൫൦൪. ഭല്ലാതിയജാതകം (൮)
൧൮൬. ഭല്ലാതിയോ [ഭല്ലാടിയോ (സീ. പീ.)] നാമ അഹോസി രാജാ, രട്ഠം പഹായ മിഗവം അചാരി സോ;
അഗമാ ഗിരിവരം ഗന്ധമാദനം, സുപുപ്ഫിതം [സമ്പുപ്ഫിതം (സീ. പീ.)] കിമ്പുരിസാനുചിണ്ണം.
൧൮൭. സാളൂരസങ്ഘഞ്ച നിസേധയിത്വാ, ധനും [ധനു (സീ. സ്യാ. പീ.)] കലാപഞ്ച സോ നിക്ഖിപിത്വാ;
ഉപാഗമി വചനം വത്തുകാമോ, യത്ഥട്ഠിതാ കിമ്പുരിസാ അഹേസും.
൧൮൮. ഹിമച്ചയേ ഹേമവതായ തീരേ, കിമിധട്ഠിതാ മന്തയവ്ഹോ അഭിണ്ഹം;
പുച്ഛാമി വോ മാനുസദേഹവണ്ണേ, കഥം നു [കഥം വോ (സീ. സ്യാ. പീ.)] ജാനന്തി മനുസ്സലോകേ.
൧൮൯. മല്ലം ഗിരിം പണ്ഡരകം തികൂടം, സീതോദകാ [സീതോദിയാ (സീ. പീ.), സീതോദികാ (?)] അനുവിചരാമ നജ്ജോ;
മിഗാ മനുസ്സാവ നിഭാസവണ്ണാ, ജാനന്തി നോ കിമ്പുരിസാതി ലുദ്ദ.
൧൯൦. സുകിച്ഛരൂപം പരിദേവയവ്ഹോ [പരിദേവഥവ്ഹോ (?) മോഗ്ഗല്ലാനബ്യാകരണേ ൬.൩൮ സുത്തം], ആലിങ്ഗിതോ ചാസി പിയോ പിയായ;
പുച്ഛാമി വോ മാനുസദേഹവണ്ണേ, കിമിധ വനേ രോദഥ അപ്പതീതാ.
൧൯൧. സുകിച്ഛരൂപം പരിദേവയവ്ഹോ, ആലിങ്ഗിതോ ചാസി പിയോ പിയായ;
പുച്ഛാമി വോ മാനുസദേഹവണ്ണേ, കിമിധ വനേ വിലപഥ അപ്പതീതാ.
൧൯൨. സുകിച്ഛരൂപം പരിദേവയവ്ഹോ, ആലിങ്ഗിതോ ചാസി പിയോ പിയായ;
പുച്ഛാമി വോ മാനുസദേഹവണ്ണേ, കിമിധ വനേ സോചഥ അപ്പതീതാ.
൧൯൩. മയേകരത്തം [രത്തിം (പീ.)] വിപ്പവസിമ്ഹ ലുദ്ദ, അകാമകാ അഞ്ഞമഞ്ഞം സരന്താ;
തമേകരത്തം അനുതപ്പമാനാ, സോചാമ ‘‘സാ രത്തി പുനം ന ഹേസ്സതി’’.
൧൯൪. യമേകരത്തം അനുതപ്പഥേതം, ധനം വ നട്ഠം പിതരം വ പേതം;
പുച്ഛാമി വോ മാനുസദേഹവണ്ണേ, കഥം വിനാ വാസമകപ്പയിത്ഥ.
൧൯൫. യമിമം [യയിമം (ക. സീ.)] നദിം പസ്സസി സീഘസോതം, നാനാദുമച്ഛാദനം സേലകൂലം [ദുമച്ഛദനം സേലകൂടം (സീ. പീ.), ദുമസഞ്ഛന്നം സേലകൂലം (ക.)];
തം മേ പിയോ ഉത്തരി വസ്സകാലേ, മമഞ്ച മഞ്ഞം അനുബന്ധതീതി.
൧൯൬. അഹഞ്ച അങ്കോലകമോചിനാമി, അതിമുത്തകം സത്തലിയോഥികഞ്ച;
‘‘പിയോ ച മേ ഹേഹിതി മാലഭാരീ, അഹഞ്ച നം മാലിനീ അജ്ഝുപേസ്സം’’.
൧൯൭. അഹഞ്ചിദം കുരവകമോചിനാമി, ഉദ്ദാലകാ പാടലിസിന്ധുവാരകാ [സിന്ധുവാരിതാ (സ്യാ. പീ. ക.)];
‘‘പിയോ ച മേ ഹേഹിതി മാലഭാരീ, അഹഞ്ച നം മാലിനീ അജ്ഝുപേസ്സം’’.
൧൯൮. അഹഞ്ച സാലസ്സ സുപുപ്ഫിതസ്സ, ഓചേയ്യ പുപ്ഫാനി കരോമി മാലം;
‘‘പിയോ ച മേ ഹേഹിതി മാലഭാരീ, അഹഞ്ച നം മാലിനീ അജ്ഝുപേസ്സം’’.
൧൯൯. അഹഞ്ച സാലസ്സ സുപുപ്ഫിതസ്സ, ഓചേയ്യ പുപ്ഫാനി കരോമി ഭാരം;
ഇദഞ്ച നോ ഹേഹിതി സന്ഥരത്ഥം, യത്ഥജ്ജിമം [യത്ഥജ്ജമം (സീ. പീ.)] വിഹരിസ്സാമ [വിഹരിസ്സാമു (പീ.)] രത്തിം.
൨൦൦. അഹഞ്ച ഖോ അഗളും [അഗ്ഗലു (സ്യാ. ക.), അകലും (പീ.)] ചന്ദനഞ്ച, സിലായ പിംസാമി പമത്തരൂപാ;
‘‘പിയോ ച മേ ഹേഹിതി രോസിതങ്ഗോ, അഹഞ്ച നം രോസിതാ അജ്ഝുപേസ്സം’’.
൨൦൧. അഥാഗമാ സലിലം സീഘസോതം, നുദം സാലേ സലളേ കണ്ണികാരേ;
ആപൂരഥ [അപൂരഥ (സീ. പീ.), ആപൂരഥേ (സ്യാ.)] തേന മുഹുത്തകേന, സായം നദീ ആസി മയാ സുദുത്തരാ.
൨൦൨. ഉഭോസു തീരേസു മയം തദാ ഠിതാ, സമ്പസ്സന്താ ഉഭയോ അഞ്ഞമഞ്ഞം;
സകിമ്പി രോദാമ സകിം ഹസാമ, കിച്ഛേന നോ ആഗമാ [അഗമാ (സീ. സ്യാ. പീ.)] സംവരീ സാ.
൨൦൩. പാതോവ [പാതോ ച (സീ. സ്യാ. പീ.)] ഖോ ഉഗ്ഗതേ സൂരിയമ്ഹി, ചതുക്കം നദിം ഉത്തരിയാന ലുദ്ദ;
ആലിങ്ഗിയാ അഞ്ഞമഞ്ഞം മയം ഉഭോ, സകിമ്പി രോദാമ സകിം ഹസാമ.
൨൦൪. തീഹൂനകം സത്തസതാനി ലുദ്ദ, യമിധ മയം വിപ്പവസിമ്ഹ പുബ്ബേ;
വസ്സേകിമം [വാസേകിമം (സീ. പീ.)] ജീവിതം ഭൂമിപാല, കോ നീധ കന്തായ വിനാ വസേയ്യ.
൨൦൫. ആയുഞ്ച വോ കീവതകോ നു സമ്മ, സചേപി ജാനാഥ വദേഥ ആയും;
അനുസ്സവാ വുഡ്ഢതോ ആഗമാ വാ, അക്ഖാഥ മേ തം അവികമ്പമാനാ.
൨൦൬. ആയുഞ്ച നോ വസ്സസഹസ്സം ലുദ്ദ, ന ചന്തരാ പാപകോ അത്ഥി രോഗോ;
അപ്പഞ്ച [അപ്പംവ (സ്യാ. ക.)] ദുക്ഖം സുഖമേവ ഭിയ്യോ, അവീതരാഗാ വിജഹാമ ജീവിതം.
൨൦൭. ഇദഞ്ച സുത്വാന അമാനുസാനം, ഭല്ലാതിയോ ഇത്തര ജീവിതന്തി;
നിവത്തഥ ന മിഗവം അചരി, അദാസി ദാനാനി അഭുഞ്ജി ഭോഗേ.
൨൦൮. ഇദഞ്ച സുത്വാന അമാനുസാനം, സമ്മോദഥ മാ കലഹം അകത്ഥ;
മാ വോ തപീ അത്തകമ്മാപരാധോ, യഥാപി തേ കിമ്പുരിസേകരത്തം.
൨൦൯. ഇദഞ്ച സുത്വാന അമാനുസാനം, സമ്മോദഥ മാ വിവാദം അകത്ഥ;
മാ വോ തപീ അത്തകമ്മാപരാധോ, യഥാപി തേ കിമ്പുരിസേകരത്തം.
൨൧൦. വിവിധം [വിവിധ (സീ. സ്യാ.)] അധിമനാ സുണോമഹം, വചനപഥം തവ അത്ഥസംഹിതം;
മുഞ്ചം [മുഞ്ച (സീ. പീ.)] ഗിരം നുദസേവ മേ ദരം, സമണ സുഖാവഹ ജീവ മേ ചിരന്തി.
ഭല്ലാതിയജാതകം അട്ഠമം.