൫൦൯. ഹത്ഥിപാലജാതകം (൧൩)
൩൩൭. ചിരസ്സം വത പസ്സാമ, ബ്രാഹ്മണം ദേവവണ്ണിനം;
മഹാജടം ഖാരിധരം [ഭാരധരം (പീ.)], പങ്കദന്തം രജസ്സിരം.
൩൩൮. ചിരസ്സം വത പസ്സാമ, ഇസിം ധമ്മഗുണേ രതം;
കാസായവത്ഥവസനം, വാകചീരം പടിച്ഛദം.
൩൩൯. ആസനം ഉദകം പജ്ജം, പടിഗണ്ഹാതു നോ ഭവം;
അഗ്ഘേ ഭവന്തം പുച്ഛാമ, അഗ്ഘം കുരുതു നോ ഭവം.
൩൪൦. അധിച്ച വേദേ പരിയേസ വിത്തം, പുത്തേ ഗഹേ [ഗേഹേ (സീ. സ്യാ. പീ.)] താത പതിട്ഠപേത്വാ;
ഗന്ധേ രസേ പച്ചനുഭുയ്യ [പച്ചനുഭോത്വ (സ്യാ.), പച്ചനുഭുത്വ (പീ.)] സബ്ബം, അരഞ്ഞം സാധു മുനി സോ പസത്ഥോ.
൩൪൧. വേദാ ന സച്ചാ ന ച വിത്തലാഭോ, ന പുത്തലാഭേന ജരം വിഹന്തി;
ഗന്ധേ രസേ മുച്ചന [മുഞ്ചന (സീ. ക.)] മാഹു സന്തോ, സകമ്മുനാ [സകമ്മനാ (സീ. പീ.)] ഹോതി ഫലൂപപത്തി.
൩൪൨. അദ്ധാ ഹി സച്ചം വചനം തവേതം, സകമ്മുനാ ഹോതി ഫലൂപപത്തി;
ജിണ്ണാ ച മാതാപിതരോ തവീമേ [തവേമേ (സീ.), തവ യിമേ (സ്യാ. പീ.)], പസ്സേയ്യും തം വസ്സസതം അരോഗം [അരോഗ്യം (സ്യാ. ക.)].
൩൪൩. യസ്സസ്സ സക്ഖീ മരണേന രാജ, ജരായ മേത്തീ നരവീരസേട്ഠ;
യോ ചാപി ജഞ്ഞാ ന മരിസ്സം കദാചി, പസ്സേയ്യും തം വസ്സസതം അരോഗം.
൩൪൪. യഥാപി നാവം പുരിസോ ദകമ്ഹി, ഏരേതി ചേ നം ഉപനേതി തീരം;
ഏവമ്പി ബ്യാധീ സതതം ജരാ ച, ഉപനേതി മച്ചം [മച്ചു (സ്യാ. പീ.)] വസമന്തകസ്സ.
൩൪൫. പങ്കോ ച കാമാ പലിപോ ച കാമാ, മനോഹരാ ദുത്തരാ മച്ചുധേയ്യാ;
ഏതസ്മിം പങ്കേ പലിപേ ബ്യസന്നാ [വിസന്നാ (സ്യാ. ക.)], ഹീനത്തരൂപാ ന തരന്തി പാരം.
൩൪൬. അയം പുരേ ലുദ്ദമകാസി കമ്മം, സ്വായം ഗഹീതോ ന ഹി മോക്ഖിതോ മേ;
ഓരുന്ധിയാ നം പരിരക്ഖിസ്സാമി, മായം പുന ലുദ്ദമകാസി കമ്മം.
൩൪൭. ഗവംവ [ഗാവംവ (സീ.)] നട്ഠം പുരിസോ യഥാ വനേ, അന്വേസതീ [പരിയേസതീ (സീ. പീ.)] രാജ അപസ്സമാനോ;
ഏവം നട്ഠോ ഏസുകാരീ മമത്ഥോ, സോഹം കഥം ന ഗവേസേയ്യം രാജ.
൩൪൮. ഹിയ്യോതി ഹിയ്യതി [ഹീയോതി ഹീയതി (സീ.)] പോസോ, പരേതി പരിഹായതി;
അനാഗതം നേതമത്ഥീതി ഞത്വാ, ഉപ്പന്നഛന്ദം കോ പനുദേയ്യ ധീരോ.
൩൪൯. പസ്സാമി വോഹം ദഹരം [ദഹരീ (സ്യാ. പീ. ക.)] കുമാരിം, മത്തൂപമം കേതകപുപ്ഫനേത്തം;
അഭുത്തഭോഗേ [അഭുത്വ ഭോഗേ (സ്യാ. ക. അട്ഠ.), അഭുത്വ ഭോഗേ (പീ.), ഭോഗേ അതുത്വാ (ക.)] പഠമേ വയസ്മിം, ആദായ മച്ചു വജതേ കുമാരിം.
൩൫൦. യുവാ സുജാതോ സുമുഖോ സുദസ്സനോ, സാമോ കുസുമ്ഭപരികിണ്ണമസ്സു;
ഹിത്വാന കാമേ പടികച്ച [പടിഗച്ച (സീ.), പടിഗച്ഛ (സ്യാ. പീ.)] ഗേഹം, അനുജാന മം പബ്ബജിസ്സാമി ദേവ.
൩൫൧. സാഖാഹി രുക്ഖോ ലഭതേ സമഞ്ഞം, പഹീനസാഖം പന ഖാണുമാഹു;
പഹീനപുത്തസ്സ മമജ്ജ ഭോതി, വാസേട്ഠി ഭിക്ഖാചരിയായ കാലോ.
൩൫൨. അഘസ്മി കോഞ്ചാവ യഥാ ഹിമച്ചയേ, കതാനി [തന്താനി (സീ. പീ.)] ജാലാനി പദാലിയ [പദാലേയ്യ (സീ.)] ഹംസാ;
ഗച്ഛന്തി പുത്താ ച പതീ ച മയ്ഹം, സാഹം കഥം നാനുവജേ പജാനം.
൩൫൩. ഏതേ ഭുത്വാ വമിത്വാ ച, പക്കമന്തി വിഹങ്ഗമാ;
യേ ച ഭുത്വാന വമിംസു, തേ മേ ഹത്ഥത്ത [ഹത്ഥത്ഥ (സീ. സ്യാ. പീ.)] മാഗതാ.
൩൫൪. അവമീ ബ്രാഹ്മണോ കാമേ, സോ [തേ (സീ. പീ.)] ത്വം പച്ചാവമിസ്സസി;
വന്താദോ പുരിസോ രാജ, ന സോ ഹോതി പസംസിയോ.
൩൫൫. പങ്കേ ച [പങ്കേവ (സീ. പീ.)] പോസം പലിപേ ബ്യസന്നം, ബലീ യഥാ ദുബ്ബലമുദ്ധരേയ്യ;
ഏവമ്പി മം ത്വം ഉദതാരി ഭോതി, പഞ്ചാലി ഗാഥാഹി സുഭാസിതാഹി.
൩൫൬. ഇദം വത്വാ മഹാരാജാ, ഏസുകാരീ ദിസമ്പതി;
രട്ഠം ഹിത്വാന പബ്ബജി, നാഗോ ഛേത്വാവ ബന്ധനം.
൩൫൭. രാജാ ച പബ്ബജ്ജമരോചയിത്ഥ, രട്ഠം പഹായ നരവീരസേട്ഠോ;
തുവമ്പി നോ ഹോതി യഥേവ രാജാ, അമ്ഹേഹി ഗുത്താ അനുസാസ രജ്ജം.
൩൫൮. രാജാ ച പബ്ബജ്ജമരോചയിത്ഥ, രട്ഠം പഹായ നരവീരസേട്ഠോ;
അഹമ്പി ഏകാ [ഏകാവ (സീ.)] ചരിസ്സാമി ലോകേ, ഹിത്വാന കാമാനി മനോരമാനി.
൩൫൯. രാജാ ച പബ്ബജ്ജമരോചയിത്ഥ, രട്ഠം പഹായ നരവീരസേട്ഠോ;
അഹമ്പി ഏകാ ചരിസ്സാമി ലോകേ, ഹിത്വാന കാമാനി യഥോധികാനി.
൩൬൦. അച്ചേന്തി കാലാ തരയന്തി രത്തിയോ, വയോഗുണാ അനുപുബ്ബം ജഹന്തി;
അഹമ്പി ഏകാ ചരിസ്സാമി ലോകേ, ഹിത്വാന കാമാനി മനോരമാനി.
൩൬൧. അച്ചേന്തി കാലാ തരയന്തി രത്തിയോ, വയോഗുണാ അനുപുബ്ബം ജഹന്തി;
അഹമ്പി ഏകാ ചരിസ്സാമി ലോകേ, ഹിത്വാന കാമാനി യഥോധികാനി.
൩൬൨. അച്ചേന്തി കാലാ തരയന്തി രത്തിയോ, വയോഗുണാ അനുപുബ്ബം ജഹന്തി;
അഹമ്പി ഏകാ ചരിസ്സാമി ലോകേ, സീതിഭൂതാ [സീതീഭൂതാ (സീ.)] സബ്ബമതിച്ച സങ്ഗന്തി.
ഹത്ഥിപാലജാതകം തേരസമം.