൪൭൨. മഹാപദുമജാതകം (൯)

൧൦൬. നാദട്ഠാ [നാദിട്ഠാ (ക. സീ. സ്യാ. ക.)] പരതോ ദോസം, അണും ഥൂലാനി സബ്ബസോ;

ഇസ്സരോ പണയേ ദണ്ഡം, സാമം അപ്പടിവേക്ഖിയ.

൧൦൭. യോ ച അപ്പടിവേക്ഖിത്വാ, ദണ്ഡം കുബ്ബതി ഖത്തിയോ;

സകണ്ടകം സോ ഗിലതി, ജച്ചന്ധോവ സമക്ഖികം.

൧൦൮. അദണ്ഡിയം ദണ്ഡയതി [ദണ്ഡിയതി (സ്യാ. പീ.)], ദണ്ഡിയഞ്ച അദണ്ഡിയം [അദണ്ഡിയ (നിയ്യ), ന ദണ്ഡയേ (?)];

അന്ധോവ വിസമം മഗ്ഗം, ന ജാനാതി സമാസമം.

൧൦൯. യോ ച ഏതാനി ഠാനാനി, അണും ഥൂലാനി സബ്ബസോ;

സുദിട്ഠമനുസാസേയ്യ, സ വേ വോഹരിതു [വോഹാതു (പീ.)] മരഹതി.

൧൧൦. നേകന്തമുദുനാ സക്കാ, ഏകന്തതിഖിണേന വാ;

അത്തം മഹന്തേ [മഹത്തേ (സ്യാ. ക.)] ഠപേതും [ഠാപേതും (സീ. സ്യാ. പീ.)], തസ്മാ ഉഭയമാചരേ.

൧൧൧. പരിഭൂതോ മുദു ഹോതി, അതിതിക്ഖോ ച വേരവാ;

ഏതഞ്ച ഉഭയം ഞത്വാ, അനുമജ്ഝം സമാചരേ.

൧൧൨. ബഹുമ്പി രത്തോ ഭാസേയ്യ, ദുട്ഠോപി ബഹു ഭാസതി;

ന ഇത്ഥികാരണാ രാജ, പുത്തം ഘാതേതുമരഹസി.

൧൧൩. സബ്ബോവ [സബ്ബോ ച (ക. സീ. പീ.)] ലോകോ ഏകതോ [ഏകന്തോ (സീ. പീ.)], ഇത്ഥീ ച അയമേകികാ;

തേനാഹം പടിപജ്ജിസ്സം, ഗച്ഛഥ പക്ഖിപഥേവ [പക്ഖിപേഥ (സ്യാ. അട്ഠ.)] തം.

൧൧൪. അനേകതാലേ നരകേ, ഗമ്ഭീരേ ച സുദുത്തരേ [ഗമ്ഭീരേ സുദുരുത്തരേ (പീ. ക.)];

പാതിതോ ഗിരിദുഗ്ഗസ്മിം, കേന ത്വം തത്ഥ നാമരി.

൧൧൫. നാഗോ ജാതഫണോ തത്ഥ, ഥാമവാ ഗിരിസാനുജോ;

പച്ചഗ്ഗഹി മം ഭോഗേഹി, തേനാഹം തത്ഥ നാമരിം.

൧൧൬. ഏഹി തം പടിനേസ്സാമി, രാജപുത്ത സകം ഘരം;

രജ്ജം കാരേഹി [കാരേസി (സീ.)] ഭദ്ദന്തേ, കിം അരഞ്ഞേ കരിസ്സസി.

൧൧൭. യഥാ ഗിലിത്വാ ബളിസം, ഉദ്ധരേയ്യ സലോഹിതം;

ഉദ്ധരിത്വാ സുഖീ അസ്സ, ഏവം [സുഖം (പീ. ക.)] പസ്സാമി അത്തനം [അത്തനി (പീ. ക.), അത്തനാ (സ്യാ.), ഏവം അഹമ്പി പുന സോത്ഥിഭാവപ്പത്തം ഗിലിതബളിസം പുരിസമിവ അത്താനം പസ്സാമീതി (അട്ഠ. സംവണ്ണനാ)].

൧൧൮. കിം നു ത്വം ബളിസം ബ്രൂസി, കിം ത്വം ബ്രൂസി സലോഹിതം;

കിം നു ത്വം ഉബ്ഭതം ബ്രൂസി, തം മേ അക്ഖാഹി പുച്ഛിതോ.

൧൧൯. കാമാഹം ബളിസം ബ്രൂമി, ഹത്ഥിഅസ്സം സലോഹിതം;

ചത്താഹം ഉബ്ഭതം ബ്രൂമി, ഏവം ജാനാഹി ഖത്തിയ.

൧൨൦. ചിഞ്ചാമാണവികാ മാതാ, ദേവദത്തോ ച മേ പിതാ;

ആനന്ദോ പണ്ഡിതോ നാഗോ, സാരിപുത്തോ ച ദേവതാ;

രാജപുത്തോ അഹം ആസിം [അഹം തദാ രാജപുത്തോ (സീ. സ്യാ. പീ.)], ഏവം ധാരേഥ ജാതകന്തി.

മഹാപദുമജാതകം നവമം.