൫൦൧. രോഹണമിഗജാതകം (൫)
൧൦൪. ഏതേ യൂഥാ പതിയന്തി, ഭീതാ മരണസ്സ [മരണാ (സ്യാ. പീ.), മരണ (ക.)] ചിത്തക;
ഗച്ഛ തുവമ്പി മാകങ്ഖി, ജീവിസ്സന്തി തയാ സഹ.
൧൦൫. നാഹം രോഹണ [രോഹന്ത (സീ. പീ.), രോഹന (സ്യാ.)] ഗച്ഛാമി, ഹദയം മേ അവകസ്സതി;
ന തം അഹം ജഹിസ്സാമി, ഇധ ഹിസ്സാമി ജീവിതം.
൧൦൬. തേ ഹി നൂന മരിസ്സന്തി, അന്ധാ അപരിണായകാ;
ഗച്ഛ തുവമ്പി മാകങ്ഖി, ജീവിസ്സന്തി തയാ സഹ.
൧൦൭. നാഹം രോഹണ ഗച്ഛാമി, ഹദയം മേ അവകസ്സതി;
ന തം ബദ്ധം [ബന്ധം (ക.)] ജഹിസ്സാമി, ഇധ ഹിസ്സാമി ജീവിതം.
൧൦൮. ഗച്ഛ ഭീരു പലായസ്സു, കൂടേ ബദ്ധോസ്മി ആയസേ;
ഗച്ഛ തുവമ്പി മാകങ്ഖി, ജീവിസ്സന്തി തയാ സഹ.
൧൦൯. നാഹം രോഹണ ഗച്ഛാമി, ഹദയം മേ അവകസ്സതി;
ന തം അഹം ജഹിസ്സാമി, ഇധ ഹിസ്സാമി ജീവിതം.
൧൧൦. തേ ഹി നൂന മരിസ്സന്തി, അന്ധാ അപരിണായകാ;
ഗച്ഛ തുവമ്പി മാകങ്ഖി, ജീവിസ്സന്തി തയാ സഹ.
൧൧൧. നാഹം രോഹണ ഗച്ഛാമി, ഹദയം മേ അവകസ്സതി;
ന തം ബദ്ധം ജഹിസ്സാമി, ഇധ ഹിസ്സാമി ജീവിതം.
൧൧൨. അയം സോ ലുദ്ദകോ ഏതി, ലുദ്ദരൂപോ [രുദ്ദരൂപോ (സീ. പീ.)] സഹാവുധോ;
യോ നോ വധിസ്സതി അജ്ജ, ഉസുനാ സത്തിയാ അപി [മപി (സീ. സ്യാ. പീ.)].
൧൧൩. സാ മുഹുത്തം പലായിത്വാ, ഭയട്ടാ [ഭയട്ഠാ (പീ.)] ഭയതജ്ജിതാ;
സുദുക്കരം അകരാ ഭീരു, മരണായൂപനിവത്തഥ.
൧൧൪. കിന്നു തേമേ മിഗാ ഹോന്തി, മുത്താ ബദ്ധം ഉപാസരേ;
ന തം ചജിതുമിച്ഛന്തി, ജീവിതസ്സപി കാരണാ.
൧൧൫. ഭാതരോ ഹോന്തി മേ ലുദ്ദ, സോദരിയാ ഏകമാതുകാ;
ന മം ചജിതുമിച്ഛന്തി, ജീവിതസ്സപി കാരണാ.
൧൧൬. തേ ഹി നൂന മരിസ്സന്തി, അന്ധാ അപരിണായകാ;
പഞ്ചന്നം ജീവിതം ദേഹി, ഭാതരം മുഞ്ച ലുദ്ദക.
൧൧൭. സോ വോ അഹം പമോക്ഖാമി, മാതാപേത്തിഭരം മിഗം;
നന്ദന്തു മാതാപിതരോ, മുത്തം ദിസ്വാ മഹാമിഗം.
൧൧൮. ഏവം ലുദ്ദക നന്ദസ്സു, സഹ സബ്ബേഹി ഞാതിഭി;
യഥാഹമജ്ജ നന്ദാമി, മുത്തം ദിസ്വാ മഹാമിഗം.
൧൧൯. കഥം ത്വം പമോക്ഖോ [കഥം പമോക്ഖോ (സീ. പീ.), കഥം തേ പരോക്ഖോ (?)] ആസി, ഉപനീതസ്മി ജീവിതേ;
കഥം പുത്ത അമോചേസി, കൂടപാസമ്ഹ ലുദ്ദകോ.
൧൨൦. ഭണം കണ്ണസുഖം വാചം, ഹദയങ്ഗം ഹദയസ്സിതം;
സുഭാസിതാഹി വാചാഹി, ചിത്തകോ മം അമോചയി.
൧൨൧. ഭണം കണ്ണസുഖം വാചം, ഹദയങ്ഗം ഹദയസ്സിതം;
സുഭാസിതാഹി വാചാഹി, സുതനാ മം അമോചയി.
൧൨൨. സുത്വാ കണ്ണസുഖം വാചം, ഹദയങ്ഗം ഹദയസ്സിതം;
സുഭാസിതാനി സുത്വാന, ലുദ്ദകോ മം അമോചയി.
൧൨൩. ഏവം ആനന്ദിതോ ഹോതു, സഹ ദാരേഹി ലുദ്ദകോ;
യഥാ മയജ്ജ നന്ദാമ, ദിസ്വാ രോഹണമാഗതം.
൧൨൪. നനു ത്വം അവച [അവചാ (സീ. പീ.)] ലുദ്ദ, ‘‘മിഗചമ്മാനി ആഹരിം’’;
അഥ കേന നു വണ്ണേന, മിഗചമ്മാനി നാഹരി.
൧൨൫. ആഗമാ ചേവ ഹത്ഥത്ഥം, കൂടപാസഞ്ച സോ മിഗോ;
അബജ്ഝി തം [അബജ്ഝി തഞ്ച (പീ.)] മിഗരാജം, തഞ്ച മുത്താ ഉപാസരേ.
൧൨൬. തസ്സ മേ അഹു സംവേഗോ, അബ്ഭുതോ ലോമഹംസനോ;
ഇമഞ്ചാഹം മിഗം ഹഞ്ഞേ, അജ്ജ ഹിസ്സാമി ജീവിതം.
൧൨൭. കീദിസാ തേ മിഗാ ലുദ്ദ, കീദിസാ ധമ്മികാ മിഗാ;
കഥംവണ്ണാ കഥംസീലാ, ബാള്ഹം ഖോ നേ പസംസസി.
൧൨൮. ഓദാതസിങ്ഗാ സുചിവാളാ, ജാതരൂപതചൂപമാ;
പാദാ ലോഹിതകാ തേസം, അഞ്ജിതക്ഖാ മനോരമാ.
൧൨൯. ഏദിസാ തേ മിഗാ ദേവ, ഏദിസാ ധമ്മികാ മിഗാ;
മാതാപേത്തിഭരാ ദേവ, ന തേ സോ അഭിഹാരിതും [അഭിഹാരയും (ക. സീ.), അഭിഹാരയിം (സ്യാ.), അഭിഹാരയം (പീ.)].
൧൩൦. ദമ്മി നിക്ഖസതം ലുദ്ദ, ഥൂലഞ്ച മണികുണ്ഡലം;
ചതുസ്സദഞ്ച [ചതുരസ്സഞ്ച (സ്യാ. ക.)] പല്ലങ്കം, ഉമാപുപ്ഫസരിന്നിഭം [ഉമ്മാപുപ്ഫസിരിന്നിഭം (സീ. സ്യാ. പീ. ക.)].
൧൩൧. ദ്വേ ച സാദിസിയോ ഭരിയാ, ഉസഭഞ്ച ഗവം സതം;
ധമ്മേന രജ്ജം കാരേസ്സം, ബഹുകാരോ മേസി ലുദ്ദക.
൧൩൨. കസിവാണിജ്ജാ [കസീ വണിജ്ജാ (സീ. സ്യാ. പീ.)] ഇണദാനം, ഉഞ്ഛാചരിയാ ച ലുദ്ദക;
ഏതേന ദാരം പോസേഹി, മാ പാപം അകരീ പുനാതി [അകരാ പുനന്തി (ക. സീ. പീ.)].
രോഹണമിഗജാതകം [രോഹന്തമിഗജാതകം (സീ. പീ.)] പഞ്ചമം.