൪൬൮. ജനസന്ധജാതകം (൫)

൪൯. ദസ ഖലു ഇമാനി [ഖലുമാനി (സ്യാ.)] ഠാനാനി, യാനി പുബ്ബേ അകരിത്വാ;

സ പച്ഛാ മനുതപ്പതി, ഇച്ചേവാഹ [ഇച്ചാഹ രാജാ (സീ. സ്യാ. പീ.)] ജനസന്ധോ.

൫൦. അലദ്ധാ വിത്തം തപ്പതി, പുബ്ബേ അസമുദാനിതം;

ന പുബ്ബേ ധനമേസിസ്സം, ഇതി പച്ഛാനുതപ്പതി.

൫൧. സക്യരൂപം പുരേ സന്തം, മയാ സിപ്പം ന സിക്ഖിതം;

കിച്ഛാ വുത്തി അസിപ്പസ്സ, ഇതി പച്ഛാനുതപ്പതി.

൫൨. കൂടവേദീ പുരേ ആസിം, പിസുണോ പിട്ഠിമംസികോ;

ചണ്ഡോ ച ഫരുസോ ചാപി [ചാസിം (സീ. സ്യാ. പീ.)], ഇതി പച്ഛാനുതപ്പതി.

൫൩. പാണാതിപാതീ പുരേ ആസിം, ലുദ്ദോ ചാപി [ചാസിം (സീ. പീ.)] അനാരിയോ;

ഭൂതാനം നാപചായിസ്സം, ഇതി പച്ഛാനുതപ്പതി.

൫൪. ബഹൂസു വത സന്തീസു, അനാപാദാസു ഇത്ഥിസു;

പരദാരം അസേവിസ്സം, ഇതി പച്ഛാനുതപ്പതി.

൫൫. ബഹുമ്ഹി വത സന്തമ്ഹി, അന്നപാനേ ഉപട്ഠിതേ;

ന പുബ്ബേ അദദം [അദദിം (സീ.)] ദാനം, ഇതി പച്ഛാനുതപ്പതി.

൫൬. മാതരം പിതരഞ്ചാപി, ജിണ്ണകം ഗതയോബ്ബനം [ജിണ്ണകേ ഗതയോബ്ബനേ (സീ. സ്യാ. പീ.)];

പഹു സന്തോ ന പോസിസ്സം, ഇതി പച്ഛാനുതപ്പതി.

൫൭. ആചരിയമനുസത്ഥാരം, സബ്ബകാമരസാഹരം;

പിതരം അതിമഞ്ഞിസ്സം, ഇതി പച്ഛാനുതപ്പതി.

൫൮. സമണേ ബ്രാഹ്മണേ ചാപി, സീലവന്തേ ബഹുസ്സുതേ;

ന പുബ്ബേ പയിരുപാസിസ്സം, ഇതി പച്ഛാനുതപ്പതി.

൫൯. സാധു ഹോതി തപോ ചിണ്ണോ, സന്തോ ച പയിരുപാസിതോ;

ന ച പുബ്ബേ തപോ ചിണ്ണോ, ഇതി പച്ഛാനുതപ്പതി.

൬൦. യോ ച ഏതാനി ഠാനാനി, യോനിസോ പടിപജ്ജതി;

കരം പുരിസകിച്ചാനി, സ പച്ഛാ നാനുതപ്പതീതി.

ജനസന്ധജാതകം പഞ്ചമം.