൫൦൩. സത്തിഗുമ്ബജാതകം (൭)

൧൫൯. മിഗലുദ്ദോ മഹാരാജാ, പഞ്ചാലാനം രഥേസഭോ;

നിക്ഖന്തോ സഹ സേനായ, ഓഗണോ വനമാഗമാ.

൧൬൦. തത്ഥദ്ദസാ അരഞ്ഞസ്മിം, തക്കരാനം കുടിം കതം;

തസ്സാ [തസ്മാ (സ്യാ. പീ. ക.)] കുടിയാ നിക്ഖമ്മ, സുവോ ലുദ്ദാനി ഭാസതി.

൧൬൧. സമ്പന്നവാഹനോ പോസോ, യുവാ സമ്മട്ഠകുണ്ഡലോ [കുണ്ഡലീ (സ്യാ. ക.)];

സോഭതി ലോഹിതുണ്ഹീസോ, ദിവാ സൂരിയോവ ഭാസതി.

൧൬൨. മജ്ഝന്ഹികേ [മജ്ഝന്തികേ (സബ്ബത്ഥ)] സമ്പതികേ, സുത്തോ രാജാ സസാരഥി;

ഹന്ദസ്സാഭരണം സബ്ബം, ഗണ്ഹാമ സാഹസാ [സഹസാ (സീ. സ്യാ. പീ.)] മയം.

൧൬൩. നിസീഥേപി രഹോ ദാനി, സുത്തോ രാജാ സസാരഥി;

ആദായ വത്ഥം മണികുണ്ഡലഞ്ച, ഹന്ത്വാന സാഖാഹി അവത്ഥരാമ.

൧൬൪. കിന്നു ഉമ്മത്തരൂപോവ, സത്തിഗുമ്ബ പഭാസസി;

ദുരാസദാ ഹി രാജാനോ, അഗ്ഗി പജ്ജലിതോ യഥാ.

൧൬൫. അഥ ത്വം പതികോലമ്ബ, മത്തോ ഥുല്ലാനി ഗജ്ജസി;

മാതരി മയ്ഹം നഗ്ഗായ, കിന്നു ത്വം വിജിഗുച്ഛസേ.

൧൬൬. ഉട്ഠേഹി സമ്മ തരമാനോ, രഥം യോജേഹി സാരഥി;

സകുണോ മേ ന രുച്ചതി, അഞ്ഞം ഗച്ഛാമ അസ്സമം.

൧൬൭. യുത്തോ രഥോ മഹാരാജ, യുത്തോ ച ബലവാഹനോ;

അധിതിട്ഠ മഹാരാജ, അഞ്ഞം ഗച്ഛാമ അസ്സമം.

൧൬൮. കോ നുമേവ ഗതാ [ക്വ നു’മേ’പഗതാ (?)] സബ്ബേ, യേ അസ്മിം പരിചാരകാ;

ഏസ ഗച്ഛതി പഞ്ചാലോ, മുത്തോ തേസം അദസ്സനാ.

൧൬൯. കോദണ്ഡകാനി ഗണ്ഹഥ, സത്തിയോ തോമരാനി ച;

ഏസ ഗച്ഛതി പഞ്ചാലോ, മാ വോ മുഞ്ചിത്ഥ ജീവതം [ജീവിതം (ബഹൂസു)].

൧൭൦. അഥാപരോ പടിനന്ദിത്ഥ, സുവോ ലോഹിതതുണ്ഡകോ;

സ്വാഗതം തേ മഹാരാജ, അഥോ തേ അദുരാഗതം;

ഇസ്സരോസി അനുപ്പത്തോ, യം ഇധത്ഥി പവേദയ.

൧൭൧. തിന്ദുകാനി പിയാലാനി, മധുകേ കാസുമാരിയോ;

ഫലാനി ഖുദ്ദകപ്പാനി, ഭുഞ്ജ രാജ വരം വരം.

൧൭൨. ഇദമ്പി പാനീയം സീതം, ആഭതം ഗിരിഗബ്ഭരാ;

തതോ പിവ മഹാരാജ, സചേ ത്വം അഭികങ്ഖസി.

൧൭൩. അരഞ്ഞം ഉഞ്ഛായ ഗതാ, യേ അസ്മിം പരിചാരകാ;

സയം ഉട്ഠായ ഗണ്ഹവ്ഹോ, ഹത്ഥാ മേ നത്ഥി ദാതവേ.

൧൭൪. ഭദ്ദകോ വതയം പക്ഖീ, ദിജോ പരമധമ്മികോ;

അഥേസോ ഇതരോ പക്ഖീ, സുവോ ലുദ്ദാനി ഭാസതി.

൧൭൫. ‘‘ഏതം ഹനഥ ബന്ധഥ, മാ വോ മുഞ്ചിത്ഥ ജീവതം’’;

ഇച്ചേവം വിലപന്തസ്സ, സോത്ഥിം [സോത്ഥീ (സ്യാ.)] പത്തോസ്മി അസ്സമം.

൧൭൬. ഭാതരോസ്മ മഹാരാജ, സോദരിയാ ഏകമാതുകാ;

ഏകരുക്ഖസ്മിം സംവഡ്ഢാ, നാനാഖേത്തഗതാ ഉഭോ.

൧൭൭. സത്തിഗുമ്ബോ ച ചോരാനം, അഹഞ്ച ഇസീനം ഇധ;

അസതം സോ, സതം അഹം, തേന ധമ്മേന നോ വിനാ.

൧൭൮. തത്ഥ വധോ ച ബന്ധോ ച, നികതീ വഞ്ചനാനി ച;

ആലോപാ സാഹസാകാരാ, താനി സോ തത്ഥ സിക്ഖതി.

൧൭൯. ഇധ സച്ചഞ്ച ധമ്മോ ച, അഹിംസാ സംയമോ ദമോ;

ആസനൂദകദായീനം, അങ്കേ വദ്ധോസ്മി ഭാരധ [ഭാരത (സീ. സ്യാ. പീ.)].

൧൮൦. യം യഞ്ഹി രാജ ഭജതി, സന്തം വാ യദി വാ അസം;

സീലവന്തം വിസീലം വാ, വസം തസ്സേവ ഗച്ഛതി.

൧൮൧. യാദിസം കുരുതേ മിത്തം, യാദിസം ചൂപസേവതി;

സോപി താദിസകോ ഹോതി, സഹവാസോ ഹി [സഹവാസോപി (സ്യാ. ക.)] താദിസോ.

൧൮൨. സേവമാനോ സേവമാനം, സമ്ഫുട്ഠോ സമ്ഫുസം പരം;

സരോ ദിദ്ധോ കലാപംവ, അലിത്തമുപലിമ്പതി;

ഉപലേപഭയാ [ഉപലിമ്പഭയാ (സ്യാ. ക.)] ധീരോ, നേവ പാപസഖാ സിയാ.

൧൮൩. പൂതിമച്ഛം കുസഗ്ഗേന, യോ നരോ ഉപനയ്ഹതി;

കുസാപി പൂതി [പൂതീ (സീ. പീ.)] വായന്തി, ഏവം ബാലൂപസേവനാ.

൧൮൪. തഗരഞ്ച പലാസേന, യോ നരോ ഉപനയ്ഹതി;

പത്താപി സുരഭി [സുരഭീ (സീ. സ്യാ. പീ.)] വായന്തി, ഏവം ധീരൂപസേവനാ.

൧൮൫. തസ്മാ പത്തപുടസ്സേവ [ഫലപുടസ്സേവ (സീ. പീ.), പലപുടസ്സേവ (ക. അട്ഠ.), പലാസപുടസ്സേവ (സ്യാ. ക.)], ഞത്വാ സമ്പാകമത്തനോ;

അസന്തേ നോപസേവേയ്യ, സന്തേ സേവേയ്യ പണ്ഡിതോ;

അസന്തോ നിരയം നേന്തി, സന്തോ പാപേന്തി സുഗ്ഗതിന്തി.

സത്തിഗുമ്ബജാതകം സത്തമം.