൫൦൮. പഞ്ചപണ്ഡിതജാതകം (൧൨)

൩൧൫. പഞ്ച പണ്ഡിതാ സമാഗതാത്ഥ, പഞ്ഹാ മേ പടിഭാതി തം സുണാഥ;

നിന്ദിയമത്ഥം പസംസിയം വാ, കസ്സേവാവികരേയ്യ [കസ്സ വാവീകരേയ്യ (ക.)] ഗുയ്ഹമത്ഥം.

൩൧൬. ത്വം ആവികരോഹി ഭൂമിപാല, ഭത്താ ഭാരസഹോ തുവം വദേ തം;

തവ ഛന്ദരുചീനി [ഛന്ദഞ്ച രുചിഞ്ച (സീ. പീ.)] സമ്മസിത്വാ, അഥ വക്ഖന്തി ജനിന്ദ പഞ്ച ധീരാ.

൩൧൭. യാ സീലവതീ അനഞ്ഞഥേയ്യാ [അനഞ്ഞധേയ്യാ (സീ. പീ.)], ഭത്തുച്ഛന്ദവസാനുഗാ (പിയാ) [( ) നത്ഥി സീ. പീ. പോത്ഥകേസു] മനാപാ;

നിന്ദിയമത്ഥം പസംസിയം വാ, ഭരിയായാവികരേയ്യ [ഭരിയായ വാവീകരേയ്യ (ക.)] ഗുയ്ഹമത്ഥം.

൩൧൮. യോ കിച്ഛഗതസ്സ ആതുരസ്സ, സരണം ഹോതി ഗതീ പരായനഞ്ച;

നിന്ദിയമത്ഥം പസംസിയം വാ, സഖിനോ വാവികരേയ്യ ഗുയ്ഹമത്ഥം.

൩൧൯. ജേട്ഠോ [യോ ജേട്ഠോ (സ്യാ.)] അഥ മജ്ഝിമോ കനിട്ഠോ, യോ [സോ (സീ. സ്യാ. പീ.)] ചേ സീലസമാഹിതോ ഠിതത്തോ;

നിന്ദിയമത്ഥം പസംസിയം വാ, ഭാതു വാവീകരേയ്യ ഗുയ്ഹമത്ഥം.

൩൨൦. യോ വേ പിതുഹദയസ്സ പദ്ധഗൂ [പത്ഥഗൂ (സ്യാ.), പത്തഗൂ (ക.)], അനുജാതോ പിതരം അനോമപഞ്ഞോ;

നിന്ദിയമത്ഥം പസംസിയം വാ, പുത്തസ്സാവികരേയ്യ [പുത്തസ്സ വാവീകരേയ്യ (ക.)] ഗുയ്ഹമത്ഥം.

൩൨൧. മാതാ ദ്വിപദാജനിന്ദസേട്ഠ, യാ നം [യോ തം (സീ. പീ.)] പോസേതി ഛന്ദസാ പിയേന;

നിന്ദിയമത്ഥം പസംസിയം വാ, മാതുയാവീകരേയ്യ [മാതുയാ വാവീകരേയ്യ (ക.)] ഗുയ്ഹമത്ഥം.

൩൨൨. ഗുയ്ഹസ്സ ഹി ഗുയ്ഹമേവ സാധു, ന ഹി ഗുയ്ഹസ്സ പസത്ഥമാവികമ്മം;

അനിപ്ഫന്നതാ [അനിപ്ഫാദായ (സീ. പീ.), അനിപ്ഫന്നതായ (സ്യാ.), ആ നിപ്ഫാദാ (?)] സഹേയ്യ ധീരോ, നിപ്ഫന്നോവ [നിപ്ഫന്നത്ഥോ (സീ. പീ.), നിപ്ഫന്നത്ഥോവ (സ്യാ.)] യഥാസുഖം ഭണേയ്യ.

൩൨൩. കിം ത്വം വിമനോസി രാജസേട്ഠ, ദ്വിപദജനിന്ദ [ദിപദിന്ദ (സീ. സ്യാ. പീ.)] വചനം സുണോമ മേതം [നേതം (സീ. പീ.), തേതം (സ്യാ.)];

കിം ചിന്തയമാനോ ദുമ്മനോസി, നൂന ദേവ അപരാധോ അത്ഥി മയ്ഹം.

൩൨൪. ‘‘പണ്ഹേ [പഞ്ഞോ (സീ. പീ.), പഞ്ഹേ (സ്യാ.), പന്ഹേ (ക.)] വജ്ഝോ മഹോസധോ’’തി, ആണത്തോ മേ വധായ ഭൂരിപഞ്ഞോ;

തം ചിന്തയമാനോ ദുമ്മനോസ്മി, ന ഹി ദേവീ അപരാധോ അത്ഥി തുയ്ഹം.

൩൨൫. അഭിദോസഗതോ ദാനി ഏഹിസി, കിം സുത്വാ കിം സങ്കതേ മനോ തേ;

കോ തേ കിമവോച ഭൂരിപഞ്ഞ, ഇങ്ഘ വചനം സുണോമ ബ്രൂഹി മേതം.

൩൨൬. ‘‘പണ്ഹേ വജ്ഝോ മഹോസധോ’’തി, യദി തേ മന്തയിതം ജനിന്ദ ദോസം;

ഭരിയായ രഹോഗതോ അസംസി, ഗുയ്ഹം പാതുകതം സുതം മമേതം.

൩൨൭. യം സാലവനസ്മിം സേനകോ, പാപകമ്മം അകാസി അസബ്ഭിരൂപം;

സഖിനോവ രഹോഗതോ അസംസി, ഗുയ്ഹം പാതുകതം സുതം മമേതം.

൩൨൮. പുക്കുസ [പക്കുസ (ക.) ജാ. ൧.൭.൪൧ പണ്ണജാതകേ പസ്സിതബ്ബം] പുരിസസ്സ തേ ജനിന്ദ, ഉപ്പന്നോ രോഗോ അരാജയുത്തോ;

ഭാതുഞ്ച [ഭാതുച്ച (സീ. പീ.), ഭാതുവ (സ്യാ.)] രഹോഗതോ അസംസി, ഗുയ്ഹം പാതുകതം സുതം മമേതം.

൩൨൯. ആബാധോയം അസബ്ഭിരൂപോ, കാമിന്ദോ [കാവിന്ദോ (സീ. പീ.)] നരദേവേന ഫുട്ഠോ;

പുത്തസ്സ രഹോഗതോ അസംസി, ഗുയ്ഹം പാതുകതം സുതം മമേതം.

൩൩൦. അട്ഠവങ്കം മണിരതനം ഉളാരം, സക്കോ തേ അദദാ പിതാമഹസ്സ;

ദേവിന്ദസ്സ ഗതം തദജ്ജ ഹത്ഥം [ദേവിന്ദസ്സ തദജ്ജ ഹത്ഥഗതം (ക.)], മാതുഞ്ച രഹോഗതോ അസംസി;

ഗുയ്ഹം പാതുകതം സുതം മമേതം.

൩൩൧. ഗുയ്ഹസ്സ ഹി ഗുയ്ഹമേവ സാധു, ന ഹി ഗുയ്ഹസ്സ പസത്ഥമാവികമ്മം;

അനിപ്ഫന്നതാ സഹേയ്യ ധീരോ, നിപ്ഫന്നോവ യഥാസുഖം ഭണേയ്യ.

൩൩൨. ന ഗുയ്ഹമത്ഥം വിവരേയ്യ, രക്ഖേയ്യ നം യഥാ നിധിം;

ന ഹി പാതുകതോ സാധു, ഗുയ്ഹോ അത്ഥോ പജാനതാ.

൩൩൩. ഥിയാ ഗുയ്ഹം ന സംസേയ്യ, അമിത്തസ്സ ച പണ്ഡിതോ;

യോ ചാമിസേന സംഹീരോ, ഹദയത്ഥേനോ ച യോ നരോ.

൩൩൪. ഗുയ്ഹമത്ഥം അസമ്ബുദ്ധം, സമ്ബോധയതി യോ നരോ;

മന്തഭേദഭയാ തസ്സ, ദാസഭൂതോ തിതിക്ഖതി.

൩൩൫. യാവന്തോ പുരിസസ്സത്ഥം, ഗുയ്ഹം ജാനന്തി മന്തിനം;

താവന്തോ തസ്സ ഉബ്ബേഗാ, തസ്മാ ഗുയ്ഹം ന വിസ്സജേ.

൩൩൬. വിവിച്ച ഭാസേയ്യ ദിവാ രഹസ്സം, രത്തിം ഗിരം നാതിവേലം പമുഞ്ചേ;

ഉപസ്സുതികാ ഹി സുണന്തി മന്തം, തസ്മാ മന്തോ ഖിപ്പമുപേതി ഭേദന്തി.

പഞ്ചപണ്ഡിതജാതകം ദ്വാദസമം.