ദന്തേഹി അത്ഥോതി ച മം [അത്ഥോതി മമം (സ്യാ. ക.)] അവോച.
൧൨൬. ബഹൂ ഹി മേ ദന്തയുഗാ ഉളാരാ, യേ മേ പിതൂനഞ്ച [പിതുന്നമ്പി (പീ.)] പിതാമഹാനം;
ജാനാതി സാ കോധനാ രാജപുത്തീ, വധത്ഥികാ വേരമകാസി ബാലാ.
൧൨൭. ഉട്ഠേഹി ത്വം ലുദ്ദ ഖരം ഗഹേത്വാ, ദന്തേ ഇമേ ഛിന്ദ പുരാ മരാമി;
വജ്ജാസി തം കോധനം രാജപുത്തിം, ‘‘നാഗോ ഹതോ ഹന്ദ ഇമസ്സ ദന്താ’’.
൧൨൮. ഉട്ഠായ സോ ലുദ്ദോ ഖരം ഗഹേത്വാ, ഛേത്വാന ദന്താനി ഗജുത്തമസ്സ;
വഗ്ഗൂ സുഭേ അപ്പടിമേ പഥബ്യാ, ആദായ പക്കാമി തതോ ഹി ഖിപ്പം.
൧൨൯. ഭയട്ടിതാ [ഭയദ്ദിതാ (സീ. പീ.)] നാഗവധേന അട്ടാ, യേ തേ നാഗാ അട്ഠ ദിസാ വിധാവും;
അദിസ്വാന [അദിസ്വ (സീ. പീ.)] പോസം ഗജപച്ചമിത്തം, പച്ചാഗമും യേന സോ നാഗരാജാ.
൧൩൦. തേ തത്ഥ കന്ദിത്വാ രോദിത്വാന [രോദിത്വ (സീ. പീ.)] നാഗാ, സീസേ സകേ പംസുകം ഓകിരിത്വാ;
അഗമംസു തേ സബ്ബേ സകം നികേതം, പുരക്ഖത്വാ മഹേസിം സബ്ബഭദ്ദം.
൧൩൧. ആദായ ദന്താനി ഗജുത്തമസ്സ, വഗ്ഗൂ സുഭേ അപ്പടിമേ പഥബ്യാ;
സുവണ്ണരാജീഹി സമന്തമോദരേ, സോ ലുദ്ദകോ കാസിപുരം ഉപാഗമി;
ഉപനേസി സോ രാജകഞ്ഞായ ദന്തേ, നാഗോ ഹതോ ഹന്ദ ഇമസ്സ ദന്താ.
൧൩൨. ദിസ്വാന ദന്താനി ഗജുത്തമസ്സ, ഭത്തുപ്പിയസ്സ പുരിമായ ജാതിയാ;
തത്ഥേവ തസ്സാ ഹദയം അഫാലി, തേനേവ സാ കാലമകാസി ബാലാ.
൧൩൩. സമ്ബോധിപത്തോ സ [ച (സീ. സ്യാ.), വ (പീ.)] മഹാനുഭാവോ, സിതം അകാസി പരിസായ മജ്ഝേ;
പുച്ഛിംസു ഭിക്ഖൂ സുവിമുത്തചിത്താ, നാകാരണേ പാതുകരോന്തി ബുദ്ധാ.
൧൩൪. യമദ്ദസാഥ ദഹരിം കുമാരിം, കാസായവത്ഥം അനഗാരിയം ചരന്തിം;
സാ ഖോ തദാ രാജകഞ്ഞാ അഹോസി, അഹം തദാ നാഗരാജാ അഹോസിം.
൧൩൫. ആദായ ദന്താനി ഗജുത്തമസ്സ, വഗ്ഗൂ സുഭേ അപ്പടിമേ പഥബ്യാ;
യോ ലുദ്ദകോ കാസിപുരം ഉപാഗമി, സോ ഖോ തദാ ദേവദത്തോ അഹോസി.
൧൩൬. അനാവസൂരം ചിരരത്തസംസിതം, ഉച്ചാവചം [ഉചം നീചം (സീ. സ്യാ. പീ.)] ചരിതമിദം പുരാണം;
വീതദ്ദരോ വീതസോകോ വിസല്ലോ, സയം അഭിഞ്ഞായ അഭാസി ബുദ്ധോ.
൧൩൭. അഹം വോ തേന കാലേന, അഹോസിം തത്ഥ ഭിക്ഖവോ;
നാഗരാജാ തദാ ഹോമി [ഹോസിം (സീ. സ്യാ. പീ.)], ഏവം ധാരേഥ ജാതകന്തി.
ഛദ്ദന്തജാതകം ചതുത്ഥം.