൪൭൧. മേണ്ഡകപഞ്ഹജാതകം (൮)

൯൪. യേസം ന കദാചി ഭൂതപുബ്ബം, സഖ്യം [സക്ഖിം (സീ. പീ.), സഖി (സ്യാ.)] സത്തപദമ്പിമസ്മി ലോകേ;

ജാതാ അമിത്താ ദുവേ സഹായാ, പടിസന്ധായ ചരന്തി കിസ്സ ഹേതു.

൯൫. യദി മേ അജ്ജ പാതരാസകാലേ, പഞ്ഹം ന സക്കുണേയ്യാഥ വത്തുമേതം;

രട്ഠാ പബ്ബാജയിസ്സാമി വോ സബ്ബേ, ന ഹി മത്ഥോ ദുപ്പഞ്ഞജാതികേഹി.

൯൬. മഹാജനസമാഗമമ്ഹി ഘോരേ, ജനകോലാഹലസങ്ഗമമ്ഹി ജാതേ;

വിക്ഖിത്തമനാ അനേകചിത്താ, പഞ്ഹം ന സക്കുണോമ വത്തുമേതം.

൯൭. ഏകഗ്ഗചിത്താവ ഏകമേകാ, രഹസി ഗതാ അത്ഥം നിചിന്തയിത്വാ [അത്ഥാനി ചിന്തയിത്വാ (സ്യാ. ക.)];

പവിവേകേ സമ്മസിത്വാന ധീരാ, അഥ വക്ഖന്തി ജനിന്ദ ഏതമത്ഥം.

൯൮. ഉഗ്ഗപുത്ത-രാജപുത്തിയാനം, ഉരബ്ഭസ്സ മംസം പിയം മനാപം;

ന സുനഖസ്സ തേ അദേന്തി മംസം, അഥ മേണ്ഡസ്സ സുണേന സഖ്യമസ്സ.

൯൯. ചമ്മം വിഹനന്തി ഏളകസ്സ, അസ്സപിട്ഠത്ഥരസ്സുഖസ്സ [അസ്സപിട്ഠത്ഥരണസുഖസ്സ (സീ.)] ഹേതു;

ന ച തേ സുനഖസ്സ അത്ഥരന്തി, അഥ മേണ്ഡസ്സ സുണേന സഖ്യമസ്സ.

൧൦൦. ആവേല്ലിതസിങ്ഗികോ ഹി മേണ്ഡോ, ന ച സുനഖസ്സ വിസാണകാനി അത്ഥി;

തിണഭക്ഖോ മംസഭോജനോ ച, അഥ മേണ്ഡസ്സ സുണേന സഖ്യമസ്സ.

൧൦൧. തിണമാസി പലാസമാസി മേണ്ഡോ, ന ച സുനഖോ തിണമാസി നോ പലാസം;

ഗണ്ഹേയ്യ സുണോ സസം ബിളാരം, അഥ മേണ്ഡസ്സ സുണേന സഖ്യമസ്സ.

൧൦൨. അട്ഠഡ്ഢപദോ ചതുപ്പദസ്സ, മേണ്ഡോ അട്ഠനഖോ അദിസ്സമാനോ;

ഛാദിയമാഹരതീ അയം ഇമസ്സ, മംസം ആഹരതീ അയം അമുസ്സ.

൧൦൩. പാസാദവരഗതോ വിദേഹസേട്ഠോ, വിതിഹാരം അഞ്ഞമഞ്ഞഭോജനാനം;

അദ്ദക്ഖി [അദ്ദസ (സ്യാ. ക.)] കിര സക്ഖികം ജനിന്ദോ, ബുഭുക്കസ്സ പുണ്ണം മുഖസ്സ [ഭോഭുക്ഖസ്സ ച പുണ്ണമുഖസ്സ (സീ.)] ചേതം.

൧൦൪. ലാഭാ വത മേ അനപ്പരൂപാ, യസ്സ മേദിസാ പണ്ഡിതാ കുലമ്ഹി;

പഞ്ഹസ്സ ഗമ്ഭീരഗതം നിപുണമത്ഥം, പടിവിജ്ഝന്തി സുഭാസിതേന ധീരാ.

൧൦൫. അസ്സതരിരഥഞ്ച ഏകമേകം, ഫീതം ഗാമവരഞ്ച ഏകമേകം;

സബ്ബേസം വോ ദമ്മി പണ്ഡിതാനം, പരമപ്പതീതമനോ സുഭാസിതേനാതി.

മേണ്ഡകപഞ്ഹജാതകം അട്ഠമം.