൫൦൨. ചൂളഹംസജാതകം (൬)

൧൩൩. ഏതേ ഹംസാ പക്കമന്തി, വക്കങ്ഗാ ഭയമേരിതാ;

ഹരിത്തച ഹേമവണ്ണ, കാമം സുമുഖ പക്കമ.

൧൩൪. ഓഹായ മം ഞാതിഗണാ, ഏകം പാസവസം ഗതം;

അനപേക്ഖമാനാ [നാപേക്ഖമാനാ (ക.)] ഗച്ഛന്തി, കിം ഏസോ അവഹിയ്യസി.

൧൩൫. പതേവ പതതം സേട്ഠ, നത്ഥി ബദ്ധേ സഹായതാ [സഹായകാ (സ്യാ.)];

മാ അനീഘായ ഹാപേസി, കാമം സുമുഖ പക്കമ.

൧൩൬. നാഹം ‘‘ദുക്ഖപരേതോ’’തി [ദുക്ഖപരേതോപി (ക.)], ധതരട്ഠ തുവം [തവം (സീ. പീ.)] ജഹേ;

ജീവിതം മരണം വാ മേ, തയാ സദ്ധിം ഭവിസ്സതി.

൧൩൭. ഏതദരിയസ്സ കല്യാണം, യം ത്വം സുമുഖ ഭാസസി;

തഞ്ച വീമംസമാനോഹം, ‘‘പതതേതം’’ അവസ്സജിം.

൧൩൮. അപദേന പദം യാതി, അന്തലിക്ഖചരോ [അന്തലിക്ഖേ ചരോ (സീ. പീ.)] ദിജോ;

ആരാ പാസം ന ബുജ്ഝി ത്വം, ഹംസാനം പവരുത്തമ [പവരുത്തമോ (ക. സീ. പീ.)].

൧൩൯. യദാ പരാഭവോ ഹോതി, പോസോ ജീവിതസങ്ഖയേ;

അഥ ജാലഞ്ച പാസഞ്ച, ആസജ്ജാപി ന ബുജ്ഝതി.

൧൪൦. ഏതേ ഹംസാ പക്കമന്തി, വക്കങ്ഗാ ഭയമേരിതാ;

ഹരിത്തച ഹേമവണ്ണ, ത്വഞ്ഞേവ [ത്വഞ്ച തം (സീ.), ത്വഞ്ച (പീ.)] അവഹിയ്യസി.

൧൪൧. ഏതേ ഭുത്വാ ച പിത്വാ ച, പക്കമന്തി വിഹങ്ഗമാ;

അനപേക്ഖമാനാ വക്കങ്ഗാ, ത്വഞ്ഞേവേകോ ഉപാസസി.

൧൪൨. കിന്നു ത്യായം [തായം (സീ. സ്യാ. പീ.)] ദിജോ ഹോതി, മുത്തോ ബദ്ധം ഉപാസസി;

ഓഹായ സകുണാ യന്തി, കിം ഏകോ അവഹിയ്യസി.

൧൪൩. രാജാ മേ സോ ദിജോ മിത്തോ, സഖാ പാണസമോ ച മേ;

നേവ നം വിജഹിസ്സാമി, യാവ കാലസ്സ പരിയായം.

൧൪൪. യോ ച ത്വം സഖിനോ ഹേതു, പാണം ചജിതുമിച്ഛസി;

സോ തേ സഹായം മുഞ്ചാമി, ഹോതു രാജാ തവാനുഗോ.

൧൪൫. ഏവം ലുദ്ദക നന്ദസ്സു, സഹ സബ്ബേഹി ഞാതിഭി;

യഥാഹമജ്ജ നന്ദാമി, ദിസ്വാ മുത്തം ദിജാധിപം.

൧൪൬. കച്ചിന്നു ഭോതോ കുസലം, കച്ചി ഭോതോ അനാമയം;

കച്ചി രട്ഠമിദം ഫീതം, ധമ്മേന മനുസാസസി.

൧൪൭. കുസലഞ്ചേവ മേ ഹംസ, അഥോ ഹംസ അനാമയം;

അഥോ രട്ഠമിദം ഫീതം, ധമ്മേന മനുസാസഹം.

൧൪൮. കച്ചി ഭോതോ അമച്ചേസു, ദോസോ കോചി ന വിജ്ജതി;

കച്ചി ആരാ അമിത്താ തേ, ഛായാ ദക്ഖിണതോരിവ.

൧൪൯. അഥോപി മേ അമച്ചേസു, ദോസോ കോചി ന വിജ്ജതി;

അഥോ ആരാ അമിത്താ മേ, ഛായാ ദക്ഖിണതോരിവ.

൧൫൦. കച്ചി തേ സാദിസീ ഭരിയാ, അസ്സവാ പിയഭാണിനീ;

പുത്തരൂപയസൂപേതാ, തവ ഛന്ദവസാനുഗാ.

൧൫൧. അഥോ മേ സാദിസീ ഭരിയാ, അസ്സവാ പിയഭാണിനീ;

പുത്തരൂപയസൂപേതാ, മമ ഛന്ദവസാനുഗാ.

൧൫൨. കച്ചി തേ ബഹവോ പുത്താ, സുജാതാ രട്ഠവഡ്ഢന;

പഞ്ഞാജവേന സമ്പന്നാ, സമ്മോദന്തി തതോ തതോ.

൧൫൩. സതമേകോ ച മേ പുത്താ, ധതരട്ഠ മയാ സുതാ;

തേസം ത്വം കിച്ചമക്ഖാഹി, നാവരുജ്ഝന്തി [നാവരജ്ഝന്തി (ക. സീ. പീ.)] തേ വചോ.

൧൫൪. ഉപപന്നോപി ചേ ഹോതി, ജാതിയാ വിനയേന വാ;

അഥ പച്ഛാ കുരുതേ യോഗം, കിച്ഛേ [കിച്ചേ (സീ. സ്യാ. പീ.)] ആപാസു [ആവാസു (സ്യാ.), ആപദാസു (ക.)] സീദതി.

൧൫൫. തസ്സ സംഹീരപഞ്ഞസ്സ, വിവരോ ജായതേ മഹാ;

രത്തിമന്ധോവ [നത്തമന്ധോവ (സീ. പീ.)] രൂപാനി, ഥൂലാനി മനുപസ്സതി.

൧൫൬. അസാരേ സാരയോഗഞ്ഞൂ, മതിം ന ത്വേവ വിന്ദതി;

സരഭോവ ഗിരിദുഗ്ഗസ്മിം, അന്തരായേവ സീദതി.

൧൫൭. ഹീനജച്ചോപി ചേ ഹോതി, ഉട്ഠാതാ ധിതിമാ നരോ;

ആചാരസീലസമ്പന്നോ, നിസേ അഗ്ഗീവ ഭാസതി.

൧൫൮. ഏതം മേ ഉപമം കത്വാ, പുത്തേ വിജ്ജാസു വാചയ [ഠാപസ (സ്യാ. ക.)];

സംവിരൂള്ഹേഥ മേധാവീ, ഖേത്തേ ബീജംവ [ഖേത്തബീജംവ (സീ. പീ.)] വുട്ഠിയാതി.

ചൂളഹംസജാതകം ഛട്ഠം.