൫൦൭. മഹാപലോഭനജാതകം (൧൧)
൨൮൪. ബ്രഹ്മലോകാ ചവിത്വാന, ദേവപുത്തോ മഹിദ്ധികോ;
രഞ്ഞോ പുത്തോ ഉദപാദി, സബ്ബകാമസമിദ്ധിസു.
൨൮൫. കാമാ വാ കാമസഞ്ഞാ വാ, ബ്രഹ്മലോകേ ന വിജ്ജതി;
സ്വാസ്സു [യ്വാസ്സ (സീ.)] തായേവ സഞ്ഞായ, കാമേഹി വിജിഗുച്ഛഥ.
൨൮൬. തസ്സ ചന്തേപുരേ ആസി, ഝാനാഗാരം സുമാപിതം;
സോ തത്ഥ പടിസല്ലീനോ [പടിസല്ലാനോ (ക.)], ഏകോ രഹസി ഝായഥ.
൨൮൭. സ രാജാ പരിദേവേസി, പുത്തസോകേന അട്ടിതോ;
ഏകപുത്തോ ചയം മയ്ഹം, ന ച കാമാനി ഭുഞ്ജതി.
൨൮൮. കോ നു ഖ്വേത്ഥ [ഖേത്ഥ (സീ. പീ.)] ഉപായോ സോ, കോ വാ ജാനാതി കിഞ്ചനം;
യോ [കോ (സീ. പീ.)] മേ പുത്തം പലോഭേയ്യ, യഥാ കാമാനി പത്ഥയേ.
൨൮൯. അഹു കുമാരീ തത്ഥേവ, വണ്ണരൂപസമാഹിതാ;
കുസലാ നച്ചഗീതസ്സ, വാദിതേ ച പദക്ഖിണാ.
൨൯൦. സാ തത്ഥ ഉപസങ്കമ്മ, രാജാനം ഏതദബ്രവി;
അഹം ഖോ നം പലോഭേയ്യം, സചേ ഭത്താ ഭവിസ്സതി.
൨൯൧. തം തഥാവാദിനിം രാജാ, കുമാരിം ഏതദബ്രവി;
ത്വഞ്ഞേവ നം പലോഭേഹി, തവ ഭത്താ ഭവിസ്സതി.
൨൯൨. സാ ച അന്തേപുരം ഗന്ത്വാ, ബഹും കാമുപസംഹിതം;
ഹദയങ്ഗമാ പേമനീയാ, ചിത്രാ ഗാഥാ അഭാസഥ.
൨൯൩. തസ്സാ ച ഗായമാനായ, സദ്ദം സുത്വാന നാരിയാ;
കാമച്ഛന്ദസ്സ ഉപ്പജ്ജി, ജനം സോ പരിപുച്ഛഥ.
൨൯൪. കസ്സേസോ സദ്ദോ കോ വാ സോ, ഭണതി ഉച്ചാവചം ബഹും;
ഹദയങ്ഗമം പേമനീയം, അഹോ [അഥോ (സീ. പീ.)] കണ്ണസുഖം മമ.
൨൯൫. ഏസാ ഖോ പമദാ ദേവ, ഖിഡ്ഡാ ഏസാ അനപ്പികാ [അനപ്പകാ (ക.)];
സചേ ത്വം കാമേ ഭുഞ്ജേയ്യ, ഭിയ്യോ ഭിയ്യോ ഛാദേയ്യു തം.
൨൯൬. ഇങ്ഘ ആഗച്ഛതോരേന [ആഗച്ഛതോരേനം (ക.) ആഗച്ഛതു + ഓരേന], അവിദൂരമ്ഹി ഗായതു;
അസ്സമസ്സ സമീപമ്ഹി, സന്തികേ മയ്ഹം ഗായതു.
൨൯൭. തിരോകുട്ടമ്ഹി ഗായിത്വാ, ഝാനാഗാരമ്ഹി പാവിസി;
ബന്ധി നം [ഭന്ധിതും (സ്യാ. ക.)] അനുപുബ്ബേന, ആരഞ്ഞമിവ കുഞ്ജരം.
൨൯൮. തസ്സ [തസ്സാ (സ്യാ.)] കാമരസം ഞത്വാ, ഇസ്സാധമ്മോ അജായഥ;
‘‘അഹമേവ കാമേ ഭുഞ്ജേയ്യം, മാ അഞ്ഞോ പുരിസോ അഹു’’.
൨൯൯. തതോ അസിം ഗഹേത്വാന, പുരിസേ ഹന്തും ഉപക്കമി;
അഹമേവേകോ ഭുഞ്ജിസ്സം, മാ അഞ്ഞോ പുരിസോ സിയാ.
൩൦൦. തതോ ജാനപദാ സബ്ബേ, വിക്കന്ദിംസു സമാഗതാ;
പുത്തോ ത്യായം മഹാരാജ, ജനം ഹേഠേത്യദൂസകം.
൩൦൧. തഞ്ച രാജാ വിവാഹേസി [നിവാഹേസി (സ്യാ.), വിഹാഹേസി (പീ.)], സമ്ഹാ രട്ഠാ ച [രട്ഠാതോ (സീ. പീ.), രട്ഠതോ (ക.)] ഖത്തിയോ;
യാവതാ വിജിതം മയ്ഹം, ന തേ വത്ഥബ്ബ [വത്തബ്ബ (സീ. പീ.)] താവദേ.
൩൦൨. തതോ സോ ഭരിയമാദായ, സമുദ്ദം ഉപസങ്കമി;
പണ്ണസാലം കരിത്വാന, വനമുഞ്ഛായ പാവിസി.
൩൦൩. അഥേത്ഥ ഇസി മാഗച്ഛി, സമുദ്ദം ഉപരൂപരി;
സോ തസ്സ ഗേഹം പാവേക്ഖി, ഭത്തകാലേ ഉപട്ഠിതേ.
൩൦൪. തഞ്ച ഭരിയാ പലോഭേസി, പസ്സ യാവ സുദാരുണം;
ചുതോ സോ ബ്രഹ്മചരിയമ്ഹാ, ഇദ്ധിയാ പരിഹായഥ.
൩൦൫. രാജപുത്തോ ച ഉഞ്ഛാതോ, വനമൂലഫലം ബഹും;
സായം കാജേന [കാചേന (പീ.)] ആദായ, അസ്സമം ഉപസങ്കമി.
൩൦൬. ഇസീ ച ഖത്തിയം ദിസ്വാ, സമുദ്ദം ഉപസങ്കമി;
‘‘വേഹായസം ഗമിസ്സ’’ന്തി, സീദതേ സോ മഹണ്ണവേ.
൩൦൭. ഖത്തിയോ ച ഇസിം ദിസ്വാ, സീദമാനം മഹണ്ണവേ;
തസ്സേവ അനുകമ്പായ, ഇമാ ഗാഥാ അഭാസഥ.
൩൦൮. അഭിജ്ജമാനേ വാരിസ്മിം, സയം ആഗമ്മ ഇദ്ധിയാ;
മിസ്സീഭാവിത്ഥിയാ ഗന്ത്വാ, സംസീദസി മഹണ്ണവേ.
൩൦൯. ആവട്ടനീ മഹാമായാ, ബ്രഹ്മചരിയവികോപനാ;
സീദന്തി നം വിദിത്വാന, ആരകാ പരിവജ്ജയേ.
൩൧൦. അനലാ മുദുസമ്ഭാസാ, ദുപ്പൂരാ താ നദീസമാ;
സീദന്തി നം വിദിത്വാന, ആരകാ പരിവജ്ജയേ.
൩൧൧. യം ഏതാ ഉപസേവന്തി, ഛന്ദസാ വാ ധനേന വാ;
ജാതവേദോവ സം ഠാനം, ഖിപ്പം അനുദഹന്തി നം.
൩൧൨. ഖത്തിയസ്സ വചോ സുത്വാ, ഇസിസ്സ നിബ്ബിദാ അഹു;
ലദ്ധാ പോരാണകം മഗ്ഗം, ഗച്ഛതേ സോ വിഹായസം.
൩൧൩. ഖത്തിയോ ച ഇസിം ദിസ്വാ, ഗച്ഛമാനം വിഹായസം;
സംവേഗം അലഭീ ധീരോ, പബ്ബജ്ജം സമരോചയി.
൩൧൪. തതോ സോ പബ്ബജിത്വാന, കാമരാഗം വിരാജയി;
കാമരാഗം വിരാജേത്വാ, ബ്രഹ്മലോകൂപഗോ അഹൂതി.
മഹാപലോഭനജാതകം ഏകാദസമം.